Ia Outou Lototetele
O lo tatou faatuatua le maluelue i le aoaoga faavae o le talalelei toefuataiina a Iesu Keriso e taialaina ai o tatou laasaga ma aumaia ai ia i tatou le olioli.
I toe aso o Lona soifua ai i le olaga nei, sa ta’u atu ai e Iesu Keriso i Ana Aposetolo e uiga i sauaga ma faigata o le a latou feagai ai. 1 Sa ia faaiu i le faamautinoaga maoae lenei: “E maua foi outou e le puapuaga i le lalolagi: a ia outou loto tetele; ua ou manumalo i le lalolagi” (Ioane 16:33). O le savali lenei a le Faaola i fanau uma a lo tatou Tama Faalelagi. O le tala fiafia taualuga lea mo i tatou taitoatasi i o tatou olaga faitino.
“Ia outou lototetele” o se faamautinoaga manaomia foi lea i le lalolagi lea na auina atu i ai e Keriso toetu Ana Aposetolo. “Ua puapuagatia i matou i mea uma,” na ta’u atu ai mulimuli ane e le Aposetolo o Paulo i Korinito, “a e le faaatuatuvaleina; ua le mautonu, a e le aveesea ai le faamoemoe; ua sauaina, a e le tuulafoaiina; ua lafotuina i lalo, a e le fano” (2 Korinito 4:8–9).
Lua afe tausaga mulimuli ane sa “puapuagatia ai [foi i tatou] i mea uma,” ma tatou te manaomia foi lena lava savali ia le aveesea ai le faamoemoe ae ia lototetele. E i ai le alofa ma le popolega faapitoa o le Alii mo Ona afafine faapelepele. Na te silafia o outou manao, o mea tou te manaomia, ma o outou atuatuvalega. O loo i le Alii le mana uma. Faalagolago ia te Ia.
Na aoao mai e le Perofeta o Iosefa Samita e faapea “o galuega, ma fuafuaga, ma faamoemoega o le Atua e lē mafai ona taofia, pe mafai ona avea i latou ma meanoa” (Mataupu Faavae ma Feagaiga 3:1). I Ana fanau o feagai ma tauiviga, na tuu mai ai e le Alii nei faamautinoaga silisili.
“Faauta, o le folafolaga lenei a le Alii ia te outou, E outou e o a’u auauna.
“O le mea lea, ia fiafia, ma aua le fefefe, aua o Aʼu o le Alii ua Ou faatasi ma outou, ma o le a tu i tafatafa o outou; ma o le a outou molimau atu Aʼu, o Iesu Keriso lava, o Aʼu o le Atalii o le Atua soifua” (Mataupu Faavae ma Feagaiga 68:5–6).
O loo tu le Alii i o tatou autafa, ma na Ia fetalai mai:
“O le mea Ou te fai atu ai i le toatasi ua Ou fai atu ai i tagata uma, ia fiafia, le fanau iti e; ona ua Ou i ai i lo outou lotolotoi, ma Ou te lei tuulafoaia outou” (Mataupu Faavae ma Feagaiga 61:36).
“E oo mai faamanuiaga pe a mavae atu puapuaga e tele” (Mataupu Faavae ma Feagaiga 58:4).
Tuafafine, ou te molimau atu o nei folafolaga, na tuuina mai i le taulotoaiga o sauaga ma mala faaletagata lava ia, e faatatau ia te outou taitoatasi i o outou tulaga mafatia i le taimi nei. E taua ma e faamanatu mai ai ia i tatou taitoatasi ina ia lototetele ma ia olioli i le atoaga o le talalelei a o tatou fetaomi atu i luma e ala i luitau o le olaga nei.
