Avea Faapei o Ia

Saunia e Elder Scott D. Whiting

O Le Fitugafulu

E na o Lana fesoasoani faalelagi lava e mafai ai ona tatou alualu uma i luma i le avea ai e faapei o Ia.

E oo lava foi i se tasi na suesueina mae’ae’a le soifuaga ma le galuega a Iesu Keriso, o le apoapoaiga a le Faaola ia avea “e faapei o A’u” ¹ e taufaafefe ma e foliga mai e le ma’ausia. Atonu e te faapei foi o a’u—e matua iloa lelei ou faaletonu ma toilalo, o lea atonu e te iloaina e sili atu ai ona to’amalie faalemafaufau le savali i se ala e le moomia ai se aga’i i luga ma sina tuputupu a’e itiiti. “E mautinoa, o lenei aoaoga e le moni, ma ua soona faamamafa,” ma tonu ia i tatou, pe a tatou filifilia ma le to’afimalie le ala faigofie e ‘alofia ai feteenaiga, e itiiti lava ni faai’uga e manaomia mo se suiga.

Ae faapefea pe afai o le avea “faapei o [Ia]” e le o se talafaatusa, e oo lava i o tatou tulaga faaleolaga nei? E faapefea pe afai, i se isi itu, e maua i lenei olaga ma, o le mea moni, o se mea e manaomia e toe faatasi ai ma Ia? E faapefea pe afai o le “faapei o A’u” o le uiga tonu lea ma le ma’oti o le fetalaiga a le Faaola? Ona ā lea? O le a le tele o taumafaiga o le a tatou naunau e tuu atu e valaaulia ai Lona mana faavavega i o tatou olaga ina ia mafai ai ona tatou suia lo tatou lava natura [faaletagata]?

Na aoao mai Elder Neal A. Maxwell: “A tatou manatunatu loloto i mea e poloaiina ai i tatou e Iesu ia avea ai e faapei o Ia, tatou te iloa ai o lo tatou tulaga faaleagaga i le taimi nei, o se tulaga e le faapea o tatou amioleaga, ae, o se tulaga o lo tatou le faamaoni a’ia’i, ma ua tatou le naunau ai i Ona faamoemoega—o lo tatou faamoemoega foi! Tatou te lelei, ae seāseā tatou taumafai e faataitai ia te Ia.” ² Sa faaalia e se faifeau talavou, o Charles M. Sheldon, ni manatu foi faapea: “Ua matua fiafia tele lo tatou avea ma Kerisiano i le faigofie ma le fifilemu lelei ua tatou le mananao ai e amo se mea ua talatala ma mamafa tele e pei o se satauro.” ³

O le mea moni, ua noatia uma i tatou i lalo o le poloaiga ia avea e faapei o Ia, e faapei foi ona avea Iesu Keriso e pei o le Tama. ⁴ Pe a tatou alualu pea i luma, e faasolo ina tatou atoatoa atili, mae’a, ma atia’e atoatoa. ⁵ O lea aoaoga e le o faavaea i ni aoaoga faavae a se ituaiga, ae e tuusa’o mai lava i le Matai lava Ia. O le vaaiga lea e tatau ona soifua ai le olaga, fuafua i ai talatalanoaga, ma faafailele ai mafutaga. O le mea moni, e leai lava se isi ala e faamalolo ai manu’a o mafutaga malepelepe po o se sosaiete ua fevaevaeai nai lo i tatou taitoatasi ia faata’ita’i atoatoa i le Alii o le Filemu. ⁶

Se’i o tatou mafaufau pe faapefea ona amata se tulimata’iga ‘anoa, faautauta, ma le manatu tonu i ai o le avea e faapei o Ia, e ala i le mauaina o uiga paia totino o Iesu Keriso.

Fai Se Faaiuga ma Tautino Atu

O ni nai tausaga ua mavae, sa ma tutu ai ma lo’u toalua i le amataga o se alasopo o le mauga aupito maualuga o Iapani, o Mauga Fuji. A o amata ona ma a’ea’e atu i luga, sa ma tilotilo atu i le mamao o le tumutumu ma tomanatu pe mafai ona ma oo i ai.

A o ma agai pea i luga, sa oo mai lagona o le vaivai, tiga o musele, ma aafiaga o le maualuga. I le mafaufau, na amata ona taua mo i ma’ua le tau na ona taulai atu i le la’a e sosoo ai. Sa ma faapea, “Atonu e le vave ona ou oo i le tumutumu, ae e mafai ona ou faia le isi la’a i le taimi nei lava.” I le aluga o le taimi sa i’u lava ina mafai ona ausia le galuega taufaamatau—i lea la’a ma lea la’a.

