Ko Samuela mo e Foʻi Fetuʻú
ʻI he ngaahi taʻu lahi ʻi he kuonga muʻá pea ʻi ha feituʻu mamaʻo ʻi he vahanoá, ne kikite ai ha tangata ʻa e ʻOtuá ko Samuela hono hingoá.
Naʻá ne tala ki he kakaí ha ngaahi meʻa lahi fekauʻaki mo hono ʻaloʻi ʻo e Fakamoʻuí. Naʻá ne lea kiate kinautolu fekauʻaki mo Sīsū Kalaisi mo e founga ʻo ʻEne hāʻele mai ki māmaní.
Naʻe ʻikai ke fanongo ʻa e kakaí. Ne veiveiua honau ngaahi lotó. Ko ia naʻa nau ʻave ʻa Samuela ki he matapā ʻo e koló pea lī ia ki tuʻa.
Ka naʻe ʻikai foʻi ai ʻa Samuela. Naʻe pau ke ne feinga ke nau ʻiloʻi. Naʻá ne kaka ki ʻolunga ki he ʻā ʻo e koló ʻo kaila kiate kinautolu ʻi laló.
“ʻI ha taʻu pē ʻe nima ʻe hāʻele mai e ʻEikí, ʻi ha pō fetuʻuʻia, ke fakahaofi ʻa e faʻahinga ʻo e tangatá mei heʻenau ngaahi angahalá, pea foaki ki he māmaní ʻa ʻEne māmá.”
“Pea neongo ʻe hoko ʻeni ʻi he [hili] ha taʻu ʻe nima, pea neongo ʻoku kei tāumamaʻo ia, ka ʻe tō e laʻaá, pea ʻe kamata ʻa e poó, ka ʻe kei maama pē ʻo hangē ʻoku kei ʻahó.”
Ne ʻita ʻaupito e kakaí pea fakapatū honau vaʻe. Naʻa nau pehē he ʻikai hāʻele mai ha Kalaisi.
Ne nau tolongaki e maká. Naʻe fana ʻenau ngahaú. Naʻe ʻikai tau ha meʻa ʻe taha ʻiate ia.
Ne tatali fakalongolongo pē e kau faivelengá, ʻo ʻamanaki te nau vakai—ki he foʻi fetuʻú, ki he māmá, ki he ngaahi talaʻofá, he naʻe mahulu ange hono mahuʻingá ʻi he koulá.
Pea ʻi he taʻu hono nimá, ne toka ʻa Kalaisi ʻi ha ʻaiʻangakai ʻo e manú ʻi Pētelihema. Naʻa nau mamata ki he māmá pea ʻiloʻi, kuó Ne haʻu, ʻa honau Fakamoʻuí ko e ʻEiki ʻo e meʻa kotoa pē.