Faaosoosoina, Tofotofoina, ma Faaiilaina
O le faamanuiaga aupito sili e oo mai pe a faamaonia lo tatou lava faamaoni ia tatou feagaiga i taimi o o tatou faaosoosoga o se suiga lea i o tatou natura.
O’u uso e ma tuafafine pele, ou te faafetai e lauga atu ia te outou i lenei aso. O lo’u faamoemoe o le tuuina atu o se faamalosiauga pe a ua foliga faigata ma lē mautonu le olaga. Mo nisi o outou, o lena taimi, o nei. Afai e leai, o le a oo mai lena taimi.
E lē o se vaaiga ua leai se faamoemoe. E mautinoa—ae e lelei—ona o le faamoemoega o le Atua i le Foafoaga o lenei lalolagi. O lena faamoemoega o le avatu i Ana fanau o le avanoa e tofotofo ai i latou lava pe mafai ma naunau e filifili le sa’o pe a faigata. I le faia ai, o le a suia o latou natura ma o le a latou avea atili e faapei o Ia. Na Ia silafia o le a manaomia ai se faatuatua lē malulue ia te Ia.
O le tele o mea ua ou iloa na maua mai i lo’u aiga. Ina ua pe a ma le valu o o’u tausaga, sa fai mai lo’u tina atamai ia te a’u ma lo’u uso e matou te vele vao ma ia i le togalaau o lo matou aiga i tuāfale. Ia, sa foliga faigofie lena galuega, ae sa matou nonofo i New Jersey. E tele ina timuga. Sa mamafa le palapala. Sa vave atu le ola o vao nai lo fualaau faisua.
Ou te manatua lo’u ita pe a motusi vao mai i o’u lima, na mau o latou a’a i le palapala. Sa lei pine ae mamao i luma lo’u tina ma lo’u uso ia la laina. O le malosi o lo’u taumafai, o le atili ai foi lea ona pa’u atu i tua.
“Faigata tele lenei mea!” Sa ou alaga atu ai.
Nai lo le alofa mai, sa ataata lo’u tina ma fai mai, “Oi, Hal, ioe e faigata. O le mea e tatau ai. O le olaga o se tofotofoga.”
Sa ou iloaina i lena lava taimi le moni o ana upu ma o le a faaauau pea ona moni i lo’u lumanai.
Sa manino mai i nai tausaga mulimuli ane le mafuaaga o le ataata alofa a Tinā ina ua ou faitau i le Tama Faalelagi ma Lona Alo Pele o fetalai mai i lo La’ua faamoemoega i le foafoaina o lenei lalolagi ma tuuina i fanau agaga le avanoa o le olaga faitino:
“Ma o le a tatou tofotofoina ai i latou, e vaai pe latou te faia mea uma o soo se mea e poloaiina ai i latou e le Alii lo latou Atua;
“Ma o i latou o e e tausia lo latou esetete muamua, o le a faaopoopoina i luga o i latou; ma o i latou o e e lē tausia lo latou esetete muamua o le a latou lē maua le mamalu i le malo e tasi faatasi ma i latou o e e tausia lo latou esetete muamua; ma o i latou o e e tausia lo latou esetete lona lua o le a faaopoopo i luga o o latou ulu le mamalu e faavavau ma faavavau lava.”1
Na ta taliaina lena valaaulia ina ia faaosoosoina ma tofotofoina o le a tatou filifili e tausi poloaiga a le Atua pe a tatou le toe i ai i le afioaga o lo tatou Tama Faalelagi.
E oo lava i se valaaulia alofa mai lo tatou Tama Faalelagi, na faatauanau e Lusifelo le tasi vaetolu o fanau agaga ina ia mulimuli ia te ia ma teena le fuafuaga a le Tama mo lo tatou tuputupu ae ma le fiafia e faavavau. O le fouvale o Satani, na tuliesea ai o ia ma ana ‘au. O lenei, ua ia taumafai e faaliliu ese le toatele na te mafaia mai le Atua i le aluga o lenei olaga faitino.
