Ngaahi Fehuʻi & Talí
ʻOku ʻi ai ha niʻihi ʻo hoku ngaahi kaungāmeʻá ʻoku ʻikai ko ha kau faʻifaʻitakiʻanga lelei. ʻE lava ke mau kei kaungāmeʻa pē?
Laʻitā mei he Getty Images, fakatātaaʻi ʻe ha kau mōtolo.
Vahevahe e Ngaahi Meʻa Leleí
Kapau ko hoku ngaahi kaungāmeʻa kinautolu, ko hoku fatongia ia ke tokoniʻi kinautolu ke nau toe lelei ange, ke vahevahe e ongoongoleleí mo e ngaahi tāpuaki kotoa pē kuó u maʻu ʻi hono moʻui ʻaki iá. Kapau ʻoku ʻikai ke nau tokanga ki he ngaahi meʻa lelei ko iá, ʻe lava ke kamata ke nau mole tahataha atu. Neongo ʻene faingataʻá, ka ko e taimi ʻe niʻihi ko e meʻa lelei taha ia ke faí.
Matheus T., taʻu 16, Mīnasi Kelaisi, Palāsila
Lea Taʻe Manavahē
ʻOku ʻilo ʻe hoku ngaahi kaungāmeʻá ʻoku ou kau ki he Siasí. Ne mau talanoa fekauʻaki mo e meʻa ʻoku totonu mo ʻikai totonu ke faí. ʻI he taimi ní, ko e taimi ʻoku ou feohi ai mo hoku kaungāmeʻá, ʻokú ne tā ha sīpinga lelei, pea ko e meʻa ia ʻoku ou fiefia aí. ʻOku akoʻi au ʻe he meʻá ni ʻoku totonu ke u lea taʻe-manavahē.
Diego R., taʻu 16, Mekisikou Siti, Mekisikou
Hoko ko ha Ivi Tākiekina Lelei Ange
ʻOku ʻi ai hoku ngaahi kaungāmeʻa ʻoku ʻikai ke nau faʻifaʻitakiʻanga lelei, ka ʻoku ʻikai ʻuhinga ia ʻoku ʻikai te u lea kiate kinautolu. ʻOku ou fakaʻapaʻapaʻi mo angaʻofa kiate kinautolu. ʻOku ʻikai ke u loto-fakamaau pe fakaangaʻi kinautolu. ʻOku ou ʻiloʻi ʻe lava ke tākiekina ʻe he ngaahi kaungāmeʻá ʻa e anga ʻetau fakakaukaú mo e meʻa ʻoku tau faí pea ʻe lava pē ke fakapapauʻi ai ʻa e tuʻunga te tau aʻu ki aí. ʻI he taimi pē ʻoku ou lava aí, ʻoku ou vahevahe ʻa e ongoongoleleí mo kinautolu pea fakaafeʻi kinautolu ki he ngaahi ʻekitivitī ʻa e Siasí.
Saireth V. taʻu 18 Molēlosi, Mekisikou
Fakamuʻomuʻa ʻa e ʻOtuá
ʻOua naʻá ke loto-foʻi kapau ʻoku ʻikai tali ʻe ho ngaahi kaungāmeʻá hoʻo tā sīpinga leleí. ʻOku ʻi ai ha kiʻi faikehekehe ʻi he vahaʻa ʻo e siokitá mo hono tokangaʻi pē kitá. ʻOku ʻikai totonu ke ke tukuhifo hoʻo ngaahi tuʻunga moʻuí pe tukunoaʻi hoʻo ngaahi tuí koeʻuhí ko e niʻihi kehé; ʻoku tau moʻui ke fakahoifua ki he Tamai Hēvaní, ʻo ʻikai ki ha toe taha kehe. Lotu pea fekumi ʻi he ngaahi folofolá ki ha fakahinohino, fakafanongo ki he ngaahi ueʻi ʻa e Laumālie Māʻoniʻoní, kae hiliō aí, ʻoua naʻa tuku e ngaahi meʻa fakamāmaní ke ne ʻai koe ke ke hē mei he hala fāsiʻi mo lausiʻí.
Riley E., taʻu 15, Manila, ʻOtu Filipainí
Tuʻu ʻi he Ngaahi Potu Māʻoniʻoní
Kuó u ako mei heʻeku kau taki ʻi he Siasí kuopau ke tau tuʻu ʻi he ngaahi potu māʻoniʻoní, neongo kapau ko kitautolu tokotaha pē. Hokohoko atu hoʻo moʻui ʻaki e ngaahi ʻulungaanga ko iá ʻi hoʻo moʻuí pea ʻi ho lotó. Feinga ke fakaafeʻi kinautolu ki ha lēsoni pe houalotu sākalamēniti. Te ke lava ʻo ʻave holo ʻa e maama ʻo e ongoongoleleí ʻi ha faʻahinga feituʻu pē te ke ʻalu ai! Pea ko hono fakakātoa, fakahā e ʻofa ʻa e Fakamoʻuí maʻa nautolu takitaha.
Allanis O., taʻu 18, Setúbal, Potukali