Tuʻutuʻuni ki he Fānau ʻoku LGBT ʻenau Mātuʻá, Kāingalotu ʻoku Mali ʻa Tangata mo Tangata pe Fefine mo Fefiné

Naʻe fanongonongo ʻe Palesiteni Tāleni H. ʻOakesi, Tokoni ʻUluaki ʻi he Kau Palesitenisī ʻUluakí, ʻi he fakataha fakatakimuʻa ʻo e konifelenisi lahí ʻo pehē ʻoku malava he taimí ni ʻe he mātuʻa ʻoku nau nonofo fakafefine, nonofo fakatangata, fakatou nonofo tangata mo fefine, pe fakaleitī pe fakasianá ʻo kole ke tāpuakiʻi ʻenau fānau valevalé ʻe ha tokotaha taau ʻokú ne maʻu e Lakanga Taulaʻeiki Faka-Melekisētekí, pea ʻe malava foki ke papitaiso ʻenau fānaú hili honau taʻu valú taʻe toe fie maʻu ha tohi ngofua mei he Kau Palesitenisī ʻUluakí.

ʻIkai ngata aí, neongo ʻoku kei hoko pē ʻa e mali ʻa e tangata mo e tangata mo e fefine mo e fefiné “ko ha maumaufono mamafa,” ka he ʻikai ke toe fakakaukau ʻa e Siasí ki ai ko ha “hē mei he moʻoní” koeʻuhí ke fai ai ha fakatonutonu faka-Siasi. Naʻe pehē ʻe Palesiteni ʻOakesi, “Ko e founga tatau pē ʻe fakahoko ki he tōʻonga angaʻuli ʻi he vā fetuʻutaki ʻa e tangata mo e fefiné pe fakasōtomá.”

Naʻe tohi ʻe he Kau Palesitenisī ʻUluakí ʻi ha fakamatala fakaʻofisiale ʻo pehē, ʻoku ʻikai hanga ʻe he ngaahi liliu ko ʻeni ʻi he tuʻutuʻuní “ʻo fakafofongaʻi ai ha liliu ʻi he tokāteline ʻo e Siasí fekauʻaki mo e nofomalí pe ngaahi fekau ʻa e ʻOtuá ʻoku felāveʻi mo e angamaʻá pe ʻulungaanga maʻá. He ʻikai ke liliu ʻa e tokāteline ʻo e palani ʻo e fakamoʻuí mo e mahuʻinga ʻo e angamaʻá.”

Naʻe pehē ʻe Palesiteni ʻOakesi ʻoku totonu ke tokoni e ngaahi tuʻutuʻuní ki he ngaahi fāmili ʻoku uesiá, pea “ʻikai ngata aí, ʻoku totonu ke hanga ʻe he ngaahi feinga ʻa hotau kāingalotú ke fakahaaʻi ʻa e mahinó, manavaʻofa mo e ʻofa lahi angé ʻo fakatupulaki ʻa e fakaʻapaʻapá mo e mahinó ʻi he kakai kotoa pē ʻoku loto fie tokoní.”