Mālō e lelei mei Malēsia!
Mālō e lelei! Ko Mako mo Paolo kimaua.
ʻOkú ma ʻaʻahi ki Malēsia!
Ko Malēsiá ko ha fonua fakaʻofoʻofa ia ʻi he Tonga-hihifo ʻo ʻĒsiá. ʻOku ʻi ai ha kāingalotu ʻo e Siasí ʻe toko 10,000 nai mo e ngaahi kolo ʻe 33 ʻi Malēsia. ʻOku toko siʻi ka ʻoku mālohi ʻa e Siasí ʻi ai!
ʻOku ʻuhinga ʻa e keluarga ki he “fāmili” ʻi he lea faka-Maleí. ʻOku saiʻia ʻa e fāmili ko ʻení ke nau vaʻinga fakataha ʻi he pāká.
Ko e telianí ko e fuaʻiʻakau nanamu-mālohi taha ia ʻi māmaní! ʻOku tokolahi e kakai ʻi Malēsia ʻoku nau manako ʻi he fuaʻiʻakau ngako ko ʻení. ʻOku fakaʻaongaʻi ia ke ngaohi ʻaki ʻa e lolé, ʻaisi kilimí, mo e fanga kiʻi fakaneifua kehé.
ʻOku tui ʻa e kakai ʻi Malēsiá ki he ngaahi tui fakalotu kehekehe ʻo kau ai ʻa e faka-ʻIsilamí, faka-Putá, mo e faka-Kalisitiané. Ko e ngaahi sitepu fakalanulanu ko ʻení ʻoku ʻalu ia ki he ʻAna Patú. ʻOku tuʻu ʻi loto ha temipale Hinitū ʻiloa!
ʻOku saiʻia ʻa e ngaahi fāmili ʻi Malēsiá ke nau ʻeveʻeva ʻo kai fakataha. ʻOku lava ʻe he kakaí ʻo fakatau mai ʻa e meʻakaí mei he veʻehalá he ʻahó mo e poó kakato.
Ko e fānau Palaimeli ko ʻení ʻoku nau tangutu ʻi muʻa ʻi ha fakaʻilonga ʻa e Siasí ʻi he lea faka-Maleí mo e lea faka-Siainá. ʻOku lea ʻaki ʻe he kakai ʻi Malēsiá ha ngaahi lea fakafonua kehekehe. ʻOku tokoni ʻa e kāingalotú ʻi he lotú ke fakatonu lea kae lava ke mahino ki he tokotaha kotoa pē.
ʻOku ʻufikaua e konga lahi ʻo Malēsiá ʻe he vaotā ʻakau lalahí. Ko e nofoʻanga ia ʻa ha fanga monumanu fakaofo hangē ko e taika Malēsiá mo e ngeli ihu lōloá.
Feʻiloaki mo ha niʻihi ʻo hotau ngaahi kaungāmeʻa mei Malēsiá!
ʻOku finangalo ʻa e ʻOtuá ke tau angaʻofa mo tauhi ʻa e ngaahi fekaú.
ʻAnika C., taʻu 7, Kuala Lumupua, Malēsia
Ko e tefito ʻo e tui hono faá ʻoku ou manako taha aí: “ʻOku mau tui ko e ngaahi ʻuluaki tefitoʻi moʻoni mo e ngaahi ouau ʻo e Ongoongoleleí ko e: ʻuluakí, Tui ki he ʻEiki ko Sīsū Kalaisí; uá: Fakatomala; tolú, Papitaiso ʻi he fakauku ke fakamolemoleʻi ʻa e ngaahi angahalá; faá, Hilifaki ʻo e nima ke maʻu ʻa e meʻa-foaki ʻo e Laumālie Māʻoniʻoní.”
Leifi C., taʻu 8, Kuala Lumupua, Malēsia
ʻOkú ke haʻu mei Malēsia? Tohi mai kiate kimaua! ʻOkú ma fie fanongo meiate kimoutolu.
Fakamālō atu ʻi hoʻomou fie mamataʻi ʻa Malēsia mo kimauá! Tau toki sio!