Ko Ia ʻa e Māmá
ʻOku nofo ʻa e tokotaha naʻá ne faʻú ʻi ʻIutā, USA.
ʻI ha ngaahi maile ʻe lauafe mei ʻapi, ne u ako ai ha lēsoni mei he fanga kiʻi maama iiki ne maile ʻe lautiliona hono mamaʻó.
Tā fakatātā ʻe Gabriele Cracolici
Mahalo ʻe ongo ngali kehe, ka naʻá ku faʻa vēkeveke maʻu pē ʻi heʻeku ngāue fakafaifekaú ke aʻu ki he Kilisimasí, ʻo mamaʻo ʻaki ha ngaahi maile ʻe laungeau pe lauiafe mei he palopalema fakafāmili angamahení mo e ngaahi fakahohaʻa fakakomēsialé. Naʻe fekauʻaki e Kilisimasí mo Kalaisi, pea ko e hā ha toe founga lelei ange ke fakafiefiaʻi ʻaki ka ko hono tokoniʻi e niʻihi kehé ke nau haʻu kiate Ia?
ʻI ha efiafi ʻe taha ʻi Tīsema, ne ma lolotonga foki atu mo hoku hoá ki homa fale nofoʻangá hili ia ha ʻaho ngāue ʻi La Pasa, ko ha feituʻu makehe ʻi he tuʻakolo ʻo Laoaka Siti, ʻOtu Filipainí. Naʻá ku tangutu fakaʻefihi ʻi he nofoʻanga pāsese ʻo ha paiki veʻetolu ʻi he tafaʻaki ʻo hoku hoa lōloa-fute-onó, pea naʻá ku mātuʻaki fiefia ʻi he moʻuí. Ne pā mai ʻa e ʻea mokomokó kiate kimaua, ʻo (meimei) fakamanatu mai kiate au ʻa e ngaahi Kilisimasi sinou ʻi ʻapí—ka naʻe ʻikai ke meimei ofi ia ki he momoko naʻá ku anga ki ai ʻi Tīsemá.
ʻI heʻema lele ʻi he feituʻu ʻutá, naʻe hanga hake hoku matá ki he langí. Ne ʻasi mai mei ʻolunga ʻaupito ʻo mamaʻo mei he māmá mo e longoaʻa ʻo e koló, ha ngaahi fetuʻu ʻe lauiafe. ʻI heʻema aʻu ki he loto koló, ne fakaʻau ke siʻisiʻi ange e fanga foʻi fetuʻu ne u lava ʻo sio ki aí, pea faifai ʻo toe pē ʻa e fanga foʻi fetuʻu ʻoku ulo ngingila tahá.
Naʻá ku fakakaukau ki he maama mei he fanga foʻi fetuʻú mo Sīsū Kalaisi. Ne u fakakaukau ki he foʻi fetuʻu naʻá ne fanongonongo Hono ʻaloʻí mo Kalaisi Tonu, ko e “fetuʻu ngingila ʻo e pongipongí” (Fakahā 22:16). Ko Ia ʻa e fetuʻu ngingila tahá, ko e faʻifaʻitakiʻanga ngingila kiate kitautolu kotoa pē. Pea neongo iá, hangē ko e ngaahi fetuʻu ko ia ne u mamata ki ai ʻi heʻeku heka ʻi he veʻetolú, ʻe lava pē ke fakapuliki Ia ʻe ha kihiʻi ʻuli. Ko e lahi ange e ngaahi meʻa fakahohaʻá, mo e lahi ange e ngaahi maama faʻu ʻe he tangatá, ko e siʻisiʻi ange ia e lava ʻo sio ki he maama fakanatulá. ʻI ha feituʻu ʻuta ʻi he ʻOtu Filipainí, ʻe kei lava pē ke te sio ki ha ngaahi fetuʻu ʻe niʻihi ʻo aʻu pē ki he loto koló, ka ʻi he ngaahi kolo lalahi hangē ko Manilá, he ʻikai te te lava ʻo sio ki ha foʻi fetuʻu ʻe taha ʻi he poʻulí. ʻOku fakapuliki ʻe he maama mei he ngaahi tuʻuakí, pisinisí mo e tukui ʻapí ʻa e maama mei he ngaahi fetuʻu mamaʻó.
Ko e meʻa tatau pē ʻoku hoko ʻi he taimi ʻoku tau ʻātakaiʻi ʻaki ai kitautolu ʻa e ngaahi fakahohaʻá mo e ngaahi maama faʻu ʻe he tangatá. ʻOku toe faingataʻa ange ke mamata ki he maama ʻo Kalaisí.
ʻOku mātuʻaki moʻoni ʻeni ʻi he ofi ki he taimi Kilisimasí. ʻOku faingofua ke fuʻu tōtuʻa e ngaahi fokotuʻutuʻu ki he ngaahi ʻaho mālōloó pea tau femoʻuekina ʻo hangē ko Manilá ʻi he taimi fihituʻu e fefonongaʻakí. ʻOku ʻi ai e ngaahi meʻaʻofa ke kumi, ngaahi paati ke palani, ʻū kaati ke tohi, ko e ngaahi fakaʻaliʻali taʻefaʻalaua mo e ngaahi polokalama ke ʻalu ki ai. ʻI he taimi ʻoku tau ongoʻi ai ʻoku ʻikai ha kiʻi taimi ke tau hanga hake ai ki ʻolungá, mahalo he ʻikai pē ke tau fakatokangaʻi e fakafeʻātungiaʻi e maama ʻo Kalaisí ʻi heʻetau moʻuí.
ʻI heʻetau fakamaama hotau ngaahi ʻapí mo e fanga fuʻu ʻakaú, he ʻikai lava ke ngalo ʻiate kitautolu ke tuku e Maama ʻo Kalaisí ke hū ki hotau ngaahi lotó. Mahalo ʻe fie maʻu ke kiʻi taʻofi fakataimi e ngaahi kātoangá ke fakamanatua ʻa e meʻa ʻoku tau fakafiefiaʻí. ʻOku fekauʻaki e Kilisimasí mo Kalaisi. Ko Ia ʻa e Māmá, pea kapau te tau fakasiʻisiʻi e ngaahi fakahohaʻá kae hanga hake ki ʻolunga, te tau lava ʻo sio kiate Ia, ʻokú Ne ulo ngingila maʻu pē ki he māmaní kotoa ke nau mamata kiate Ia.