Fakaʻilekitulōnika Pē: Kakai Lalahi kei Talavoú
Faingataʻa ke Ako e Ha‘u, ʻo Muimui ‘Iate Aú ʻIate Koe Pē? Ko Ha Fanga Ki‘i Tokoni ʻEni ki he Taʻu Fo‘oú
ʻOkú ke ongoʻi nai ʻoku ʻikai ke ke ako e meʻa kotoa ʻi he Ha‘u, ʻo Muimui ‘Iate Aú? ʻOku mau ʻi heni ke tokoni!
Ko e taʻu foʻoú—2021—‘e hoko ia ko e ta‘u hono tolu ʻo e Ha‘u, ʻo Muimui ‘Iate Aú maʻá e Siasí fakakātoa. ‘Oku totonu ke tau hoko kotoa ko ha kau mataotao he taimí ni, ʻikai ko ia?
Kapau ‘okú ke hangē ko aú, ko e tali ki he fehuʻi ko iá mahalo ko e, “Te‘eki ai!” Pea ʻoku sai pē ia!
ʻOku maʻá e tokotaha kotoa ʻa eHa‘u, ʻo Muimui ‘Iate Aú , ka ko e taimi ʻe ni‘ihi ʻe lava faingata‘a ke mahino kapau ʻoku ‘ikai ke ʻi ai maʻu pē e niʻihi kehé ke mou ako fakataha. Fēfē ‘a e kakai lalahi kei talavou teʻeki malí? ‘Oku anga fēfē hoʻo fealeaʻaki mo koe pē? Fēfē kapau ʻoku ʻikai fie kau mai hoʻo kaungā-lokí?
Ke tokoni kiate kitautolu kotoa pē ‘i heʻetau ako ʻa e Ha‘u, ʻo Muimui ‘Iate Aú , kuo mau faʻu ha lisi ʻo ha ngaahi fakakaukau ke ue‘i hoʻo mohu foungá:
-
Ngaahi Kulupu ‘o e Haʻu, ‘o Muimui ʻIate Aú—Tānaki ‘i he ʻinitanetí ha kulupu ‘o ha ngaahi kaungāmeʻa pe fāmili ke talanoa mo alea‘i ʻa e ngaahi folofola ʻi he Haʻu, ‘o Muimui ʻIate Aú ki he uike ko iá. Fokotu‘u ha taimi mo ha feituʻu ke fakataha fakauike fakahangatonu pe ʻi he ʻinitanetí. Te ke lava pē foki ‘o ngāue ʻaki e pōpoaki pe fetalanoaʻaki fakakulupú ʻa ia te mou lava ‘o fevahevaheʻaki hoʻomou ngaahi fakakaukaú ʻi he lolotonga ‘o e uiké.
-
Ngaahi Efiafi ‘i ʻApí—‘I he taimi ʻokú ke palani ai ha efiafi ʻi ʻapi ki hoʻo fāmilí pe uōti ʻa e kau taautahá (fakaʻilekitulōnika pe fakahangatonu), fakakaukau ki he ngaahi lēsoni mo e ʻekitivitī ‘e lava ke fakafekauʻaki mo e laukonga ʻi he Ha‘u, ʻo Muimui ‘Iate Au he uike ko iá. (Vakai ki lalo ki ha sīpinga ʻo ha fakakaukau ki he efiafi ‘i ʻapí.)
-
Ngaahi Fakamanatu ʻi he Telefoní—Ko ha tokolahi ‘o e kakai lalahi kei talavoú ʻoku nau nofo ʻiate kinautolu pē pe fakataha mo ha kakai kehe tokosiʻi. ʻOku lava pē ke faingataʻa ʻi he taimi ʻe niʻihi ke ako ʻa e Haʻu, ‘o Muimui ʻIate Aú he ‘aho kotoa pē ʻi he ʻikai ha fāmili ke ako fakataha mo iá. Feinga ke fokotuʻu ha fakamanatu pe uasi tatangi ʻi ho‘o telefoní ke ʻoatu e tokoni lahi ange ʻokú ke fie maʻú.
-
Ngaahi Ma‘uʻanga Tokoni Fakamītiá—‘Oku ʻoatu ʻe he Siasí ha ngaahi ma‘uʻanga tokoni fakamītia kehekehe ke tokoni‘i koe ke ke ako ʻa e Haʻu, ‘o Muimui ʻIate Aú. ‘Oku kau heni e ngaahi lea ʻo e konifelenisi lahí (fakamatala, ongo mo e vitiō), ngaahi lea mei he ʻUnivēsiti Pilikihami ʻIongí (fakamatala, ongo mo e vitiō), ngaahi podcasts ʻa e Siasí (ongo mo e vitiō) mo ha ngaahi Mītia kehe ʻo e Ongoongoleleí (ngaahi vitiō, ngaahi ʻīmisi, mūsika mo e ongo). Ma‘u ʻa e ngaahi ma‘uʻanga tokoni kotoa ko ʻení ‘i he ngaahi polokalama ʻa e Siasí (Gospel Library, Mītia ʻo e Ongoongoleleí), ChurchofJesusChrist.org, mo e speeches.byu.edu pea ngāue ‘aki ʻa e fa‘ahinga ʻo e mītiá ʻokú ke ako lelei taha mei aí!