O i tatou o e na taliaina le fuafuaga sa tatou faia ona o lo tatou faatuatua ia Iesu Keriso, lea na ofo mai e avea ma o tatou Faaola ma Togiola. Masalo sa tatou talitonu i lena taimi faapea po o a lava o tatou vaivaiga faitino o le a i ai, ma po o a lava malosiaga leaga o le a faasagatau mai ia i tatou, o le a sili atu ona lofituina malosiaga o le lelei.
E silafia ma alolofa le Tama Faalelagi ma Iesu Keriso ia te oe. E finagalo i La’ua e te toe foi atu ia i La’ua ma avea faapei o i La’ua. O lou manuia o lo La’ua manuia lea. Na e lagona le faamautu mai o lena alofa e le Agaga Paia ina ua e faitau pe faaologo i upu nei: “Aua faauta, o la’u galuega ma lo’u mamalu lenei—ia aumaia le tino ola pea ma le ola faavavau o le tagata.”2
E i le Atua le mana e faafaigofie ai lo tatou ala. Na Ia fafagaina le fanauga a Isaraelu i le manai i la latou malaga i le nuu folafolaina. Sa faamaloloina e le Alii i Lana galuega faitino e mama’i, faatuina mai e ua oti, ma faafilemuina le sami. Ina ua Mavae Lona Toetu, sa Ia tatalaina “le falepuipui ia te i latou o e ua noanoatia.”3
Peitai, o le Perofeta o Iosefa Samita, o se tasi aupito maoae o Ana perofeta, na puapuagatia i le falepuipui ma sa aoaoina i le lesona lea ua tatou manuia uma mai ai ma manaomia i lo tatou tofotofoina pea o le faatuatua: “Ma afai e lafo oe i totonu o le lua, po o lima o e fasioti tagata, ma tuu mai le faaiuga o le oti i ou luga; afai e lafo oe i le loloto; afai e taupulepule galulolo o le sami e faasaga mai ia te oe; afai e avea matagi malolosi ma ou fili; afai e faapotopoto e le lagi le pogisa, ma aufaatasi elemene uma e pupuni le ala; ma i luga o mea uma, afai e tatala faamaga lautele mai e auvae lava o seoli le gutu ia te oe, ia e iloa, loʼu atalii e, o nei mea uma e te maua ai le poto masani, ma o le a avea mo ou lelei.”4
Atonu tou te mafaufau pe aisea e faataga ai e se Atua alofa ma mamana le faaosoosoina faaletino o i tatou ia matua faigata. Ona Na te silafia e tatau ona tatou tuputupu ae i le mama ma le malosi faaleagaga ia mafai ai ona nonofo i Lona afioaga i ni aiga e faavavau. Ina ia mafai ai lena mea, ua tuuina mai ia i tatou e le Tama Faalelagi se Faaola ma le mana e filifili ai mo i tatou lava e ala i le faatuatua e tausia Ana poloaiga ma ia salamo ma o mai ia te Ia.
O le fuafuaga o le fiafia a le Tama o loo i ai i lona taulotoaiga lo tatou avea atili e faapei o Lona Alo Pele, o Iesu Keriso. I mea uma lava, o le faataitaiga a le Faaola o lo tatou taiala aupito sili lea. Sa le’i tuusaunoa mai o Ia mai le tatau ona tofotofoina o Ia Lava. Sa Ia onosaia mo fanau uma a le Tama Faalelagi, ia totogiina le tau mo a tatou agasala uma. Sa Ia lagonaina le puapuagatia o i latou uma o e na fananau mai pe o le a fananau mai i la le tino.
Pe a e mafaufau po o le a le tele o le tiga e mafai ona e onosaia lelei, ia manatua o Ia. Sa Ia puapuagatia i mea o loo e puapuagatia ai ina ia Ona silafia le ala e siitia ai oe i luga. Atonu Na te le aveesea le avega, ae Na te avatua ia te oe le malosi, faamafanafanaga, ma le faamoemoe. Na te silafia le ala. Sa Na inuina le ipu oona. Sa Ia onosaia puapuaga mo tagata uma.
