ʻEletā Ricardo P. Giménez

Fitungofulu Taki Māʻolunga

ʻE manatua fuoloa ʻe he kāingalotu ʻo e Siasí ʻi Antofagasta, Chile, ʻa e konifelenisi lahi ʻi ʻEpeleli 2019 koeʻuhí ko hono fakahā ʻe tuʻu ai ha temipale he kahaʻú, pea mo hono uiuiʻi ʻo honau tokotaha fakalotofonua ko ʻEletā Likato P. Simeinesi ke ne hoko ko ha Fitungofulu Taki Māʻolungá.

ʻI he fakakaukauloto ʻa ʻEletā Simeinesi ki he ngaahi fatongia ʻa hono uiuiʻi foʻoú, ʻokú ne maʻu ʻa e tui mo e loto-toʻa ʻi he lea kimuʻa ʻoku pehē “Ko ia ʻoku ui ʻe he ʻEikí, ʻoku fakafeʻungaʻi ia ʻe he ʻEikí” (Thomas S. Monson, “Duty Calls,” Ensign, May 1996, 44).

ʻOkú ne pehē, “Kuo tā tuʻo lahi ʻeku akoʻi ʻa e kupuʻi lea ko iá he kuohilí, pea ko ʻeni ʻoku ou feinga ke moʻui ʻaki ia. ʻOku ui koe ʻe he Tamai Hēvaní. ʻOkú Ne ʻafioʻi koe. Ko ia, ʻalu ʻo fai Hono finangaló, pea ʻe lelei ʻa e meʻa kotoa pē.”

Naʻe fāʻeleʻi ʻa Likato Patelesio Simeinesi Salasā ʻi he ʻaho 28 ʻo Nōvema, 1971, ko e lahi taha ia ʻi ha fānau ʻe toko ua ne fāʻeleʻi kia Likato Penisimani Simeinesi mo Meita Lūsia ʻAmelia Salasā Sikinolini. Naʻá ne kau ki he Siasí ʻi hono taʻu 11 peá ne hiki mo ʻene faʻeé mo e tuofefiné ki Sanitiako, Silei ʻi he hili e māvae ʻene ongomātuʻá.

ʻI he 1995, naʻá ne fetaulaki mo Katalina ʻĪvoni Kalasana Sunika ʻi Sanitiako ʻi he taimi naʻe kamata ke maʻulotu ai [ʻa Katalina] ʻi he uooti [ʻa Likató] lolotonga ia e nofo [ʻa Katalina] ʻi hano faʻētangatá. Naʻe silaʻi kinaua ʻi he Temipale Santiago Chile ʻi he ʻaho 12 ʻo Sepitema, 1997 pea ko ha mātuʻa ki ha fānau ʻe toko ua.

Naʻe maʻu ʻe ʻEletā Simeinesi ʻa hono mataʻitohi ʻi he tauhitohí mo e ʻātitá ʻi he ʻUnivēsiti ʻo Sanitiakó ʻi he 1997, pea mo ha mataʻitohi MA ʻi he pisinisí ʻi he ʻUnivēsiti ʻo Sileí ʻi he 2003. Naʻe kamata ʻene maʻuʻanga moʻui fakapalōfesinalé ʻi he keliʻanga koulá, pea faifai peá ne hiki ki he ngāue fakakomipiutá ʻo ne hoko ai ko ha talēkita fakapaʻanga ki he Kautaha Komipiuta Fakasaienisi ʻi Latina ʻAmelika. Naʻá ne toe foki ki he keliʻanga koulá ʻi he 2012, ʻo ne ʻuluaki kamata ʻi he Keliʻanga Koula ʻi Siela Koutá pea hoko atu leva ki he Kautaha Keliʻanga Koula Lōpinisoni Nevatá.

ʻI he taimi naʻe uiuiʻi ai ʻa ʻEletā Simeinesí, naʻá ne hoko ko ha tokoni ʻi he palesitenisī fakasiteikí. Kuó ne hoko foki ko ha Fitungofulu Fakaʻēlia ʻi he Feituʻu Fakatonga ʻo ʻAmelika Tongá, palesiteni siteiki, aleaʻanga māʻolunga, pīsope, tokoni ki ha pīsopeliki pea ʻi ha kau palesitenisī Talavou pea ngāue fakafaifekau taimi kakato ʻi he Misiona Chile Concepcióné.