O le laasaga muamua i luga o lenei ala o le avea faapei o Iesu Keriso o le i ai lea o se manao e faia ai. O le malamalama i le apoapoaiga ia avea faapei o Ia e lelei, ae o lena malamalama e manaomia ona fuifui lua ma se naunautaiga e liua i tatou lava, i le tasi le la’a i le taimi, e faatoilalo ai le tagata natura. ⁷ Ina ia atia’e le manao, e tatau ona tatou iloa pe o ai Iesu Keriso. E tatau ona tatou iloaina se mea e uiga i Lona tagata, ⁸ ma e tatau ona tatou vaavaai mo Ona uiga paia i tusitusiga paia, o sauniga tapuai, ma isi nofoaga paia. A o amata ona tatou iloa atili e uiga ia te Ia, o le a tatou vaaia Ona uiga paia o atagia mai i isi. O le a faamalosiauina ai i tatou i a tatou lava taumafaiga, aua afai e mafai ona maua e isi, i nisi itu, Ona uiga paia, tatou te mafaia foi.

Afai tatou te faamaoni ia i tatou lava, e musumusu mai le Malamalama o Keriso ⁹ o i totonu ia i tatou e faapea o loo i ai se mamao i le va o le mea o tatou i ai e faatusatusa i le uiga manaomia o le Faaola. ¹⁰ E taua tele lena faamaoni pe afai e ao ona tatou alualu i luma ia faapei o Ia. Ioe, o le faamaoni o se tasi o Ona uiga paia.

Ia, o i tatou o e totoa e ono manatu e fesili i se tagata faatuatuaina o le aiga, toalua, uo, po o se taitai faaleagaga po o le a le uiga paia o Iesu Keriso o loo tatou manaomiaina—ma e ono manaomia ona tatou saunia mo se tali tatou te le fia faalogo i ai! O nisi taimi tatou te vaai ai ia i tatou lava i ni fa’aāta malie taufaasese o loo faaali mai ai a lē o lo tatou lapotopoto, po o lo tatou faa’ausē nai lo tatou foliga moni.

E mafai ona fesoasoani uo ma aiga faatuatuaina ia i tatou ia sa’o lelei ai la tatou vaai ia i tatou lava, ae e oo foi ia i latou, po o le a lava le alolofa ma lo latou fesoasoani e mananao ai, ae mafai lava ona lē atoatoa foi la latou vaai. O le taunuuga la, e taua tele lo tatou fesili foi i lo tatou Tama Faalelagi alofa po o le a le mea tatou te manaomia ma pe o fea foi e tatau ona taulai i ai a tatou taumafaiga. E atoatoa Lana silafaga ia i tatou ma o le a faaali mai ma le alofa ia i tatou o tatou vaivaiga. ¹¹ Atonu o le a e aoaoina e te manaomia se onosai tele atu, lotomaualalo, alofa mama, alofa, faamoemoe, filiga, po o le usitai ua na o nisi nei o mea. ¹²

E le’i mamao atu, sa i ai so’u aafiaga o’oo’o faaleagaga ina ua faia e se taitai alofa o le Ekalesia se fautuaga tuusa’o tele faapea sa manaomia ona ou atina’e se uiga paia patino. Na ia tuusa’o mai ma le alofa e aunoa ma le tau ufiufia o le mea moni. I lena po, sa ou faasoa atu ai lenei aafiaga i lo’u toalua. Sa matua alofa mutimutivale o ia e ui ina sa ioe i le fautuaga a le taitai. Na faamautu mai e le Agaga Paia ia te a’u o le la fautuaga sa mai se Tama Faalelagi alofa.

E ono fesoasoani foi le faamae’aina faamaoni o le gaoioiga uiga paia faaKeriso o loo i le mataupu e 6 o le Tala’i La’u Talalelei. ¹³

A uma loa ona e faia se iloiloga faamaoni ma fai se faaiuga e amata ona savali sopo i luga o le mauga, o le a manaomia loa ona e salamo. Na aoao mai ma le alofa Peresitene Russell M. Nelson: “A tatou filifili e salamo, ua tatou filifili e sui! Ua tatou faatagaina le Faaola e suia i tatou i o tatou lava ituaiga tagata silisili. Tatou te filifili e tuputupu a’e faaleagaga ma maua le olioli—le olioli o le togiolaina ia te Ia. Pe a tatou filifili e salamo, ua tatou filifili ia avea atili e faapei o Iesu Keriso!” ¹²

O le avea e faapei o Iesu Keriso, o le a manaomia ai le suia o o tatou loto ma mafaufau, o le mea moni, o tatou lava uiga faaletagata, ma o le faia o lena mea e na o le alofa tunoa lavea’i o Iesu Keriso e mafai ai. ¹⁵

Faailoa ma Faatino

Lea la ua tonu ia te oe e sui ma salamo ma sailia foi le taitaiga e ala i le tatalo, manatunatu faamaoni, ma atonu foi e fefautuaai ma isi, o le a manaomia ai ona e filifili se uiga paia o le a matuai avea moni ma au taula’iga. O le a manaomia ona e tautino atu e faia ni taumafaiga ‘anoa. O le a lē maua gofie ma faafuasei nei uiga paia, ae e ala mai i Lona alofa tunoa o le a auaua’i mai ai pe a galue malosi i ai.

