Ou Te Talitonu i Agelu
E silafia e le Alii ia luitau lua te fetaiai. Na te silafia oe, e alofa o Ia ia te oe, ma ou te folafola atu, o le a Ia auina mai agelu e fesoasoani ia te oe.
Uso e ma tuafafine, ou te talitonu i agelu, ma ou te fia faasoa atu o’u aafiaga ma i latou. I le faia ai o lena mea, ou te faamoemoe ma tatalo o le a tatou aloaia le taua o agelu i o tatou olaga.
O upu nei a Elder Jeffrey R. Holland mai se konafesi aoao ua mavae: “A tatou talanoa e uiga ia i latou o tufugaaao i le Atua, ua faamanatu mai ia te i tatou e le o agelu uma e mai le isi itu o le veli. O nisi o i latou tatou te savavali ma talanoa faatasi—iinei, i le taimi nei, ma aso uma lava. O nisi o i latou e nonofo i o tatou pitonuu. E moni e leai se taimi e sili ona lalata mai ai le lagi, nai lo le taimi tatou te vaaia ai le alofa o le Atua o faaalia i le agalelei ma le tuuto o tagata e ese le lelei ma matua mama, lea e na o le upu pei o se agelu e tau i ai le mafaufau” (“O Le Auaunaga a Agelu,” Liahona, Nov. 2008, 30).
Ou te fia tautala e uiga i agelu i lenei itu o le veli. O agelu tatou te savavali faatasi i o tatou olaga i aso fai pea, o ni faamanatu mamana ia o le alofa o le Atua mo i tatou.
O agelu muamua o le a ou ta’ua o tuafafine faifeautalai e toalua sa aoaoina a’u i le talalelei a o ou tama talavou: o Sister Vilma Molina ma Sister Ivonete Riviti. Sa valaaulia a’u ma lo’u tuafafine laitiiti i se gaoioiga fale-Ekalesia lea na matou feiloai ai ma nei agelu e toalua. Ou te lei iloaina le tele na suia ai e lena gaoioiga laitiiti lo’u olaga.
Sa le’i fia aoao atili o’u matua ma nai o’u tei e uiga i le Ekalesia i lena taimi. Latou te le’i mananao foi e talia faifeautalai i lo matou fale, o lea sa fai ai a’u lesona ma faifeautalai i se fale o le Ekalesia. O lena tama’i potu i le falesa na avea ma o’u “vao paia.”
E tasi le masina talu ona faailoa mai e nei agelu le talalelei ia te a’u, ae ou papatiso. Sa 16 o’u tausaga. Ae paga lea, e leai se ata o lena gaoioiga paia, ae o loo i ai sa’u ata o a’u ma lo’u tuafafine i le taimi na ma auai ai i lena gaoioiga. Atonu e manaomia ona e faamanino atu pe o ai ia e i le ata. O a’u le umī i le itu taumatau.
E mafai ona outou mafaufau, o le tumau malosi i le Ekalesia sa faigata mo se talavou ua faatoa suia lona olaga, ma sa le’i savavali foi lona aiga i le ala e tasi.
A o ou taumafai e fetuunai i lo’u olaga fou, se aganuu fou, ma ni uo fou, sa le lelei o’u lagona. Sa ou lagona le tuuatoatasi ma le lotovaivai i le tele o taimi. Sa ou iloa e moni le Ekalesia, ae sa faigata lava ona ou lagonaina o a’u o sona itutino. A o ou faaletonu ma le mautonu a o ou taumafai e faafetaui i la’u tapuaiga fou, sa ou maua le lototele e auai ai i se konafesi e tolu-aso a le autalavou, lea sa ou mafaufau o le a fesoasoani e maua ai ni a’u uo fou. O iiina na ou fetaui ai ma se isi agelu laveai, e igoa ia Monika Pelenato.
Sa fou o ia i le nuu, ma sa sau mai se isi vaega o Pasila. Sa vave ona āno mai o ia ia te a’u, ma sa ou laki, na ia taliaina a’u o se uo. Masalo sa sili atu lona vaai mai ia te a’u i o’u uiga nai lo o’u foliga.
