O Le Soofaatasi o Lagona Tatou Te Maua Ai le Mana Mai le Atua
A o tatou saili ia soofaatasi ia lagona, o le a tatou aumaia le mana o le Atua e faaatoatoa atili ai a tatou taumafaiga.
Na ta’u atu e le tina o Koki ia te ia, afai e maea ana feau, o le a ia faia se pai mo ia. O le ituaiga e fiafia tele i ai. Na o ia lava. Sa galue Koki ia uma ana feau, ma sa amata lola e le tina le pai. Sa o mai lona tuafafine matua o Kathy ma sana uo i le fale. Sa ia iloa atu le pai ma fesili pe mafai ona ave se fasi pai ma lana uo.
“Leai,” sa fai atu ai Koki, “o la’u pai. Na fai e Mama mo a’u, ma sa ou galue i ai.”
Sa sa’i Kathy i lona tuagane laitiiti. Oka se manatu faapito ma le ‘ai’u. E faapefea ona ia ‘aia uma?
Na mavae ni itula, ina ua tatala e Kathy le faitotoa o le taavale e momoli lana uo i le fale, sa i luga o nofoa o le taavale ni solopepa ua gaugau faalelei, o tui e lua i luga, ma ni fasi pai tetele se lua i luga o ipu. Sa faamatala e Kathy lenei tala i le maliu o Koki e faaalia ai lona naunautaiga e suia ma faaalia le agalelei ia i latou sa le’i tatau ai.
I le 1842, sa galulue malosi ai le Au Paia e fau le Malumalu o Navu. Ina ua uma ona faavae le Aualofa ia Mati, sa tele ina sau le Perofeta o Iosefa Samita ia latou fonotaga e sauniuni ai i latou mo feagaiga paia, soofaatasi e le o toe mamao ona latou osia lea i le malumalu.
I le aso 9 o Iuni, sa “saunoa le Perofeta o le a ia talai atu le alofa mutimutivale[.] Faapea ua le fiafia Iesu Keriso ma agelu ia i tatou i mea iti ma le faatauvaa, mata o le a le mea o le a tupu ia i tatou? E tatau ona tatou alofa mutimutivale ma faagalo i mea iti.” Na faaauau Peresitene Samita, “O se mea ou te faanoanoa ai o le leai o se lagona tele o le lotogatasi---afai e mafatia se tagata e toatasi e lagona e tagata uma---o le soofaatasi o lagona tatou te maua ai le mana o le Atua.” 1
O lena fuaiupu itiiti na taia ai a’u e pei o se uila. O le soofaatasi o lagona tatou te maua ai le mana o le Atua O lenei lalolagi e le o le mea lea ou te manao ai. E tele mea ou te manao e tosina ma faaleleia atili. Ma o le mea moni, e tele naua mea faafeagai i mea ou te faamoemoe i ai, ma o nisi taimi ou te lagona ai le leai o se malosi. Talu ai nei, sa ou faia ai ni fesili vailiili: E mafai faapefea ona ou malamalama lelei i tagata o siomia ai au? E faapefea ona ou fatuina lena “soofaatasi o lagona” ae e matuai eseese mea uma? O le a se mana mai le Atua e mafai ona ou maua pe afai e soofaatasi teisi lava ma isi? Mai la’u iloiloga loloto, sa ou maua ai ni fautuaga se tolu. Atonu o le a fesoasoani foi ia te oe.
Ia E Alofa Mutimutivale
E faitauina leIakopo 2:17 “Ia outou manatu i o outou uso e pei o outou lava, ma faamasani ma i latou uma ma lima matala atu ia te i latou ia outou mea, ina ia latou mauoa e pei o outou.” Tatou suia le upu anonea i le alofamutimutivale—ta’usaoloto atu lou alofamutimutivale ina latou mauoa ai e faapei o outou.
E tele taimi tatou te mafaufau ai i anomea e pei o meaai po o tupe, ae atonu o le mea tatou te manaomia uma o la tatou auaunaga i le alofamutimutivale.
Na fai mai talu ai nei lo’u lava peresitene o le Aualofa: “O le mea ou te … folafola atu … ia te oe e faapea, o le a ou tausisia le saogalemu o lou igoa. … O le a ou vaai ia te oe i lou lava faasinomaga i le mea aupito sili. … O le a ou le tautala lava i se mea e uiga ia te oe e le agalelei, se mea o le a le siitia ai oe. Ou te ole atu ia te oe ia e faia foi le mea e tasi mo a’u o le mea moni, ou te fefe, ne’i e le fiafia.”