O loo faafaileleina ma faamafanafana oe e se Faaola alofa, o le e silafia le ala e fesoasoani ai ia te oe i soo se faaosoosoga lua te fetaia’i. Na aoao mai Alema:
“Ma o le a afio atu o ia, ma mafatia i tiga ma puapuaga ma faaosoosoga o ituaiga eseese uma; ma o le a oo ia te ia nei mea, ina ia mafai ona faataunuuina o le upu ua fai mai, o le a ia ave i ona luga tiga ma ma’i o ona tagata.
“Ma o le a ia ave i ona luga le oti, ina ia mafai ona ia tatalaina fusi o le oti ia ua noatia ai ona tagata; ma o le a ia ave i ona luga o latou vaivaiga, ina ia mafai ona faatumuina ona loto i le alofa mutimutivale, e tusa ai ma la le tino, ina ia mafai ona ia silafia e tusa ai ma la le tino, le ala e fesoasoani ai i ona tagata, e tusa ma o latou vaivaiga.”5
O se tasi o auala o le a Ia fesoasoani ai ia te oe o le valaaulia lea o oe ia manatua pea o Ia ma sau ia te Ia. Na Ia faamalosiau mai ia i tatou:
“Ia outou o mai ia te a’u, outou uma o e tigaina ma mafatia i avega, o a’u foi e malolo ai outou.
“Ia outou amoina la’u amo, ma ia outou faaa’oa’o ia te a’u, aua o a’u lē agamalu ma le loto maulalo, ona maua lea e outou o le malologa mo outou agaga.”6
O le ala e o mai ai ia te Ia o le taumamafa i Ana afioga, faatino le faatuatua e oo i le salamo, filifili e papatiso ma faamauina e Ana auauna faatagaina, ona tausia lea o au feagaiga ma le Atua. Na te auina mai le Agaga Paia e avea ma au soa, faamafanafana, ma taiala.
A o e ola agavaa ai mo le meaalofa o le Agaga Paia, e mafai ona taitai atu oe e le Alii i le saogalemu e tusa lava pe e te le iloaina le ala. Mo a’u, na Ia faaalia soo mai le laasaga e sosoo pe lua e fai. E seasea ona Ia tuuina mai se vaaiga i le lumanai mamao atu, ae e taiala e na vaaiga e le faia sooa mea ou te filifili e fai i aso taitasi.
Na faamalamalama mai e le Alii:
“E lē mafai ona outou vaaia i o outou mata faalenatura, i le taimi nei, le fuafuaga a lo outou Atua e faatatau i mea o le a oo mai pe a mavae le taimi nei, ma le mamalu e mulimuli mai … [i] puapuaga e tele.
“Aua a mavae puapuaga e tele ona oo mai lea o faamanuiaga.”7
O le faamanuiaga aupito sili e oo mai pe a faamaonia lo tatou lava faamaoni ia tatou feagaiga i taimi o o tatou faaosoosoga o se suiga lea i o tatou natura. O lo tatou filifili e tausia a tatou feagaiga, o le a mafai ai ona galue le mana o Iesu Keriso ma faamanuiaga o Lana Togiola ia i tatou. E mafai ona faamaluluina o tatou loto ia alofa atu, faamagalo, ma valaaulia isi e o mai i le Faaola. E faateleina lo tatou talitonuga i le Alii. E faaitiitia o tatou popolega.
O lenei, e oo lava i na faamanuiaga ia na folafola mai e ala i puapuaga, tatou te le sailia puapuaga. I le aafiaga faaletino, ua tele a tatou avanoa e faaosoosoina ai i tatou, ina ia pasia tofotofoga e avea atili ai faapei o le Faaola ma lo tatou Tama Faalelagi.
Ma le isi, e tatau ona tatou iloa puapuaga o isi ma taumafai e fesoasoani atu. O le a faigata tele lena mea aemaise pe afai o matua tofotofoina foi i tatou lava. Ae o le a tatou iloa pe a tatou siiina se avega a se isi, pe itiiti, o le a faamalolosia o tatou tua ma iloaina se malamalama i le pouliuli.
