O Le Aganuu a Keriso
E mafai ona tatou faapelepele i o tatou aganuu sili taitasi faalelalolagi ma avea pea ma tagata auai atoatoa i le aganuu e faavavau lea e sau mai le talalelei a Iesu Keriso.
Oka se matagofie o le lalolagi o tatou ola ma fefaasoaai ai, o se aiga i le toatele o tagata eseese, gagana, aganuu, ma talafaasolopito—o loo salalau atu i le fia selau o atunuu ma le fia afe o vaega, e mauoa taitasi i le aganuu. E tele mea e mitamita ai ma faamanatuina e tagata soifua. Peitai e ui o se amio e aoaoina—o mea na e faaali mai ia i tatou e aganuu o tatou ola ae ai—e mafai ona avea o se malosiaga sili i o tatou olaga, e mafai foi, i nisi taimi, ona avea o se faalavefau tele.
Atonu e foliga mai ua matua taua le aganuu i o tatou mafaufau ma amio ua le mafai ai ona suia. Aua, o le tele lava o mea tatou te lagona e faamatalaina i tatou ma tatou te lagona ai se lagona o le faasinomaga. E mafai ona avea ma se faatosinaga malosi lea e mafai ona tatou le vaai atu ai i vaivaiga po o faaletonu faaletagata i o tatou lava aganuu, ma mafua ai ona mumusu e lafoai nisi o tu masani a o tatou tama. O le soona naunau i le faasinomaga faaleaganuu a se tasi e ono taitai atu ai i le teena o ni manatu aogā—e oo lava i le faaleatua—uiga mama, ma le amio.
Sa ou iloa se tamalii lelei, e lei leva tele atu, lea na fesoasoani e faailoa lenei mataupu faavae faavaomalo o le le malamalama i le aganuu. Sa ou feiloai muamua ia te ia i Sigapoa ina ua tofia a’u e avea ma faiaoga asiasi i lona aiga. O se polofesa iloga o le gagana Sanskrit ma Tamil, e sau o ia mai saute o Initia. O lona toalua lelei ma lana fanau tama e toalua o ni tagata o le Ekalesia, ae na te le’i auai lava i le Ekalesia pe faalogo tele i aoaoga o le talalelei. Sa ia fiafia i le ala na atiae ai lona toalua ma lana fanau tama ma lagolagoina atoatoa i latou ia latou galuega ma tiute faale-Ekalesia.
Ina ua ou ofo atu e aoao o ia i mataupu faavae o le talalelei ma faasoa a tatou talitonuga ia te ia, na ia muai teenaina. Na umi se taimi na ou taumafai ai ia iloa pe aisea: sa ia lagona faapea o lona faia o le a ia faalataina ai lona taimi ua tuanai, ona tagata, ma lona talafaasolopito! I lona mafaufau, o le a ia teenaina mea uma o avea ai o ia, mea uma na aoao ai o ia e lona aiga ia avea ai, lana talatuu faaInitia. I le aluga o masina na sosoo ai, na mafai ona matou talanoa e uiga i nei mataupu. Sa ou maofa (e le o le faateia) i le ala na mafai ai e le talalelei a Iesu Keriso ona tatala ona mata i se isi vaaiga.
I le tele o aganuu ua faia e tagata e maua uma ai le lelei ma le leaga, aogā ma faatama’ia.
O le tele o faafitauli a lo tatou lalolagi o se taunuuga tuusa’o lea o feeseeseaiga i le va o i latou e eseese manatu ma tu ma aga e mafua mai o latou aganuu. Peitai toetoe lava o feeseeseaiga uma ma vevesiga e vave ona mouese atu pe ana talia e le lalolagi ona aganuu autu, lea na tatou umiaina i se taimi e lei mamao tele atu. O lenei aganuu e oo i tua atu i lo tatou muai olaga. O le aganuu a Atamu ma Enoka. O le aganuu na faavaeina i luga o aoaoga a le Faaola i le ogatotonu o taimi, ma ua toe avanoa mo tamaitai ma alii uma i o tatou aso. E tulaga ese. E silisili i aganuu uma ma e sau mai le fuafuaga sili o le fiafia, na tusia e le Atua ma lagolagoina e Keriso. E tuufaatasia nai lo le fevaevaeai. E faamaloloina nai lo le lamatia.