Na ta’u atu e Iosefa Samita i tamaitai i lena aso o Iuni i le 1842:
“A faaali mai e tagata le leai o se agalelei ma se alofa ia te a’u, Oka se mamafa o lena mea i lo’u mafaufau. …
“… O le latalata lava o lo tatou o atu i lo tatou Tama Faalelagi, o le tele foi lea o lo tatou mafuli atu e vaavaai ma le agalelei i agaga ua fano---[tatou te lagona lo tatou mananao] e fafa i latou i o tatou tauau, ma tiai a latou agasala i o tatou tua. [O loo faamoemoe la’u lauga mo] le Sosaiete lenei---afai tou te mananao ia alofamutimutivale le Atua ia te outou, ia alofamutimutivale le tasi i le isi.” 2
O lenei fautuaga na patino i le Aualofa. Aua tatou te fefaamasinoa’i pe fai se upu faatiga. Ia tatou tausisia le saogalemu o igoa o isi ma avatu i ai le meaalofa o le alofamutimutivale. 3
Fai lou Vaa Ia Se’e le Aloga
I le 1936, sa i ai se ‘au vaaalo e le iloga mai le Iunivesite o Uosigitone sa malaga i Siamani e auai i Taaloga a le Olimipeka. O le taimi o le ogaoga o le Pau Tele o le Tamaoaiga. O taulelea faigaluega leipa ia na ofo atu e nai maina laiti ma nai ililaupapa i le taulaga nai fasitupe ia mafai ai ona latou malaga i Perelini. O itu uma o le tauvaga na foliga mai e leai so latou avanoa e manumalo ai, peitai sa i ai se mea na tupu i le tuuga. I le lalolagi o le ‘au alo, latou te faaigoa o le “alo gatusa.” Faalogo i le faamatalaga lenei e tusa ma le tusi O Tama i le Va’a:
E i ai se mea o nisi taimi e tupu ai, lea e faigata ona ausia ma faigata ona faamatala. E ta’ua o le “alo gatusa.” Pau le taimi e tupu ai pe a alo tagata uma i le gatusa atoatoa ma e leai se taga e le fetaui.
E tatau i le ‘au alo ona pulea lo latou tutoatasi ‘ina’inā ma i lea lava foi taimi ia faamaoni i o latou gafatia taitasi. E le manumalo ni tuuga ona e tusapau tagata uma. O auvaa lelei e i ai ni paluga lelei---o se tasi e taitaia, o se tasi e faaleoleo, o se tasi e tauina le taua, o se tasi e tausisia le filemu. E leai se tagata alo e sili atu le taua i se isi, o i latou uma o taua i le vaa, ae afai e tatau ona latou alo lelei faatasi, e tatau ona fetuunai tagata taitasi i manaoga ma gafatia o isi---o le tagata e pupuu lima e aapa teisi i luma, o le tagata e uumi lima e falo teisi i tua.
E mafai ona liliu ia eseesega i se itu lelei nai lo le le lelei. O le taimi foi lea e pei ai o la ua se’e le vaa lava ia. Ua na o le pau foi lea o le taimi e faaavanoa atoa ai e le tiga le ala i le fiafia. O le “alo gatusa” lelei e pei o se solo. 4
E ui i maagao ogaoga, ae sa maua e lenei ‘au le alogatusa atoatoa, ma manumalo ai. O le pine auro o le Olimipeka sa lauiloa, ae o le lotogatasi na oo i ai le ‘au alo taitasi i lena aso, o se taimi paia na latou manatua pea i o latou olaga uma.
Ia Vave ona Aveese Lala Leaga A o Tutupu Ae Lala Lelei
I le faataoto matagofie i le Iakopo 5, sa totoina ai e le Alii o le tovine se laau lelei i se eleele lelei, ae na faaleagaina i le mavae ai o se taimi ma fua mai ai ni fua e le lelei. E faavalu ona fetalai le Alii o le tovine: “Ou te faanoanoa [i] ma’umau lenei laau.”
Fai mai le auauna i le Alii o le tovine: “Ia faasaosao pea mo sina taimi umiumi atu. Ma sa fetalai atu le Alii: Ioe, o le a ou faasaosaoina mo sina taimi umiumi atu.” 5
Ona oo mai ai lea o le faatonuga e mafai ona faatatau ia i tatou uma o taumafai e eli faataamilo ma maua ai fua lelei i o latou lava tovine iti: Ia outou aveese lala leaga e tusa ma le tutupu a’e o lala lelei.” 6
E le tupu faafuasei le lotogatasi; e manaomia le galue i ai. E lavelave, o nisi taimi e le logolelei, ma e faifai malie ona tupu pe a tatou aveese lala leaga i le vave e mafai ai ona tutupu a’e lala lelei.
