Ongoongo Fakafaifekaú

Fetuʻutaki ki ʻapí. ʻOku fakamafaiʻi ʻa e kau faifekaú he taimí ni ke nau fetuʻutaki mo honau fāmilí he uike kotoa ʻi he ʻaho teuteú ʻo fakafou he pōpoaki text ʻi he telefoní, pōpoaki ʻi he ʻinitanetí, fetuʻutaki telefoní, mo e fepōtalanoaʻaki vitioó (video chat) ʻo tānaki atu ki he faitohí mo e ʻīmeilí.

Meʻangāue palani maʻá e kau teuteu ngāue fakafaifekaú. ʻE malava ke tokoni ki he kau teuteu ngāue fakafaifekaú e meʻangāue palani foʻou ki he ngāue fakafaifekaú mei he Potungāue Ngāue Fakafaifekau ʻa e Siasí, ke nau tomuʻa fakakaukau mo faʻa fakakaukau lahi ange ki heʻenau fili e taimi te nau mateuteu lelei taha ai ke ngāue maʻá e ʻEikí ko ha faifekaú.

Ngāue tokoni fakafaifekau. Ne kamata mei Sānuali 2019, ʻa hono ui ʻo e kau faifekau tokoni ʻa e Siasí ko e “kau faifekau tokoní.” Ko e kakai lalahi kei talavou kotoa pē ʻoku tohi kole ke ngāue fakafaifekau ʻoku nau fai ia ʻi he founga tatau pē, ʻo fakafou ʻi he ʻinitanetí, pea ko e ngaahi uiuiʻi fakafaifekau kotoa pē—ʻo tatau ai pē pe ko ha ngāue fakafaifekau malanga pe ko ha faifekau tokoni—ʻoku haʻu ia mei he palōfitá. Ko e kakai lalahi kei talavou ʻoku tāú ʻa ia ʻoku fakaʻatā mei he ngāue fakafaifekau malangá koeʻuhí ko ha ngaahi ʻuhinga kehekehe, ʻe malava ke ui kinautolu ke nau ngāue fakafaifekau tokoni.

ʻOku malava ke tui talausese fakafaifekau ʻa e kau faifekau fefiné. ʻOku malava ke fili e kau faifekau fefiné he taimí ni ke nau tui talausese fakafaifekau lolotonga e ngaahi ngāue fakaʻaho angamahení, ka ʻoku totonu ke kei tui kofu pe piva pē e kau faifekau fefiné ʻi he taimi ʻoku nau ʻalu ai ki he temipalé mo e lolotonga e ngaahi fakataha lotu he Sāpaté, ngaahi konifelenisi fakatakimuʻa mo fakasouní, ngaahi ouau papitaisó, mo e ngaahi fakataha lotu ʻa e senitā akoʻanga fakafaifekaú. ʻE malava ke tokoni ʻa e tui talausese fakafaifekaú ke maluʻi ʻa e kau sisitaá mei he ngaahi mahaki pipihi ʻo e namú, tauhi e kau sisitaá ke nau māfana lolotonga e taimi momokó, pea fakafaingofuaʻi ʻenau heka pasikalá.

Kuo faʻu ha ngaahi misiona, pea fakatonutonu e ngaahi fakangatangatá. Kuo faʻu ha ngaahi misiona foʻou ʻe fā, pea ʻe fakatahaʻi ha ngaahi misiona ʻe hongofulu mā ua ki ha ngaahi misiona kehe. ʻOku hoko e ngaahi liliu peheé he taimi ki he taimi koeʻuhí ke fakatatau ki he tokolahi ʻo e kau faifekau ʻoku ngāué. ʻOku kau ʻi he ngaahi misiona foʻoú ʻa e Democratic Republic of the Congo Kinshasa East, Guatemala Antigua, Peru Limatambo, mo Philippines Antipolo. ʻE maʻu ʻe he ngaahi mātuʻa ʻo e kau faifekau ʻoku lolotonga ngāue ʻi he ngaahi misiona kuo liliú—ʻo tatau ai pē pe naʻe faʻu foʻou pe fakamoveteveteʻi—ha fakamatala makehe mei heʻenau kau palesiteni misioná.

Liliu e tokolahi ʻo e senitā akoʻanga fakafaifekaú. Koeʻuhí ke fakaʻaongaʻi lelei fakamāmani lahi ʻa e ʻū senitā akoʻanga fakafaifekaú, ʻoku tāpuni ai ʻa e ʻū senitā ʻi ʻĀsenitina, Sipeini, Silei, mo e Lepāpulika Tominikení. Hili e tāpuní, ʻe ngāue ʻaki ʻe he Siasí ha ʻū senitā akoʻanga fakafaifekau ʻe 11 ʻa ia ʻoku tuʻu ʻi Palāsila; Kolomupia; ʻIngilani, Kana; Kuatemala; Mekisikou; Nuʻusila; Pelū; Filipaini; Polovo, ʻIutā, USA; pea mo ʻAfilika Tonga.

Ngaahi vitiō maluʻí. ʻOku fakataumuʻa e ngaahi vitiō konga ʻe 12 Ko e Souni Malú ke fakatupulaki e malu ʻa e kau faifekau taimi kakato ʻe toko 65,000 ʻoku nau lolotonga ngāué kae pehē ki he niʻihi ʻoku teʻeki ke nau ngāué. ʻOku fakataumuʻa ʻa e ʻuluaki vitioó ke mamataʻi ʻe he kau teuteu ngāue fakafaifekaú mo ʻenau mātuʻá hili hano maʻu ha uiuiʻi ke ngāue fakafaifekau mo e kimuʻa pea hū ki ha senitā akoʻanga fakafaifekaú. ʻE toe mamataʻi ʻe he faifekaú ʻa e ʻuluaki vitioó ʻi he MTC kae pehē foki ki he toenga vitiō ʻe 11. ʻE toutou foaki foki ki he kau faifekaú ha fakamanatu ki he tuʻunga malú ʻi he kotoa e taimi ʻo ʻenau ngāue fakafaifekaú.