Fanongonongo ʻo e Temipale Foʻou ʻe Valu mo e Toe Fakafoʻou Fakahisitōlia
ʻE toe fakaleleiʻi e ʻū temipale ʻi he kuonga ʻo e kau paioniá, ʻo kau ai ʻa e Temipale Salt Lake, pea ʻe langa mo ha ʻū temipale foʻou ʻe valu.
Naʻe tāpuni ʻe Palesiteni Lāsolo M. Nalesoni ʻa e konifelenisi lahi ʻi ʻEpeleli 2019 ʻaki ʻene fanongonongo ha temipale foʻou ʻe valu pea mo hono fakaleleiʻi ʻo e ʻū temipale ʻe fā ʻi he kuonga ʻo e kau paioniá, ʻo kau ai ha fakamatala fakaikiiki ki hono toe fakaleleiʻi ʻo e Temipale Salt Lake.
ʻE langa ha ngaahi temipale foʻou ʻi Pago Pago, American Samoa; Okinawa City, Okinawa; Neiafu, Tonga; Tooele Valley, Utah, USA; Moses Lake, Washington, USA; San Pedro Sula, Honduras; Antofagasta, Chile; mo Budapest, Hungary.
ʻE kau ʻi he palani ke fakaleleiʻi ʻa e Temipale Salt Lake ʻa hono fakaleleiʻi ʻo e Temipale Sikueá pea mo e fale hoko mai ʻoku ofi ki he ʻŌfisi ʻo e Siasí ʻi Sōleiki Siti, ʻIutā, USA. ʻE fakaleleiʻi foki mo e ngaahi temipale ʻi St. George, Manti, mo Logan, USA ʻi he kahaʻu vave maí. Naʻe pehē foki ʻe Palesiteni Nalesoni, “ʻE fie maʻu ʻi he ngāué ni ke tāpuni ʻa e ngaahi temipale takitaha ko iá ʻi ha vahaʻataimi. ʻE ala hoko atu ʻe he kāingalotu ʻo e Siasí ʻenau mōihū mo e ngāue he temipalé ʻi he ʻū temipale kehe ofi atu aí. ʻI he ʻosi pē e ngāue takitaha, ʻe toe fakatapui leva e ʻū temipale fakahisitōliá kotoa”
Talu mei he hoko ʻa Palesiteni Nalesoni ko e Palesiteni ʻo e Siasí ʻi Sānuali 2018, kuó ne fanongonongo ha ʻū temipale foʻou ʻe 27. Talu mei he konifelenisi lahi ʻi ʻOkatopa 2018, kuo fakatapui ha ʻū temipale ʻi Loma, ʻĪtali; Palanikuila, Kolomupia; mo Konisepisioni, Silei.