Ngaahi Tuʻutuʻuni, Founga Ngāue, Maʻuʻanga Tokoni Foʻoú

Fakamatala ki he ʻū temipalé. Naʻe tukuange mai ʻe he Kau Palesitenisī ʻUluakí ha fakamatala ʻi he ʻaho 2 ʻo Sānuali, 2019, ʻa ia ne pehē ʻe ha konga ai: “ʻI he laui senituli kimuʻá, kuo toutou liliu e ngaahi fakamatala fekauʻaki mo e ngāue fakatemipalé, ʻo kau ai e lea fakafonuá, founga langá, fetuʻutakí mo e tauhi lekōtí. Kuo akoʻi mai ʻe he kau palōfitá he ʻikai ha ngataʻanga ʻo e ngaahi feliliuaki peheé ʻo fakatatau ki he fakahinohino ʻa e ʻEikí ki Heʻene kau tamaioʻeikí.”

Fakalakalaka ʻa e fānaú mo e toʻu tupú. ʻI he taimi ní, ʻoku fakakakato ʻe he fānaú ʻa e Palaimelí mo e toʻu tupú pea nau hiki mei he kalasi pe kōlomu lolotongá ki he kalasi pe kōlomu hokó ʻi Sānuali, ʻo fakatatau ki he toʻú kae ʻikai ko e hili honau ʻaho fāʻeleʻí. ʻOku toe ʻuhinga foki ʻeni ʻe lava ke maʻu ʻe he toʻu tupú ha lekomeni temipale fakangatangata ʻi Sānuali ʻo e taʻu te nau taʻu 12 aí, pea ʻe lava ke fakanofo ʻa e kau talavoú ki he Lakanga Taulaʻeiki Faka-ʻĒloné ʻi he Sānuali ʻo e taʻu te nau taʻu 12 aí.

Lahi ange ngaahi faingamālie ke tokoní. Kuo fanongonongo ʻe he Kautaha Tokoni ʻOfa ʻa e Siasí ʻene fengāueʻaki mo e JustServe.org ke fakahoko ʻa e polokalama #YouCanDoSomething, ʻa ia ʻoku fakaafeʻi ai e kakaí ke nau ngāue tokoni fakalotofonua mo foaki ki ha ʻuhinga lelei fakaemāmani lahi ke tokoni ke liliu e māmaní. Ke kamatá, ʻaʻahi ki he peesi “How to Help” ʻi he LDSCharities.org.

Ngaahi maʻuʻanga tokoni foʻou ki he ngāue fakaetauhí. Kuo update ʻa e uepisaiti This Is Ministering (ministering.ChurchofJesusChrist.org) ʻaki ha ngaahi fakamatala mo e vitiō lahi ange. ʻE lava ʻe he ngaahi maʻuʻanga tokoni ʻi he uepisaití ʻo tokoniʻi e kau laukongá ke nau alanima atu ʻi he manavaʻofa, faʻu ha ngaahi vā fetuʻutaki ʻoku ʻuhingamālié, fakatupulaki ʻenau pōtoʻi fanongó mo e alā meʻa peheé. ʻOku kau ʻi he kanotohi foʻoú e Ngaahi Tefitoʻi Moʻoni ʻo e Ngāue Fakaetauhí, ʻa ia kuo paaki ʻi he ongo makasini Ensign mo e Liahoná, ngaahi fakafehokotaki ki he ʻū lea ʻi he konifelenisi lahí fekauʻaki mo e ngāue fakaetauhí, mo e ʻū vitiō, lea mo e potufolofola ʻoku ala vahevahé.