Ua aoao i tatou e le talalelei a Iesu Keriso e i ai se faamoemoega i le olaga. O lo tatou i ai iinei e le nao se mea faafuaveta po o se mea sese! Ua tatou i ai iinei mo se mafuaaga.
O lenei aganuu ua faavaeina i le molimau faapea o loo soifua lo tatou Tama Faalelagi, e moni o Ia ma e alofa ia i tatou taitoatasi. O i tatou o Lana “galuega ma [Lona] mamalu.” 1 E lagolagoina lea mataupu o le taua tutusa. E leai se faailoaga o tulaga po o vasega. E moni, o i tatou uma lava o uso ma tuafafine, fanau agaga a o tatou matua faalelagi. E leai se faailogalanu po o le faapea ifo “o i matou e faasaga ia i latou” i aganuu e sili atu i aganuu uma. O i tatou uma o “matou.” O i tatou uma o “latou.” Tatou te talitonu tatou te tali atu mo i tatou lava, isi, le Ekalesia, ma lo tatou lalolagi. O tiutetauave ma le tali atu o ni vaega taua i lo tatou tuputupu ae.
O le alofa moni, alofa moni faaKeriso, o le faavae lea o lenei aganuu. Tatou te lagona le popole moni mo manaoga a o tatou uso a tagata, faaletino ma faaleagaga, ma galue i na lagona. E aveesea ai le faailogalanu ma le feitagai.
Tatou te fiafia i se aganuu o faaaliga, e taulai atu i le afioga a le Atua e pei ona mauaina e perofeta (ma faamaonia patino mai ia i tatou taitoatasi e ala mai le Agaga Paia). E mafai e tagata soifua uma ona iloa le finagalo ma le mafaufau o le Atua.
E lagolagoina e lenei aganuu le mataupu faavae o le faitalia. O le tomai e filifili ai e matuā taua mo lo tatou atinaega ma lo tatou fiafia. O le filifili ma le atamai e taua.
O se aganuu o le aoaoina ma le suesue. Tatou te saili le malamalama ma le poto ma le mea sili i mea uma lava.
O se aganuu o le faatuatua ma le usiusitai. O le faatuatua ia Iesu Keriso o le muai mataupu faavae o lo tatou aganuu ma o le usiusitai i Ana aoaoga ma poloaiga o le taunuuga lea. O mea nei e mafua ai le loto-pulea.
O se aganuu o le tatalo. Tatou te talitonu e le gata o le a lagona e le Atua i tatou, ae o le a fesoasoani foi ia i tatou.
O se aganuu o feagaiga ma sauniga, tulaga faatonuina lelei maualuluga, taulaga, faamagaloga ma le salamo, ma le tausia o le malumalu o o tatou tino. E molimau e nei mea uma lo tatou tuuto atu i le Atua.
O se aganuu e pulea e le perisitua, o le pule e galue ai i le suafa o le Atua, o le mana o le Atua e faamanuia ai Ana fanau. E aoao ai ma mafai ai e tagata ona avea ma tagata taitoatasi, taitai, tinā, tamā, ma soa lelei—ma e faapaiaina ai le aiga.
E tele vavega moni e i totonu o lenei mea, o le aganuu sili ona matua, na mamanuina mai le faatuatua ia Iesu Keriso, le mana o le perisitua, tatalo, faaleleiga patino, liua moni, ma le faamagaloga.
O se aganuu o le galuega faafaifeautalai. Ua tele lava le taua o agaga.
I le aganuu a Keriso, e siitia tamaitai i lo latou tulaga tatau ai ma faavavau. Latou te le maualalo ifo i alii, e pei o le tele o aganuu i le lalolagi i nei taimi, ae o ni paaga atoatoa ma tutusa iinei ma i le lalolagi a sau.
E faamaonia e lenei aganuu le paia o le aiga. O le aiga o le iunite faavae lea o le faavavau. O le faaatoatoaga o le aiga e tauia ai soo se ositaulaga ona, e pei ona aoaoina, “e leai se isi tulaga manuia po o se manumalo e mafai ona suia ai le toilalo i totonu o le aiga.” 2 O le aiga o le nofoaga lea e faia ai a tatou galuega sili ona lelei ma maua ai lo tatou fiafiaga sili.
