ʻEletā L. Todd Budge

Fitungofulu Taki Māʻolunga

ʻI he taimi naʻe kei tamasiʻi ai ʻa Toti Pātisí, naʻe akoʻi ia ʻe heʻene mātuʻá fekauʻaki mo e founga ke fekumi ai ki he finangalo ʻo e ʻEikí. Kuó ne feinga ke moʻui ʻaki e tōʻonga ko iá ʻi he fili kotoa pē kuó ne fai ʻi he kotoa ʻo ʻene moʻuí.

Hili ha ngaahi taʻu mei ai, ʻi heʻene nofo mo hono uaifí mo ha fānau ʻe toko nima ki ha ʻapí, naʻá ne ongoʻi ha ueʻi fakalaumālie ke ne mavahe mei heʻene maʻuʻanga moʻui ngāue pangikeé mo e ngaahi meʻa fakapaʻangá. ʻE fie maʻu ha feilaulau lahi ki he liliu ko iá kae lava ke hoko lelei atu ʻi ha ngāue maʻuʻanga moʻui foʻou.

Hili e feinga mo e teuteu lahi ʻa ʻEletā Pātisi ke liliu ʻene maʻuʻanga moʻuí, naʻá ne fakataha mo ha tokotaha taukei makehe ke ne faleʻi ia. Naʻe fokotuʻu ange ʻe he tokotaha ko ʻení kia ʻEletā Pātisi ke nofo pē ʻi heʻene ngāue maʻuʻanga moʻui fakapangikeé, ʻo fakamanatu ange te ne maʻu ai ha ngaahi faingamālie lahi ke faleʻi mo tokoniʻi e kakaí. Naʻe talaange ʻe he tokotahá kiate ia, “ʻOku tau fie maʻu ha kakai angatonu ʻi he pisinisí.”

Naʻe fakakaukau ʻa ʻEletā Pātisi ki he aʻusia ko iá ko ha ʻaloʻofa ongongofua mei he ʻEikí. ʻOkú ne pehē, “ʻOku ou tui naʻá Ne finangalo ke ʻiloʻi e tūkunga hoku lotó. ʻI hono ʻafioʻi ʻe he ʻEikí hoku lotó, naʻe ʻikai ke Ne finangalo ki he feilaulaú, pea naʻá ku falala te Ne lava ʻo meʻangāue ʻaki au ki Heʻene ngaahi taumuʻá taʻe ha liliu ki he maʻuʻanga moʻuí.”

Naʻe fakaʻatā ʻe heʻene maʻuʻanga moʻuí ke hoko ko ha tākiekina lelei ʻi he māmani ʻo e pisinisí, ʻo aʻu ki hono maʻu ha ngaahi faingamālie ke vahevahe e ongoongoleleí ʻi Siapani.

Naʻe fāʻeleʻi ʻa Lōleni Toti Pātisi ʻi he ʻaho 29 ʻo Tīsema, 1959 ʻi Pitisipeeki, Kalefōnia,USA kia Louela Seniseni mo Tiana Palaisi Pātisi. Naʻá ne fetaulaki mo Loli Kapena lolotonga hono taʻu ʻuluaki ʻi he ʻUnivēsiti Pilikihami ʻIongí. Hili ha māhina ʻe valu ʻo ʻene foki mei he ngāue ʻi he Misiona Japan Fukuoka, naʻá na mali ʻi he Temipale Logan Utah. ʻOkú na maʻu ha fānau ʻe toko ono.

Hili e ʻosi ʻa ʻEletā Pātisi mei BYU ʻi he 1984 mo ha mataʻitohi BA ʻi he ʻekonōmiká, naʻá ne ngāue maʻá e Baini & Company ʻi Siapaní; Citibank, N.A.; mo e GE Capital. Naʻá ne hoko ko e palesiteni mo e ʻōfisa pule ki he Tokyo Star Bank Limited ʻi he 2003, ʻo ne hoko ai ko e sea ki he poate ʻa e pangikeé mei he 2008 ki he 2011.

Kuo hoko ʻa ʻEletā Pātisi ko ha Fitungofulu Fakaʻēlia, palesiteni ʻi he Misiona Japan Tokyo, palesiteni fakasiteiki, pīsope, palesiteni kōlomu kaumātuʻa, mo e palesiteni ʻo e Kau Talavoú ʻi he siteikí.