Sa I Ai Mea ‘Ai
A o tatou saili ia saunia faaletino, e mafai ona tatou fetaiai ma tofotofoga o le olaga faatasi ai ma le mautinoa faateleina
A o lei oo ina tapu femalagaaiga ona o le faama’i oti o i ai nei, sa ou toe taliu mai se tofiga faavaomalo, ona o faafitauli o taimi faatulagaina, na afua ai ona le faaauauina la’u malaga i se Aso Sa. Sa maua so’u taimi i le va o malaga a vaalele e auai ai i se sauniga faamanatuga, lea sa mafai ai ona ou faasoaina se savali puupuu. Ina ua maea le sauniga, sa sau se tiakono naunau ia te au ma fesili mai pe ou te iloaina ia Peresitene Nelson, ma pe na ou maua se avanoa e lulu ai lona aao. Sa ou tali atu ou te iloa o ia, ma sa ou faatalofa ia te ia, ma o le avea ai o se tasi o le Au Epikopo Pulefaamalumalu, sa ou maua le avanoa e fono ai ma Peresitene Nelson ma ona fesoasoani mo ni nai taimi i vaiaso taitasi.
Ona saofai ifo lea o le tiakono talavou i luga o se nofoa, sisii a’e ona lima i luga, ma alaga, “O le aso silisili lenei i lo’u olaga!” Uso e ma tuafafine, atonu o le a ou le sisii a’ea o’u lima i luga ma alaga, ae ou te faafetai e faavavau mo se perofeta soifua ma mo le taitaiga ua tatou maua mai perofeta, tagatavaai, ma talifaaaliga, aemaise i taimi o faigata.
Mai le amataga o taimi, na saunia lava e le Alii le taitaiga mo Lona nuu e fesoasoani ai ia i latou e sauniuni, faaleagaga ma faaletino, mai mala Na te silafia o le a oo mai o se vaega o lenei aafiaga faaletino. O nei mala atonu e patino pe lautele foi i le natura, ae o le taitaiga a le Alii o le a maua ai le puipuiga ma le lagolago i le tulaga tatou te gauai atu i ai, galulue i ai, i Lana fautuaga. O loo i ai se faataitaiga matagofie i se tala mai le tusi o Kenese, lea tatou te aoao ai e uiga ia Iosefa i Aikupito ma lana faaliliuga musuia o le miti a Farao.
“Ma sa fai atu Iosefa ia Farao, … Ua faaali atu ai e le Atua ia Farao o le mea o le a na faia. …
“Faauta, o le a oo mai tausaga e fitu e matua tele ai le mau i le nuu uma o Aikupito:
“Ona muliai oo mai ai lea o tausaga oge e fitu, e galo ai le mau uma lava i le nuu o Aikupito.” 1
Sa faalogo Farao ia Iosefa ma, o le mea na lelei ai, sa tali atu i le mea sa faaali atu e le Atua ia te ia i se miti ma sa vave loa ona aga atu i le tapenaina mo mea o le a oo mai. Ua faamaumauina e tusitusiga paia:
“Ua pesi tele mai le fua o le fanua i tausaga mau e fitu.
“Ona ia faaputuina ai lea o mea e ‘ai uma i tausaga e fitu. …
“Ma faaputuina e Iosefa pei o le oneone i le sami, … ua iu ina tuua o le faitau, aua ua le masino lava.” 2
O le taimi lava na mavae atu ai tausaga mau e fitu, ua ta’ua mai, “ona amata ai lea ona oo mai o tausaga e fitu o le oge, faapei ona fai atu ai e Iosefa: ua i ai foi le oge i nuu uma; a o le nuu uma o Aikupito sa i ai mea e ‘ai.” 3
O le taimi nei, ua faamanuiaina i tatou e ta’ita’ia e perofeta o e ua malamalama i mea tatou te manaomia e sauniuni ai mo mala “o le a oo mai” 4 faaletino ma le faaleagaga, faapea foi ona silafia tapulaa po o tapu tatou te ono fetaia’i a o tauivi e mulimuli i a latou fautuaga.
O loo i ai se malamalama manino e faapea o aafiaga o le KOVITI-19, faapea foi mala faataumaoi faanatura, e le faailoga tagata, e laasia tuaoi o ituaiga faavaega, faaleagafesootai, ma faalelotu i konetineta uma. Ua leai ni galuega ma ua faaitiitia tupe maua aua ua aafia avanoa e faigaluega ai ina ua vaea, ma ua aafia le gafatia e faigaluega ai ona o luitau o le soifua maloloina ma faaletulafono.
