Kakai Lalahi Kei Talavoú

Fakaʻaongaʻi e Mītia Fakasōsialé ʻi ha Founga Lelei

ʻI he taʻu ʻe nima kuohilí, ne ma felotoi ai mo hoku husepānití ke kamataʻi ha polokalama Youtube, ʻa ia ne ma kamata ke vahevahe fakamātoato ai ʻa e anga ʻo ʻema moʻui ko e kāingalotu ʻo e Siasi ʻo Sīsū Kalaisí. Ko ʻema fakakaukaú ke talanoa fekauʻaki mo ʻema tui fakalotú ʻi heʻema tōʻonga moʻuí.

Ne lahi ha ngaahi pōpoaki fakalaumālie ne tāpuekina ʻaki kimaua mei heʻema kau muimuí, ʻo fakahā mai kiate kimaua fekauʻaki mo [ʻenau] fuofua taimi ke ʻalu ki he lotú ʻo aʻu pē ki he papitaiso! Ne fakafonu ʻaki kimaua ʻe he ngaahi pōpoaki ko ʻení ha fuʻu fiefia lahi ʻaupito.

ʻOkú ma houngaʻia ʻi he ngaahi aʻusia fakatupulaki ne ʻomi ʻe he ngaahi netiueka fakasōsialé, ʻi hono fakamafola e pōpoaki ʻo e ongoongolelei kuo fakafoki maí ʻi heʻema vahevahe pē ʻema moʻuí. Ka neongo ʻe lava ʻe he mītia fakasōsialé ʻo ʻomi ha ngaahi aʻusia fakaofo, tokoniʻi kitautolu ke fakatupulaki ha ngaahi vā fetuʻutaki lelei, pea fakaʻatā kitautolu ke vahevahe ʻetau fakamoʻoni ki he ongoongoleleí, te ne toe lava foki ʻo ʻomi ha ngaahi aʻusia te ne fakavaivaiʻi fakalaumālie kitautolu, tataki kitautolu ke tau fakamaauʻi e niʻihi kehé ʻi ha ngaahi founga taʻetotonu, pea ngalo hotau tūkunga totonú.

ʻE fakamatala ʻe he konga maʻá e kakai lalahi kei talavou ʻo e māhina ní ʻa e ngaahi kaveinga ko iá mo ha meʻa lahi ange. ʻOku faingofua ke fakafehoanaki kitautolu pe ko ʻetau moʻuí ki he meʻa ʻoku tau sio ki ai ʻi he mītia fakasōsialé, ka te tau lava ʻo ako ke fakaʻaongaʻi e mītia fakasōsialé ko ha ʻātakai lelei ia ke tau lava ai ʻo tekeʻi ʻa hono fakamaauʻi kitautolú pe niʻihi kehé, maʻu ha loto-falala ki hotau natula fakalangí, pea hiliō aí, ke fakahā ki he niʻihi kehé ʻi heʻetau tā sīpingá, ʻa e fiefia ʻoku ʻomi ʻe he ongoongolelei ʻo Sīsū Kalaisí.

Bárbara Rodríguez

Ngaahi ʻIlo …

Mei he kakai lalahi kei talavoú

fekauʻaki mo e taʻefakamaauʻi e niʻihi kehé ʻi he mītia fakasōsialé

“ʻOku ou manatuʻi maʻu pē ʻoku ʻi ai e ngaahi tafaʻaki ʻo ʻetau moʻuí ʻoku tau vahevahe mo ʻikai vahevahe ki he niʻihi kehé. ʻOku ʻikai tatau e Instagram mo e moʻuí.”

—Gabrielle Shiozawa, Uāsingatoni, USA

“ʻOku ou faʻa fakamanatu pē kiate au ke kiʻi holomui pea manatuʻi ʻoku ʻikai ke tatau e meʻa kotoa pē mo e anga ʻene fotu maí.”

—Kylie Parrish, ʻIutā, USA

“ʻOku ou manatuʻi naʻe ʻikai akoʻi tatau ia mo aú. Kuo teʻeki ke u foua ʻe au e meʻa kuo nau fouá”

—Tiffany Sowards, Fōlōlita, USA

Mei he kau taki ʻo e Siasí

“ʻI he taimi ʻoku tau toe siofi lelei ange ai hotau ngaahi vaivaí, ʻe siʻi ange ʻetau fakehehema ke tau vakai ki he niʻihi kehé ʻi ha ‘sioʻata fakapōpōʻulí.’ ʻOku tau fie fakaʻaongaʻi e maama ʻo e ongoongoleleí ke sio ʻaki ki he niʻihi kehé ʻo hangē ko ia ʻoku fai ʻe he Fakamoʻuí—ʻi he manavaʻofa, ʻamanaki lelei mo e ʻofa faka-Kalaisi. ʻE hokosia e ʻaho ʻe mahino kakato ai kiate kitautolu e loto ʻo e niʻihi kehé pea te tau houngaʻia ʻi hano fakahaaʻi mai e ʻaloʻofá kiate kitautolu—hangē pē ko ʻetau fakahaaʻi ha ngaahi fakakaukau mo e lea ʻofa ki he niʻihi kehé ʻi he moʻuí ni. …”

“ʻOku fakaofo e mālohi ʻoku maʻu ʻe heʻetau ngaahi leá, ke langa hake pea mo holoki ha moʻuí. Mahalo te tau lava ʻo manatuʻi kotoa e ngaahi lea fakaholomui naʻá ne fakalotomamahiʻi kitautolú kae pehē ki he ngaahi lea ʻofa naʻá ne langaki hake hotau laumālié. ʻI heʻetau fili pē ke leaʻaki ha meʻa lelei kau ki he niʻihi kehé—ʻokú ne langaki hake mo fakamālohia ai e niʻihi ʻoku tau feohí pea faitokonia ai e niʻihi kehé ke nau muimui ki he founga ʻa e Fakamoʻuí.”

Jean B. Bingham, Palesiteni Lahi ʻo e Fineʻofá, “Te u ʻOmi e Maama ʻo e Ongoongoleleí ki Hoku ʻApí,” Liahona, Nōv 2016, 6, 7.

Vahevahe Mai Hoʻo Talanoá

ʻOku ʻi ai nai haʻo aʻusia ke vahevahe? Pe ʻokú ke fie vakai nai ki ha ngaahi fakamatala fekauʻaki mo ha ngaahi tefito pau? Kapau ko ia, ʻoku mau fie fanongo meiate koe! Te ke lava ʻo ʻomai hoʻo ngaahi talanoá pe fakamatalá ʻi he liahona.ChurchofJesusChrist.org.