O puapuaga ma luitau o ni aafiaga masani o le olaga nei. O le faafeagai o se vaega taua o le fuafuaga paia e fesoasoani ai ia te i tatou ia tuputupu ae, 2 ma i le taulotoaiga o lena faagasologa, ua ia te i tatou le faamautinoaga a le Atua e faapea, i le vaaiga i le faavavau, o le a le faatagaina le faafeagai e faatoilaloina i tatou. Faatasi ai ma Lana fesoasoani, ma lo tatou faamaoni ma le onosai, o le a tatou manumalo ai. E faapei o le olaga nei, lea ua avea ai na mea o sona vaega, o puapuaga uma e le tumau. I feeseeseaiga sa tamua mai i se taua matautia, sa faamanatu mai ai ma le poto e le peresitene o le Iunaite Setete o Aperaamo Linikone lana ‘au maimoa o le poto faaanamua e faapea “o le a mavae atu foi, lenei mea.” 3
Pei ona outou silafia, o faigata o le olaga nei lea ou te tautala atu ai---lea e faigata ai ona lototetele---o nisi taimi e oo mai ia i tatou i tulaga masani ma le tele o isi, e pei o le faitau miliona o loo tauivi nei e ala i ni mau aafiaga faataumaoi o le faama’i oti o le KOVITI-19. E faapena foi, i le Iunaite Setete e faitau miliona o loo pagatia i se vaitau o le feitaga’i ma le fefinauai lea e foliga e o mai faatasi lava ma le palotaina o le peresitene peitai e sili atu ona ogaoga le taimi nei i lo le mea e mafai ona manatua e tatou le au matutua.
O se tulaga e patino, o loo tofu tauivi le tagata lava ia ma nisi o le mau faigata o le olaga nei, e pei o le mativa, faailoga lanu, gasegase, leai o ni galuega po o le le fiafia, o fanau faalogogatata, o faaipoipoga i’uvale po o le le faaipoipo foi, ma aafiaga o le agasala---a i tatou lava po o isi’.
Ae, i le taulotoaiga o nei mea uma, ua ia i tatou lena fautuaga faalelagi ina ia lototetele ma ia maua le olioli i mataupu faavae ma folafolaga o le talalelei ma fua o a tatou galuega. 4 Sa i ai pea lava lena fautuaga, mo perofeta ma i tatou uma lava. Ua tatou iloa lenei mea mai aafiaga o o tatou augatuaa ma le mea na tau atu e le Alii ia te i latou.
Manatua tulaga na i ai le Perofeta o Iosefa Samita: Tagai atu i ai i se vaaiga o faigata, o lona soifuaga o se olaga mativa, o sauaga, le fiafia, faanoanoaga faaleaiga, ma taualuga ai i le faamaturoina. A o ia mafatia i le faafalepuipuiina, sa mafatia lona toalua ma le fanau ma isi Au Paia i ni faigata matautia a o tutuliese atu i latou mai Misuri.
Ina ua aioi atu Iosefa mo se mapusaga, sa tali atu le Alii:
“Lo’u atalii e, ia filemu lou agaga; o lou tiga ma ou puapuaga o le a na o sina minute laitiiti;
“Ma ona oo lea, afai e te talitalia lelei, o le a faaeaina oe e le Atua i luga; o le a e manumalo i ou fili uma” (Mataupu Faavae ma Feagaiga 121:7–8).
O le fautuaga patino, ma le faavavau lea na fesoasoani i le Perofeta o Iosefa e tausisia ai lona uiga masani tausaafia ma le alofa ma le lotonuu i ona tagata. O uiga auaumama foi lava nei na faamalolosia ai taitai ma paionia o e sa mulimuli ai ma mafai foi ona faamalolosia ai outou.
Manatu i na uluai tagata o le au paia! Na tutuliese faafia mai lea mea i lea mea. Na iu ina latou feagai ma luitau o le faatutuina o o latou fale ma le Ekalesia i se vaomatua. 5 Ina ua mavae le lua tausaga talu ona taunuu le uluai vaega o paionia i le vanu o le Vaituloto Masima Tele, sa tauivi pea ia paionia e ola ai i lena vaega ilitata. Sa tau sopo mai lava le toatele o tagata o le au paia pe sa tauivi foi ia maua ia punaoa e mafai ai. Ae sa i ai pea i taitai ma le au paia le faamoemoe ma le lototetele.
E ui ina sa lei mautu le Au Paia i o latou fale fou, ae i le konafesi aoao ia Oketopa 1849, sa auina atu ai se vaega tele o faifeautalai i Scandinavia, Falani, Siamani, Italia, ma le Pasefika i Saute. 6 I se taimi sa ono mafai ona faapea ua faalotovaivaia i latou, ae sa mafai lava ona ausia e paionia ni mea maoae. Ma i le na o le tolu tausaga mulimuli ane, sa toe valaauina ai foi le isi 98 e amata ona faapotopoto ia Isaraelu ua faataapeapeina. Sa faamalamalama e se tasi o taitai o le Ekalesia e faapea o nei misiona “e masani lava, e le o ni misiona uumi; pe a ma se 3 i le 7 tausaga, o le umi lea o le a leai ai se alii mai lona aiga.” 7
Tuafafine, o loo popole le Au Peresitene Sili i o outou luitau. Matou te alolofa ma tatalo foi mo outou. O le taimi foi lea, e tele ina matou faafetai ai faapea o o tatou luitau faaletino---e ese mai mafuie, afi, lologa, ma afa---e tele lava ina itiiti ifo nai mea na feagai ma o tatou augatuaa.