Ona sa ia faauo mai ia te a’u, o lea sa ia faafeiloai atu ai a’u i ana uo, o e na avea foi ma a’u uo a o matou ālo fiafia i le mau gaoioiga a le autalavou sa ou auai ai mulimuli ane. O na gaoioiga sa matuai taua tele i la’u aotelega i lo’u olaga fou.
O nei uo lelei na faia ai se eseesega tele, ae o le le aoaoina o le talalelei i totonu o lo’u aiga faatasi ai ma se aiga e lagolago, na lamatia ai le faagasologa faifai pea o lo’u liuga. Na atili taua ai a’u fegalegaleaiga faaletalalelei i le Ekalesia i lo’u liuga faifai pea. Ona auina mai lea e le Alii nisi agelu se toalua e fesoasoani mai.
O se tasi o i la’ua o Leta Vetoli, o lo’u faiaoga seminare i le vaveao. Na ala mai i lona alofa faapalepale ma vasega musuia, sa ia aumaia ai ia te a’u se inumaga i aso taitasi o le “afioga lelei a le Atua” (Moronae 6:4), lea sa ou matua manaomia i le aso atoa. Sa fesoasoani lea ia te a’u e maua ai se malosiaga faaleagaga e faaauau ai pea.
O se isi agelu na auina mai e fesoasoani ia te a’u o se peresitene o Alii Talavou, o Malako Atonio Fuko. Sa tofia foi o ia e fai ma a’u soa sinia o faiaoga o aiga. E ui i le le lava o lo’u poto masani ma le ese o foliga, ae na ia tofia lava a’u e faiaoga i la matou korama a ositaulaga, ma asiasiga a faiaoga o aiga. Na ia tuu mai ia te au le avanoa e faatino ai ma aoao ai ae le na o se e matauina le talalelei. Sa ia faatuatuaina a’u, e sili atu nai lo lo’u faatuatuaina o a’u lava ia.
Faafetai i nei agelu uma, ma le toatele o isi sa matou fetaiai i na uluai tausaga taua, sa lava ai le malosi ou te mauaina e tumau ai i le ala o feagaiga a o ou mauaina se molimau faaleagaga o lona moni.
Ae manatua foi, le teine agelu talavou, o Monika? Ina ua maea ona ma galulue faamisiona, sa avea o ia ma o’u toalua.
Ou te le manatu o se mea e tupu faafuaveta ia ni uo lelei, tiutetauave i le Ekalesia, ma le faafaileleina i le afioga lelei a le Atua, ae o ni vaega lava o lena faagasologa. Na aoao mai ma le atamai e Peresitene Gordon B. Hinckley: “E le o se mea faigofie le faia o le suiga e auai i lenei Ekalesia. O lona uiga o le tuua o ni fegalegaleaiga tuai. O lona uiga o le tuua o ni uo. O lona uiga o le faataatiaese o ni talitonuga sa pele [ia i latou]. E ono manaomia ai se suiga o mea sa masani ai ma se taofiga o mea sa faamemelo i ai. I le tele lava o tulaga, o lona uiga o le tuuatoatasi faapea foi ma le popole i le le mailoa. E tatau ona i ai le faafaileleiga ma le faamalosiga i lenei vaitau faigata i se olaga o se tagata e liliu mai” (“E Tatau Ona I Ai Avefeau,” Ensign, Oke. 1987, 5).
Mulimuli ane sa ia toe aoao mai, “E manaomia e i latou uma taitoatasi ni mea se tolu: o se uo, o se matafaioi, ma ia faafaileleina i le afioga lelei a le Atua’” (“Tagata Liliu Mai ma Alii Talavou,” Ensign, May 1997, 47).
Aisea ua ou faasoa atu ai nei aafiaga ia te outou?
Muamua, e auina atu ai se feau ia i latou o loo uia foi lena lava faagasologa i le taimi nei. Atonu o oe o se tagata faatoa liliu mai, pe ua toe foi mai i le Ekalesia i le mavae ai o lou fesesea’i mo sina taimi, pe o se tasi foi o loo tauivi ina ia maunofo lelei i totonu. Faamolemole, faamolemole, aua e te fiu i au taumafaiga e avea o se vaega o lenei aiga tele. O le Ekalesia moni lenei a Iesu Keriso!