O uiga paia FaaKeriso o meaalofa ia mai se Tama Faalelagi alofa e faamanuiaina ai i tatou ma i latou o loo vagaia i tatou. O le mea lea, o a tatou taumafaiga ia maua nei uiga paia o le a manaomia ai aioiga faamaoni mo Lana fesoasoani faalelagi. Afai tatou te sailia nei meaalofa ia lelei atili ai lo tatou auauna atu i isi, o le a Ia faamanuiaina i tatou i a tatou taumafaiga. O le sa’ilia ma le manatu faapito o se meaalofa mai le Atua o le a i’u i le ita ma le lē faamalieina.

O le taulai malosi atu i se uiga paia o loo manaomia, a o e alualu i luma i le mauaina o lena uiga paia, o le a amata ai foi ona e maua isi uiga paia. Pe le mafai ea e se tasi o loo taulai malosi atu i le alofa mama ona faateleina i le alofa ma le lotomaualalo? Pe le mafai ea e se tasi o loo taulai atu i le usiusitai ona maua le filiga tele atu ma le faamoemoe? O au taumafaiga iloga ia maua ai se tasi o uiga paia e avea ma tai fana’e e siisii ai vaa uma i le uafu.

Tusifaamaumau ma Faatumau

E taua mo a’u pe a ou tauivi e avea e faapei o Ia le tusifaamaumau o o’u aafiaga ma mea ou te aoaoina. A o ou suesueina loloto se tasi o Ona uiga paia i lo’u mafaufau, na oo ina fou ia mau a o o’u vaavaai atu i faataitaiga o lenei uiga paia i Ana aoaoga, Lana galuega, ma Ona soo. Na taulai faapitoa atu foi o’u mata i le iloaina o uiga paia i isi. Na ou matauina ni tagata matagofie i totonu ma fafo atu o le Ekalesia o e ua i ai uiga paia na faaalia ai o Ia. O i latou o ni faataitaiga mamana o le ala e mafai ai e nei uiga paia ona faaalia i ni tagata faatauvaa e ala i Lona alofa tunoa.

Ina ia mafai ona vaaia le alualu i luma moni, o le a manaomia ona e tuuina i se taumafaiga tumau. E faapei lava o le a’ea o se mauga e manaomia ai foi tapenaga a o le’i faia, ma le onosai ma le faapalepale i le taimi e a’ea’e ai, e faapena foi i lenei faigamalaga e manaomia ai foi taumafaiga moni ma le ositaulaga. O le Faa-Kerisiano moni, lea tatou te tauivi ia avea ai faapei o lo tatou Matai, e manaomia ai lava e le aunoa a tatou taumafaiga aupito sili. ¹⁶

Ia, o sina upu puupuu o se lapataiga. O le poloaiga ia avea e faapei o Ia, e le o faamoemoe ia e lagona ai le ta’usalaina, lē agavaa, po o le lē alofaina. O o tatou aafiaga uma i le olaga faitino e faatatau i le alualu i luma, tofotofoina, toilalo, ma faamanuiaina. E ui atonu sa ma moomoo ma lo’u toalua ia mafai ona moeiini o ma mata ma molimoli faamaneta atu i ma’ua i le tumutumu, ae e le o le uiga lena o le olaga.

Ua lava lou lelei, e alofaina oe, ae e le faapea ai la ua e atoa. O loo i ai le galuega e tatau ona faia i lenei olaga ma le isi. E na o Lana fesoasoani faalelagi lava e mafai ai ona tatou alualu uma i luma i le avea ai e faapei o Ia.

I nei taimi ua foliga mai ai ua “vāvāō mea uma; ma … [foliga mai] ua oo mai le mata’u i luga o tagata uma,” ¹⁷ e na o le pau le tali, pau le vaifofo, o le tauivi lea ia avea e faapei o le Faaola, ¹⁸ le Togiola ¹⁹ o tagata uma, le Malamalama o le Lalolagi, ²⁰ ma ia saili atu i Le na tautino mai, “O A’u o le ala.” ²¹

Ou te iloa o le avea e faapei o Ia e ala i Lana fesoasoani ma le malosiaga faalelagi e mafai ona ausia i lea la’a ma lea la’a. Pe ana le mafaia, semanu Na te le tuuina mai ia i tatou lenei poloaiga. ²² Ua ou iloa lenei mea—i se vaega ona ua ou vaai i uiga paia i le toatele o outou. Ou te molimau atu ai i nei mea, i le suafa o Iesu Keriso, amene.