Ia i latou uma ua aafia, matou te malamalama ma popo’e foi i o outou tulaga, faapea foi ma se talitonuga maumaututu o i luma aso e sili atu ona lelei. Ua faamanuiaina outou i epikopo ma peresitene o paranesi o e o loo sailia ma lagolagoina tagata o a latou aulotu i manaoga faaletino, o e foi e mafai ona maua meafaigaluega ma punaoa e mafai ona fesoasoani ai ia te outou e toe atia’e o outou olaga ma nofoaga i luga o le ala o le ola tutoatasi pe a outou faaaogaina mataupu faavae o le sauniuni.
I le siosiomaga o le taimi nei, faatasi ai ma se faama’i oti ua faataumaoia ai le tamaoaiga uma ma olaga o tagata, o le a le ogatasi ma se Faaola agaalofa le faatuatuana’i i le mea moni faapea e toatele o loo tauivi, ma talosagaina i latou ia amata nei loa ona faaputuputu meaai ma tupe faaleoleo. Peitai, e le faapea ai ua tatau ona tatou faatuatuana’i tumau i mataupu faavae o le sauniuniga—vagana o nei mataupu faavae e tatau ona faaaoga “i le poto ma le faatulaga lelei,” 5 ina ia mafai ai ona tatou faapea atu, e faapei o la Iosefa i Aikupito, “sa i ai mea ‘ai.” 6
E le o faamoemoe mai le Alii tatou te faia e sili atu nai lo mea tatou te mafaia, ae o loo faamoemoe mai o Ia e fai le mea e mafai ona tatou fai … pe a mafai ona tatou faia. E pei ona faamanatu mai e Peresitene Nelson ia i tatou i le konafesi aoao talu ai “E fiafia le Alii i taumafaiga.” 7
Sa tele ina uunaia e taitai o le Ekalesia ia Au Paia o Aso e Gata Ai “ia saunia mo faigata o le olaga e ala i le i ai o se sapalai masani o meaai ma vai ma sina tupe e teuina.” 8 O le taimi lava foi lea, ua uunaia ai i tatou ina “ia atamamai” ma “aua le soona faia” 9 i a tatou taumafaiga e amata ona teu se sapalai ma se tupe faaleoleo. E i ai se punaoa ua faaigoaina O Mea Tautupe Patino mo le Ola-Tutoatasi, na lomia i le 2017 ma o loo maua nei i le uepisaite a le Ekalesia i gagana e 36, e amata i se savali mai le Au Peresitene Sili, e faapea:
“Ua tautino mai e le Alii, ‘O lo’u faaamoemoe o le faia lea o mea mo la’u au paia’ [Mataupu Faavae ma Feagaiga 104:15]. O lenei faaaliga o se folafolaga mai le Alii faapea o le a Ia saunia faamanuiaga faaletino ma tatalaina faitotoa o le ola tutoatasi. …
“… O le taliaina ma ola ai i nei mataupu faavae o le a mafai ai ona e maua faamanuiaga faaletino na folafola mai e le Alii.
“Matou te valaaulia oe ina ia suesue ma le filiga ma faaaoga nei mataupu faavae ma aoao atu i tagata o lou aiga. A o e faia, o le a faamanuiaina lou olaga … [aua] … o oe o se atalii/afafine o lo tatou Tama o i le Lagi. E alofa o Ia ia te oe ma o le a le tuulafoaia lava oe. Na te silafia oe ma ua sauni e tuuina atu ia te oe faamanuiaga faaleagaga ma faaletino o le ola tutoatasi.” 10
O lenei punaoa e aofia ai mataupu ua tuuto atu i le amataina ma le ola e tusa ai ma se paketi, puipuia lou aiga mai faigata, pulea mala tautupe, ma teu tupe mo le lumanai, ma e avanoa mo tagata uma i luga o le uepisaite a le Ekalesia pe ala atu foi i o outou taitai i le lotoifale.