A oo ina talanoaina lou fiafia ma le faaolataga, e taua pea lava le taumafai pea. E taua le taumafai e fetuunai lou ituaiga olaga ma aga masani. E silafia e le Alii ia luitau lua te fetaiai. Na te silafia oe, e alofa o Ia ia te oe, ma ou te folafola atu, o le a Ia auina mai agelu e fesoasoani ia te oe.
I Ana lava upu na fetalai ai le Faaola: “Ou te muamua atu i o outou luma. O le a Ou i ai i lo outou lima taumatau ma lo outou agavale, ma o le a i ai lo’u Agaga i o outou [loto], ma si’o faataamilo outou e a’u agelu, e sapasapai outou i luga” (Mataupu Faavae ma Feagaiga 84:88).
O lo”u faamoemoega lona lua ua faasoa atu ai nei aafiaga o le auina atu o se feau i tagata uma o le Ekalesia---ia i tatou uma lava. E ao ina tatou manatua e le faigofie mo tagata fou faatoa liliu mai, o uo ua toe foi mai, ma i latou e ese ituaiga olaga, ona vave ona maunofo lelei i totonu. E silafia e le Alii ia luitau latou te fetaiai, ma o loo Ia sailia agelu e naunau e fesoasoani atu. E sailia pea e le Alii nisi e naunau e ofofua mai e avea ma agelu i olaga o isi.
Uso e ma tuafafine, pe e te naunau ea e avea ma meafaigaluega i aao o le Alii? Pe e te naunau ea e avea o se tasi o nei agelu? E avea o se avefeau, ua auina mai le Atua, mai lenei itu o le veli, mo se tasi o loo Ia popole i ai? Na te manaomia oe. Latou te manaomia oe.
O le mea moni, e mafai pea ona tatou faalagolago i o tatou faifeautalai. E i ai pea lava i latou iina, o tagata muamua e ofofua atu mo lenei galuega faaagelu. Ae e le lava.
A e autilo solo ma le faaeteete, o le a e iloa ai le toatele e manaomia le fesoasoani a se agelu. O nei tagata atonu latou te le o laeiina ni ofutino papae, ofu po o se ituaiga o laei mo le Aso Sa. Atonu latou te nonofo na o i latou, i le pito i tua o le falesa po o le potuaoga, o nisi taimi latou te manatu ai e le o iloa atu i latou. Atonu e fai si ese o le teuga o o latou ulu pe ese foi la latou vaogagana, ae o la e i ai iina, ma o loo latou taumafai.
Atonu e taumanatunatu nisi, “Pe tatau ea ona ou saga sau?” Pe tatau ea ona ou saga taumafai?” E ono taumanatunatu isi pe mata o le a latou lagona i se aso e talia ma alofaina i latou. E manaomia agelu, i le taimi lava lenei; o agelu o e ua naunau e tuua o latou tulaga toafimalie e opo mai i latou; “[o tagata o e] e ese le lelei ma matua mama, lea e na o le upu pei o se agelu e tau i ai lou mafaufau [e faamatala ai i latou]” (Jeffrey R. Holland, “O Le Auaunaga a Agelu,” 30).
Uso e ma tuafafine, ou te talitonu i agelu. Ua tatou i ai uma iinei i le aso, o se autau tele naua o agelu ua vaetofia mo nei aso e gata ai, e auauna atu i isi e fai ma faaopoopoga o aao o se Mataisau alofa. Ou te folafola atu afai tatou te naunau e auauna atu, o le a tuu mai e le Alii ia i tatou ia avanoa e avea ai o ni agelu o le auaunaga. Na te silafia i latou e manaomia le fesoasoani faaagelu, ma o le a Ia tuuina i latou i o tatou ala. E tuu e le Alii i latou o e manaomia le fesoasoani faaagelu i o tatou ala i aso taitasi.
Ou te matua faafetai tele mo agelu e toatele na tuu e le Alii i lo’u ala i lo’u olaga atoa. Sa manaomia i latou. Ou te faafetai tele foi mo Lana talalelei ua fesoasoani ia i tatou e suia ai ma tatou maua ai le avanoa ia lelei atili ai.
O se talalelei lenei o le alofa, o se talalelei o le auaunaga. Ou te molimau atu ai i nei mea, i le suafa o Iesu Keriso, amene.