I le aganuu a Keriso e i ai se vaaiga faapitoa—ma se taulaiga ma le taitaiga faavavau. O lenei aganuu e popole i mea e faavavau le taua! E sau mai le talalelei a Iesu Keriso, lea e faavavau, ma e faamatalaina le mafuaaga, o le a ma le o fea o lo tatou i ai iinei. (E faaaofia, ae le faatapulaaina.) Talu ai o lenei aganuu na mafua mai i le faaaogaina o aoaoga a lo tatou Faaola, e fesoasoani e saunia se lima faamalolo lea ua matua manaomia ai e lo tatou lalolagi.
Oka o se faamanuiaga le avea ma se vaega o lenei ala maoae ma mamalu o le olaga! O le avea ai ma se vaega o lenei mea, aganuu sili o aganuu uma, e manaomia ai se suiga. Ua aoao mai perofeta e faapea e manaomia le tuuese o soo se mea i a tatou aganuu tuai e le ogatusa ma le aganuu a Keriso. E le faapea o le a tatou tuuese ai mea uma. Na faamamafa mai foi e perofeta o loo valaauliaina i tatou, tagata uma, e aumai lo tatou faatuatua ma taleni ma le poto—mea uma e lelei i o tatou olaga ma a tatou aganuu taitasi—faatasi ma i tatou, ma tuu atu i le Ekalesia e “faaopoopo i ai” e ala i le savali o le talalelei. 3
O Le Ekalesia a Iesu Keriso o le Au Paia o Aso e Gata Ai e le o se faalapotopotoga a Papalagi po o se aganuu ofoofogia a Amerika. O se ekalesia faavaomalo, e pei ona tatau ai lava. E sili atu nai lo lena, e faalelagi. E aumaia e tagata fou mai le salafa o le lalolagi le tamaoaiga, eseesega, ma le sagisagi fiafia i lo tatou aiga o loo faatupulaia pea. O loo faamanatuina ma faamamaluina pea e le Au Paia i Aso e Gata Ai i soo se nofoaga o latou lava talatuu ma toa, ae o le taimi nei ua latou avea foi ma se vaega o se mea e sili ona maoae. Ua fesoasoani le aganuu a Keriso ia tatou vaai ia i tatou lava e pei ona tatou i ai moni, ma pe a vaaia e ala i vaaiga o le faavavau, fetuunai ma le amiotonu, e faateleina ai lo tatou tomai e faataunuu ai le fuafuaga tele o le fiafia.
O le a la le mea na tupu i la’u uo? Ia, sa aoaoina o ia i lesona ma auai i le Ekalesia. Ua faamauina lona aiga mo le olaga nei ma le faavavau atoa i le Malumalu o Sini Ausetalia. Ua ia lafoaia mea itiiti—ma maua ai le gafatia mo mea uma. Na ia iloaina e mafai lava ona ia faamanatuina lona talafaasolopito, mitamita pea i ona augatama, lana musika ma siva ma tusi faitau, meaai, lona laueleele ma ona tagata. Ua ia iloaina e leai lava se faafitauli i le faaaofia ai o mea sili o lana aganuu i le lotoifale i le aganuu sili o aganuu uma. Na ia iloaina o le aumaia o mea ia e ogatusa ma le upumoni ma le amiotonu mai lona olaga tuai i lona olaga fou e na o le faaleleia ai o lana fegalegaleaiga ma le Au Paia ma fesoasoani i le tuufatasia o tagata uma ia tasi i le faalapotopotoga o le lagi.
Ioe, e mafai ona tatou faapelepele i o tatou aganuu sili taitasi faalelalolagi ma avea pea ma tagata auai atoatoa i le aganuu sili ona tuai o aganuu uma—o le aganuu muamua, tupito, ma faavavau lea e sau mai le talalelei a Iesu Keriso. Oka o se talatuu ofoofogia lea tatou te fefaasoaai uma ai. I le suafa, o Iesu Keriso, amene.