O Loo Maua le Tusitaulima Aoao i Mamanu Faatekinolosi.

O le faagasologa o le toe iloiloina o le Tusitaulima Aoao: Auauna atu i Le Ekalesia a Iesu Keriso o le Au Paia o Aso e Gata Ai o loo faaauau pea, faatasi ai ma faaliliuga o anomea filifilia i gagana tetele e 21, e le o toe mamao ona faamatuu atu lea.

O le tusitaulima fou sa lolomiina i le faaeletonika i le gagana Peretania ia Fepuari 2020, faatasi ai ma le faamatuuina atu o anomea sa toe iloiloina ia Mati ma Iulai. O le tulaga ua i ai, ua toe tusia ma lolomiina le 16 o mataupu e 38 o le tusi. O mataupu o totoe o le a toe iloiloina i masina a sau, e aofia ai faafouga e faaitiitia ai le uumi ma faafaigofie le tulaga o le faitauga.

I se taimi e lei mamao ai ona ma’ea le konafesi aoao ia Oketopa 2020, o le a amata ai ona lolomi i gagana e 21 (e faaopoopo i le faa-Peretania), ia le mataupu e 32, “Salamo ma Fono o le Avea ai ma Tagata Auai o le Ekalesia,” ma itutino o le vaega e 38.6, “O Aiaiga Faavae e Uiga i Mataupu o le Amio Mama” (ia e lagolagoina le mataupu e 32). O mataupu faaopoopo o loo faaliliuina ma saunia mo le lomiga i masina a sau, ma o le a iu lava ina maua anomea uma i gagana e 35.

E ui lava o loo maua le Tusitaulima i le uepisaite a le Ekalesia ma i le polokalama o le Gospel Library, o le aofia aupito taua mo le tusi o taitai o le Ekalesia. O le tusitaulima ua toefaafou ua faaleaogaina ai le Tusitaulima 1 (mo Peresitene o siteki ma epikopo) ma le Tusitaulima 2 (mo taitai uma) ma ua tuufaatasia ai faamatalaga uma o le tusitaulima i se lomiga e tasi.

O le auivi faatulagaina mo le tusitaulima fou, o le galuega o le faaolataga ma le faaeaga, lea e aofia ai vaega e fa o le taulaiga a o tatou o mai ia Keriso ma fesoasoani i le galuega a le Atua:

1. Ola i le talalelei a Iesu Keriso

2. Tausiaina o i latou e le tagolima

3. Valaauliaina o tagata uma ia talia le talalelei

4. Tuufaatasiaina o aiga mo le faavavau

O mataupu ua mamanuina e fesoasoani ai i taitai i le salafa o le lalolagi ia auauna atu ma le tausiga faaKeriso pe a faaaogaina ia polokalama eseese a le Ekalesia, aiaiga faavae, ma faiga faavae a le Ekalesia, ma pe a tatau ai, ia fetuunai i tulaga i le lotoifale.

O le lomiga i masini faaonaponei o le tusitaulima ua mafai ai ona faia faafouga ma toeiloiloga a o faatupulaia le Ekalesia ma pe a fetuunaia ia aiaiga faavae. O mataupu faavae o le fetuutuunai ma fetuunaiga o loo aofia i le tusitaulima, e fesoasoani i taitai ma tagata o le au paia e faaaoga ma le mataalia ia mataupu faavae ma polokalama a le Ekalesia i faapotopotoga o soo se tele, ma faiganuu eseese faavaomalo o le Au Paia.