Pe a oo ina mafaufau i le mataupu faavae o le saunia, e mafai ona tatou toe tepa i tua ia Iosefa i Aikupito mo se musumusuga. O le iloa ai o le mea o le a tupu semanu e le lava lena latou te ola ai i tausaga o le “oge” e aunoa ma se fuataga o osigataulaga i le taimi o tausaga mau. Nai lo le faaaogaina uma o mea sa mafai ona maua e le nuu o Farao, sa faavaeina tapulaa, ma mulimuli ai, ma saunia mea ia lava e le gata i o latou manaoga i lea taimi ae faapea foi le lumanai. Sa lei lava le na ona iloa o le a oo mai taimi faigata. Sa tatau ona latou galulue ma, ona o a latou taumafaiga, “sa i ai mea ‘ai.” 11
O lenei mea e tau atu ai i se fesili taua: “O le a nei la se mea a fai? O se vaega lelei lava e amata ai o le malamalama lea o mea uma e faaleagaga i le Alii, “ma e leai se taimi” na Ia tuuina mai ai ia i tatou “se tulafono e faaletino.” 12 O mea uma lava la, e faasino atu ia Iesu Keriso, o le faavae e tatau ona tatou fausia ai, e oo lava i a tatou sauniuniga faaletino.
O le saunia faaletino ma le ola tutoatasi o lona uiga “o le talitonu e ala i le alofa tunoa, po o le mana gafatia, o Iesu Keriso ma lo tatou lava taumafaiga, e mafai ona tatou maua mea uma e manaomia faaleagaga ma faaletino o le olaga tatou te mananao ai mo i tatou lava ma o tatou aiga.” 13
O itu faaopoopo o se faavae faaleagaga mo le saunia faaletino e aofia ai le faatino “i le poto ma le faatulaga lelei,” 14 lea e fautuaina ai se atiina a’e faifai malie o le teuina o meaai ma tupe teu, e mavae se taimi, ma i le ola ai i mea tatou te maua, ma le lona lua, o le taliaina “o mea laiti ma faatauvaa”, 15 o le faapupulaga lea o le faatuatua faapea o le a faateleina e le Alii a tatou taumafaiga laiti ma le fai pea e le aunoa.
Faatasi ai ma se faavae faaleagaga ua mautu, ua mafai ai loa ona tatou faaaogaina ma le manuia ia elemene taua e lua o le saunia faaletino—puleaina mea tautupe ma le teuina o mea e tatau ai i le fale.
O mataupu faavae autu e pulea lelei ai mea tautupe e aofia ai le totogiina o sefuluai ma taulaga, faaitiitia ma aloese mai le aitalafu, saunia ma ola e tusa ai ma se paketi, ma le sefe mo le lumanai.
O mataupu faavae autu o le teuina o mea e tatau ai i le fale e aofia ai le teuina o meaai, teuina o vai, faapea foi ma isi mea e tatau ai, e faalagolago i mea e manaomia e le tagata ma le aiga, o nei mea uma ona “o le faleteuoloa aupito sili” 16 o le fale, lea e avea ma “faaleoleo sili e mafai ona maua i taimi e manaomia ai.” 17
A tatou taliaina mataupu faavae faaleagaga ma sailia musumusuga mai le Alii pe o le a le ala sili e faaaoga ai mataupu faavae o le saunia faaletino i o tatou tulaga taitoatasi ma faaleaiga, o le a taialaina i tatou ia iloa le mea o faamoemoeina e le Alii ma le ala e fai ai. O le laasaga sili ona taua o mea uma o le amata.
Na aoao mai e Elder Bednar lenei mataupu faavae ina ua ia saunoa, “O le faia o se faatinoga o le faaalia lea o le faatuatua. … O le faatuatua moni e taulai atu i le Alii o Iesu Keriso ma e tau atu e le aunoa i faatinoga amiotonu.” 18
Uso e ma tuafafine, i se lalolagi o le a suia pea lava pea, ua tatau ona tatou tapenapena mo mea e le o mautinoa. E oo lava i aso e sili atu ona lelei o i luma, tatou te iloa o le a faaauau pea taimi lelei ma taimi faigata o le olaga faaletino. A o tatou saili ia saunia faaletino, e mafai ona tatou fetaiai ma tofotofoga o le olaga faatasi ai ma le mautinoa faateleina, filemu i o tatou loto ma, faapei o Iosefa i Aikupito, o le a mafai ona faapea atu, “Sa i ai mea ‘ai.” 19 I le suafa o Iesu Keriso, amene.