O lo tatou Alii o lo tatou Faataitaiga. I luga o le satauro i Kolokota, o le puapuaga ai i le tiga matuitui na semanu Na te maliu ai pe ana le o Ia o le Alo e Toatasi na Fanaua e le Atua, sa Ia silasila atu i Ana faaoosala ma fetalai atu i Lona Tama, “Ia e faamagaloina atu ia te i latou; aua ua latou le iloa le mea ua latou faia.”8 A o puapuaga ai mo tagata uma o e o le a soifua, sa Ia silasila atu, mai le satauro ia Ioane ma i Lona tina mafatia ma auauna atu ia te ia i lona tofotofoga:
“Ua silasila atu Iesu i lona tinā, ma le soo ua alofaina e ia, ua tutu mai, ona fetalai atu lea o ia i lona tinā, Sena e faauta, o lau tama!
“Ua faapea atu foi i lea soo, Faauta, o lou tinā! Talu foi lea itu aso ua ave o ia e lea soo i lona aiga.”9
O Ana faatinoga i lena aso sili ona paia, sa Ia ofo fua mai ai Lona soifua mo i tatou taitoatasi, ofoina mai le fesoasoani e le gata i lenei olaga ae o le olaga e faavavau i aso a sau.
Ua ou vaai i tagata o tulai ae i mea maualuluga maoae e tofotofoina ai le faatuatua i luitau faigata. E i ai faataitaiga i le Ekalesia atoa i aso nei. Ua faamaualaloina tagata e ala i faigata. O lo latou tumau ma taumafaiga faamaoni, latou te avea atili ai faapei o le Faaola ma lo tatou Tama Faalelagi.
Sa ou aoao se isi lesona mai lo’u tinā. A o teineitiiti, sa ia maua i le lipi ma sa toeitiiti maliu ai. Mulimuli ane sa maua i le fiva fai’ai. Sa maliu talavou lona tamā, ma sa fesoasoani lo’u tinā ma ona tuagane e tausi lo latou tinā.
I lona olaga atoa, sa ia lagona aafiaga o luitai o ma’i. I le 10 tausaga mulimuli o lona soifua, sa ia manaomia le tele o taotoga. Ae i na mea uma, sa faamaonia lona faamaoni i le Alii, e ui sa ma’i taoto i lona moega. Pau lava le ata sa i le puipui o lona potumoe o le ata o le Faaola. O ana upu mulimuli nei ia te a’u i luga o lona moega o loo talioti: “Hal, e foliga mai o le a e fulū. E ao ona e tausia oe lava.”
I lona falelauasiga, o le failauga mulimuli o Elder Spencer W. Kimball. I le mavae ai o sina upu e uiga i ona luitau ma lona faamaoni, sa ia taua le mea lenei: “Atonu o nisi o outou o mafaufau pe aisea na umi tele ai ma mafatia Mildred. O le a ou ta’u atua le mafuaaga. Ona sa finagalo le Alii ia faaiila atili o ia.”
Ou te faailoa atu lo’u agaga faafetai mo le toatele o tagata faamaoni o le Ekalesia a Iesu Keriso o e na tauaveina avega ma le faatuatua mausali ma o e na fesoasoani i isi e tauave a latou foi a o saili le Alii e faaiila atili i latou. Ou te faailoa atu foi lo’u alofa ma le faamemelo mo le au tausi soifua ma taitai i le lalolagi atoa o e na auauna atu i isi a o onosaia e o latou aiga sea faaiilaina.
Ou te molimau atu o i tatou o fanau a se Tama Faalelagi, e alofa ia i tatou. Ou te lagona le alofa o Peresitene Russell M. Nelson mo i tatou uma. O ia o le perofeta a le Alii i le lalolagi i le asō. Ou te molimau atu ai i le suafa paia o le Alii o Iesu Keriso, amene.