I le taulotoaiga o faigata, o le faamautinoaga faalelagi faifai pea o le, “ia fiafia, ona o le a Ou taitaia outou i le ala.” O le malo ua ia outou ma o ona faamanuiaga ua ia outou, ma o ‘oa o le faavavau ua ia outou ia” (Mataupu Faavae ma Feagaiga 78:18). Pe faapefea ona tupu lenei mea? Na faapefea ona tupu i paionia? O le a faapefea ona tupu i tamaitai o le Atua i aso nei? E ala i lo tatou mulimuli i le taitaiga faaperofeta, “o le a le manumalo lava faitotoa o seoli ia i tatou,” na fetalai mai ai le Alii e ala i le faaaliga ia Aperila 1830. “Ioe,” na Ia fetalai, “… o le a tafieseina e le Alii le Atua le malosi o le pogisa mai o outou luma, ma luluina le lagi mo lo outou lelei, atoa ma le mamalu o lona suafa” (Mataupu Faavae ma Feagaiga 21:6). “Aua le matatau le lafu itiiti e; fai mea lelei; ia tuu le lalolagi ma seoli e aufaatasi faasaga mai ia te oulua, auā afai ua lua atiae i luga o la’u papa, e lē mafai ona latou manumalo” (Mataupu Faavae ma Feagaiga 6:34).
Faatasi ai ma folafolaga a le Alii, tatou te “sii ae ai [o tatou] loto ma olioli” (Mataupu Faavae ma Feagaiga 25:13), ma “se loto ma mata fiafia” (Mataupu Faavae ma Feagaiga 59:15), tatou te fetaomi atu ai i luma i le ala ofeagaiga. O le toatele o i tatou e le fetaiai ma ni faaiuga tetele naua, e pei o le tuua o o tatou fale ae o e faamautu i se laueleele e le iloa. O a tatou faaiuga e tele lava i aluga masani i aso faisoo o le olaga, ae pei ona ta’u mai e le Alii ia i tatou, “Aua le faavaivai i le faia o mea lelei ona o loo oulua faataatiaina le faavae o se galuega tele. Ma o mea iti e tutupu mai ai mea tetele” (Mataupu Faavae ma Feagaiga 64:33).
O loo i ai le mana e le faatuaoia i le aoaoga faavae o le talalelei toefuataiina a Iesu Keriso. O lo tatou faatuatua e le maluelue i lena aoaoga faavae e taialaina ai o tatou laasaga ma aumaia ai ia i tatou le olioli. Na te faamalamalamaina o tatou mafaufau ma aumaia ai le malosiaga ma le mautinoa ia tatou faatinoga. O lea taitaiga ma le faamalamalamaaga ma le mana o ni meaalofa folafolaina sa tatou maua mai lo tatou Tama Faalelagi. O le malamalama ma le mulimulitu’ia o lena aoaoga faavae i o tatou olaga, e aofia ai le meaalofa paia o le salamo, e mafai ai ona tatou lototetele a o tatou tausisia i tatou lava i luga o le ala agai atu i le taunuuga e faavavau---toefaatasia ma le faaeaga ma o tatou matua faalelagi.
“Atonu e te feagai ma luitau lofituina,” na aoao mai e Elder Richard G. Scott. “O nisi taimi e matua fita lava, e matua maumaututu, e te ono lagonaina ai ua i talaatu o lou gafatia e faafoe ai. Aua e te faafetaiaia le lalolagi na o oe. ‘Ia e faatuatua ia Ieova ma lou loto atoa; a e aua le faalagolago i lou lava atamai’ [Faataoto 3:5]. … Sa faamoemoe lava o le a faigata le olaga, ae le faapea ia e toilalo ai, ae ia mafai ai ona e manumalo e ala i le faatoilaloina.” 8
O vaega uma lava o le fuafuaga a le Atua le Tama ma Lona Alo, o Iesu Keriso, lea ou te molimau atu ai, a o o’u tatalo ia tatou pulunaunau atu pea i le taunuuga o lo tatou Tama Faalelagi, i le suafa o Iesu Keriso, amene.