-
Fevahevaheʻaki—Ko e taha ‘o e ngaahi founga lelei taha ke toe loloto ange hoʻo ako ki he ongoongoleleí ko hono vahevahe ʻa e me‘a kuó ke akó. Vahevahe fakahangatonu, ʻi ho‘o tohinoá, ʻi ha pōpoaki, ‘i he telefoní pe ʻi he mītia fakasōsialé. Feinga ke hokohoko lelei ʻa e fetalanoaʻakí.
‘I he 2021 te tau ako ʻa e Tokāteline mo e Ngaahi Fuakavá ʻi he Ha‘u, ʻo Muimui ‘Iate Aú. Ko ha ngaahi fakakaukau ʻeni ʻoku fakatautefito ki hono ako ‘o e tohi folofola ko ‘ení:
-
Ko eRevelations in Context—Ko e tohi ‘o e Revelations in Context ʻoku ʻi ai ‘a e fakamatala puipuituʻa ki he kakai mo e ngaahi tūkunga kuo aleaʻi ‘i he Tokāteline mo e Ngaahi Fuakavá. Te ke ma‘u ʻa e tohi ko ‘ení ʻi he polokalama Gospel Library mo e ChurchofJesusChrist.org.
-
Ngaahi fakamatala tokoni ʻo e Ha‘u, ʻo Muimui ‘Iate Aú—ʻI he māhina kotoa pē ʻoku ʻomi ‘i he ngaahi makasini ʻa e Siasí ha ngaahi fakamatala ke fakalahi mo fakamālohia ai ho‘o ako ʻo e Ha‘u, ʻo Muimui ‘Iate Aú. ‘E lava ke ke maʻu ‘a e ngaahi makasiní ʻi he polokalama Gospel Library, ChurchofJesusChrist.org pea mo e makasini kuo ‘osi paakí.
-
“Tokāteline mo e Ngaahi Fuakava” Gospel Topics essay—ʻoku ma‘u ʻe he Siasí ‘a e ʻū Gospel Topics essay fekauʻaki mo e ngaahi tefito lahi ʻi he hisitōlia ʻo e Siasí, kau ai ‘a e Tokāteline mo e Ngaahi Fuakavá. ‘Oku kau ʻi he fakamatala takitaha ha fakamatala nounou ‘o e tefitó pehē ki ha ngaahi fehokotakiʻanga ki he ngaahi lea fekau‘aki mei he konifelenisi lahí, ngaahi folofolá mo e ngaahi mītia kehe ʻa e Siasí. Te ke ma‘u e fakamatala ki he Tokāteline mo e Ngaahi Fuakavá (mo ha niʻihi tokolahi) ‘i he ChurchofJesusChrist.org/topics pea mo e polokalama Gospel Library.
-
Kau Māʻoniʻoní: Ko e Talanoa ‘o e Siasi ʻo Sīsū Kalaisi ʻo e Kau Māʻoniʻoni ‘i he Ngaahi ʻAho Kimui Ní voliume 1 mo e 2—ʻOku kau ʻi he ongo tohi ʻo e Kau Mā‘oniʻoní ha ngaahi talanoa ki he fuofua kāingalotu ʻo e Siasí pea ʻoku hiki ia ʻi ha sīpinga ʻo e tohi talanoa mo mātuʻaki faingofua ke lau. ‘E lava ke ke lau pe fanongo ki he ngaahi tohí ni ʻi he polokalama Gospel Library (pe fakatau e tohí kapau ‘okú ke fie maʻu) pea fanongo foki pe mamataʻi ʻa e podcast ‘o e Kau Māʻoni‘oní ʻi he ChurchofJesusChrist.org pe ko e polokalama ʻo e Latter-Day Saints Channel.
‘Oku tau ʻi he tūkunga kehekehe ʻo e moʻuí, ka koe meʻa maʻongoʻonga fekauʻaki mo e ongoongolelei ʻo Sīsū Kalaisí ʻoku ʻatā ia ki he tokotaha kotoa pē! ʻE lava ke tokoniʻi kitautolu ʻe heHa‘u, ʻo Muimui ‘Iate Aú ke ʻiloʻi mo faka‘aongaʻi e ongoongoleleí ‘i heʻetau mo‘ui fakafoʻituituí mo e ngaahi tūkungá. Ko ʻetau taumuʻa taupotu taha ʻi hono fakaʻaongaʻi ʻo e Haʻu, ‘o Muimui ʻIate Aú ʻoku ʻikai fuʻu fie maʻu ia ke fakakakato ‘a e foʻi ʻekitivitī mo e fakakaukau ako kotoa pē ʻoku ʻoatu aí. Ka, ‘oku totonu ke tau feinga ke ako fakamātoato ʻa e folofolá—ko e folofola ʻa e ‘Otuá.
Mahalo pē na‘e kau ʻi he lisi ko ‘ení ha fakakaukau ʻe taha pe ua ʻoku fe‘unga mo hoʻo tūkungá, pe mahalo ʻoku fakatupu ‘e he ngaahi fakakaukau ko ʻení ha fakahā fakataautaha pē ʻaʻau ki he founga ʻe lava ke ke ako ai ‘a e Haʻu, ‘o Muimui ʻIate Aú. Ko e hā pē foungá, ‘oua ʻe fo‘i, pea “sio pē ki [he ʻEikí] ‘i he fakakaukau kotoa pē; ʻoua ‘e tālaʻa, ‘oua ʻe manavahē” (Tokāteline mo e Ngaahi Fuakava 6:36).