ʻAmanaki lelei mo e fakamoʻui ki he niʻihi ʻoku ngaohikoviá. ʻOku ʻomi ʻe ha uepisaiti foʻou ʻa e Siasí ko e abuse.ChurchofJesusChrist.org, ha ngaahi maʻuʻanga tokoni mo ha meʻangāue ʻaonga ki he niʻihi ʻoku ngaohikoviá pea mo kinautolu ʻoku nau fakaʻamu ke taʻofi ʻa e ngaohikoviá. ʻI he ʻaho 26 ʻo Māʻasi, 2019 naʻe tukuange mai ai ʻe he Kau Palesitenisī ʻUluakí ha tohi ne fakalotolahiʻi ai e kau taki ʻo e Siasí ke nau alanima atu ʻi he ʻofa ʻo tokoniʻi ʻa kinautolu ʻoku nau faingataʻaʻia ʻi he ngaohikoviá. Naʻe ʻomi fakataha ʻa e tohí mo ha maʻuʻanga tokoni ne fakafoʻou ai ʻa e ngaahi fakahinohino ki he founga ke faleʻi ʻe he kau pīsopé mo e kau palesiteni siteikí ʻa e niʻihi ʻoku ngaohikovia fakasekisualé pea mo e founga ke nau ʻinitaviu ai e kāingalotu ʻo e Siasí. Naʻe tukuange mai foki ʻe he Siasí ha foʻi vitiō ko e “Protect the Child,” mo fakafoʻou ʻa e fakamatala ki he ngaohikoviá ʻi he Gospel Topics.

Ngaahi polokalama foʻoú. Te ke lava ʻo fokotuʻu ha taimi tēpile ʻi he konga ki he Palani Akó ʻi he fakafoʻou fakamuimuitaha ʻo e polokalama Gospel Library, ki hono ako ha faʻahinga meʻa pē ʻoku maʻu ʻi he polokalamá. Ko e Ordinances Ready ko ha meʻangāue tokoni foʻou ia ʻi he polokalama FamilySearch ʻa ia ʻokú ne fakafaingofuaʻi ʻa e fekumi ki he ngaahi hingoa ki he temipalé, ʻa ia ʻokú ke maʻu ai ha taimi lahi ange ke tokoniʻi ho fāmilí mo fiefia ʻi he ngaahi tāpuaki ʻo e temipalé. Pea ʻoku maʻu ʻe he polokalama FamilySearch ha ngaahi ʻekitivitī foʻou kehekehe ke fakahoko ʻi ʻapi, hangē ko e “Walk Where They Walked,” [ʻAʻeva he Feituʻu Ne Nau ʻAʻeva Aí] ke tokoni ke fakakau e kāingalotu kei talavou angé ki he hisitōlia fakafāmilí. ʻOku maʻu e ngaahi ʻekitivitií ʻi ha lea fakafonua ʻe 10.

Kuo taʻofi ʻa e ʻū polokalama lalahí. Neongo ʻoku taau ke fakahoko ʻa hono fakafiefiaʻi ʻo e ʻulungaanga mo e hisitōlia fakafonuá, ka ʻoku taʻofi ʻe he Siasí he taimí ni e ngaahi polokalama lalahi hangē ko e fakaʻaliʻalí. Ko e ngaahi fakaʻaliʻali ʻe tolu ʻe kei hoko atú: ko e Fakaʻaliʻali Nāvū ʻi ʻIlinoisi, USA, ʻaki e tokoni mei he ʻuluʻi ʻōfisi ʻo e Siasí; ko e Fakaʻaliʻali Mesa ʻi ʻAlesona, USA, ʻi he malumalu ʻo e takimuʻa fakaʻēliá; mo e Fakaʻaliʻali Pilitāniá ʻi he malumalu ʻo e takimuʻa fakaʻēliá, ke fakahoko fakataʻu fā. Kuo taʻofi foki ʻe he Siasí e ngaahi kātoanga fakafonua ʻa e toʻu tupú kimuʻa he fakatapui ʻo ha temipale ka ʻoku fetongi ʻaki ia e fakataha lotu ʻa e toʻu tupú mo e kau taki ʻo e Siasí ʻoku ʻaʻahi maí.