E le tuulafoaiina lava i tatou ia tatou taumafaiga e atina’e le lotogatasi. Ua faaauau pea leIakopo 5 “Ma ua oo ina o atu auauna ma ua latou galulue i lo latou malosi; na galue foi le Alii o le tovine faatasi ma i latou” 7
O le a tofu oo i tatou taitasi i ni aafiaga e loloto manu’a, o mea e le tatau ona tupu. O le a tofu foi i tatou, i taimi eseese, ona faatagaina le faamaualuga ma le faasausili e faaleagaina le fua tatou te maua. Peitai, o Iesu Keriso o lo tatou Faaola i mea uma. O Lona mana e oo ifo i le ta’ele ma e i ai pea lava iina mo i tatou pe a tatou valaau atu ia te Ia. Tatou te aioi uma atu mo le alofamutimutivale mo a tatou agasala ma toilalo. Na te foa’i fua mai. Ma ua talosaga mai o Ia ia i tatou pe mafai ona tatou tuuina atu lena lava alofa mutimutivale ma le malamalama i le tasi ma le isi.
Na tuusa’o mai e Iesu: “ia tasi outou; ma afai tou te lē tasi e lē a aʼu outou.” 8 Peitai afai e tasi i tatou---afai e mafai ona tatou faatotoe se fasi pai o a tatou pai pe faafetaui a tatou taleni taitoatasi ina ia mafai ai ona se’e le vaa i le alo gatusa atoatoa---ona avea lea o i tatou ma Ana. Ma o le a fesoasoani o Ia e aveesea lala leaga i le vave e mafai ai a’o tututupu ae lala lelei.
Folafolaga Faaperofeta
Atonu tatou te lei oo lava i le mea tatou te mananao ia i ai, ma e tatou te lei i ai i le mea e tatau ona tatou i ai. Ou te talitonu o le suiga o loo tatou sailia i o tatou lava tagata, ma i vaega e o tatou, o le a faaitiitia e ala i faiga faaupufai faalauiloa ae faateleina e ala i le taumafai moni i aso uma ia malamalama le tasi i le isi. Aisea? Aua o loo tatou fauina Siona---o se nuu e “tasi o latou loto ma tasi le mafaufau.” 9
I le avea ai o ni tamaitai o le feagaiga, e tele na’ua la tatou tosinaga. O lena tosinaga e faaaoga i nai taimi i aso uma pe a tatou suesue faatasi ma se uo, faamoemoe le fanau, talanoa i se tasi lua te nonofo i luga o le pasi, saunia se tolaulauga ma se paaga. Ua ia te i tatou le mana e aveesea ai le faamaualuga ae fausia le lotogatasi.
O le Aualofa ma Tamaitai Talavou ua le na o ni vasega. E mafai foi ona avea o ni aafiaga e le mafaagaloina i le mea e feosofi ai tamaitai eseese i le vaa e tasi ma alo seia oo ina tatou iloa ua alo gatusa. Ou te ofoina atu lenei valaaulia: ia avea oe o se malosiaga tuufaatasia e suia ai le lalolagi mo le lelei. O la tatou galuega tofi faalefeagaiga o le auauna atu, ia sii ae i luga lima ua tautau, ia tuu tagata o loo tautevateva i o tatou papatua ma fafa po o tatou lima ma afisi. E le faigata ona iloa le mea e fai, ae e tele taimi e le tusa ai ma mea tatou te fiafia i ai ma le manatu faapito ma e tatau ona tatou taumafai. Ua i ai i tamaitai o lenei Ekalesia le gafatia le faatuaoia e suia ai tagata. Ua ia te a’u se talitonuga mautinoa atoa e faapea, a o tatou saili ia soofaatasi ia lagona, o le a tatou aumaia le mana o le Atua e faaatoatoa atili ai a tatou taumafaiga.
Ina ua faamanatu e le Ekalesia le faaaliga i le 1978 e uiga i le perisitua, sa tuuina mai e Peresitene Russell M. Nelson se faamanuiaga mamana faaperofeta: “O la’u tatalo ma le faamanuiaga ou te tuua i luga o i latou uma o e o faafofoga mai, ina ia mafai ona latou faatoilaloina soo se avega o le faailoga tagata ae savavali ma le amiosa’o faatasi ma le Atua—faapea le tasi ma le isi—i le lotogatasi ma le filemu atoatoa.” 10
Se’i o tatou utuvai mai lenei faamanuiaga faaperofeta ma faaaoga a tatou taumafaiga taitasi ma tuufaatasi e faateleina ai le lotogatasi i le lalolagi. Ou te tuu atu la’u molimau i upu o le tatalo faamaulalo e faavavau a le Alii o Iesu Keriso: “Ina ia tasi i latou uma; faapei o oe le Tama o i totonu ia te a’u, o a’u foi o i totonu ia te oe, ina ia tasi i latou i totonu ia te i ta’ua.” 11 I le suafa o Iesu Keriso, amene.