Te u Talanoa Fēfē ki Heʻeku Fānaú fekauʻaki mo e Ongoongoleleí ʻi he Ngaahi Founga Angamahení?
ʻI heʻetau hoko ko e mātuʻá, ko hotau fatongiá ia ke akoʻi ʻetau fānaú fekauʻaki mo e ongoongoleleí. Ka ʻoku ʻikai fie maʻu ia ke fuʻu fakamātoato mo fakapōpula ʻa hono aleaʻi ʻo e ongoongoleleí! Ko ha ngaahi fakakaukau ʻeni ʻe niʻihi ki hono fakakau ʻa e ngaahi fepōtalanoaʻaki fekauʻaki mo e ongoongoleleí ʻi he moʻui fakaʻahó.
Ngaahi tā fakatātā ʻa Josie Portillo
Founga ʻe 7 ke Kamata ha Fepōtalanoaʻaki
-
Kuo fehuʻi atu nai ha taha ʻo hoʻo ngaahi kaungāmeʻá fekauʻaki mo ha meʻa fakalotu?
-
Ko e hā kuó ke lau ʻi he folofolá kimuí ni maí? ʻOku ʻi ai haʻo ngaahi fehuʻí?
-
Ko e hā e tūkunga ʻo hoʻo ngaahi uiuiʻí (pe fatongia kehe ʻi he Siasí)? Ko e hā ha meʻa te ne tokoniʻi koe?
-
Kuó u fakakaukau lahi ki he potufolofola ko ʻení kimuí ni mai. Ko e hā hoʻo fakakaukau ki aí?
-
Naʻe ʻi ai nai ha meʻa ʻi he lotú he ʻahó ni naʻá ke fehuʻia?
-
ʻOku ʻi ai nai ha meʻa kuo tau lau kimuí ni ʻi he Haʻu, ʻo Muimui ʻIate Aú ʻokú ke kei fakakaukau pē ki ai?
-
Ko e hā hoʻo fakakaukau ki he ngaahi lea ne tau sio ai ʻi he konifelenisi lahí?
Ngaahi Taimi Angamaheni ʻe 7 ki he Talanoá
-
Lolotonga ha maʻu meʻatokoni fakataha pe ko e taimi mohé
-
Ko e taimi ʻoku foua ai hoʻo fānaú ha taimi faingataʻa
-
Lolotonga ha ngāue tokoni pe ʻi he taimi tokoni ki he niʻihi kehé
-
Kimuʻa pe ʻi he hili ʻa e ngaahi fakatahaʻanga pe ʻekitivitī ʻa e Siasí
-
Lolotonga e ngaahi talanoa fakafāmilí pe talanoa fekauʻaki mo e ngaahi kuí
-
ʻI ha taimi pē ʻokú ke fakatokangaʻi ai ha meʻa ʻoku felāveʻi mo ha pōpoaki fakalaumālie
-
ʻI ha faʻahinga taimi pē—kapau te ke kamata ʻaki ʻa e fepōtalanoaʻakí ha loto-tauʻatāina, loto-ʻofa, mo ha loto-holi ke fanongo pea mahino.
Ngaahi Fakakaukaú mo e Ngaahi Tokoní
-
Akoʻi ki hoʻo fānaú ʻoku sai pē ke nau fehuʻi fekauʻaki mo e ongoongoleleí. He ko hono moʻoní, ko ha fehuʻi naʻá ne ueʻi ʻa Siosefa Sāmita ke ne lotua ha tokoní, ʻa ia ne iku ai ki he ʻUluaki Mata Meʻa-Hā-Maí! Tokoni ke mahino kiate kinautolu te nau kei lava pē ʻo tanumaki ha fakamoʻoni taʻe te nau ʻilo kotoa ki he ngaahi talí.
-
Fakamahinoʻi ange ʻa e taimi ʻokú ke ongoʻi ai ʻa e Laumālié, ʻo tatau ai pē pe ko e lolotonga ʻa e efiafi fakafāmilí, lotú, pe ko e fakaʻofoʻofa e tō ʻa e laʻaá. ʻE lava ke tokoni ʻeni ke nau kamata ke fakatokangaʻi ʻa e founga ʻoku folofola mai ai ʻa e Laumālié kiate kitautolú. Fakamatalaʻi ange ʻe lava ke fetuʻutaki mai ʻa e Laumālié kiate kitautolu ʻi ha ngaahi founga kehekehe, hangē ko ha ngaahi ongo fakamāfana pe fiefia, ngaahi fakakaukau mahino, ko ha ongoʻi nonga, etc.
-
Fakafaingofuaʻi hono maʻu e ngaahi pōpoaki ʻo e ongoongoleleí. Mahalo he ʻikai sio hoʻo fānau toʻu tupú ʻi heʻenau telefoní ki he ngaahi talanoa ʻi he makasini ʻa e Siasí, ka ʻe lava ke nau sio ʻi ha Liahona ʻoku tuku ʻi he funga tēpilé. Mahalo he ʻikai ke nau fanongo ki he ngaahi lea ʻo e konifelenisi lahí ʻi honau taimi ʻataá, ka ʻe lava ke nau maʻu ha ngaahi foʻi lea mei ha lea ʻokú ke fanongo ki ai lolotonga hoʻo feimeʻatokoni efiafí.
-
Kae mahuʻinga tahá, feinga pē, ʻo aʻu ki he taimi ʻoku ʻikai ke ngali ʻaonga aí! ʻOku fonu e folofolá ʻi ha ngaahi talanoa fekauʻaki mo ha fānau ne ʻikai ke nau fanongo ʻi he ʻuluaki taimí, ʻo hangē ko ʻAlamā ko e Siʻí. Falala pē ʻe ʻi ai e ʻaho ʻe hū ai ki honau lotó ha ngaahi moʻoni fakalaumālie.