Naʻe hā ngali kehe nai ʻa e kole ʻe he tokoua ʻo Sēletí ki he ʻEikí ke fakaulo e fanga foʻi maká?

ʻUluakí, ne lotu e tokoua ʻo Sēletí ʻi he tui, ʻo ne tui te ne maʻu “ʻo fakatatau mo [ʻene] ngaahi fakaʻamú” (ʻEta 3:2). ʻOku ʻuhinga ʻeni naʻá ne falala “ʻoku ʻikai ha meʻa ʻe faingataʻa ki he ʻOtuá” (Luke 1:37). Pea naʻe fakalangilangiʻi ʻe he ʻEikí ʻene kole faivelengá.

Ko hono uá, mahalo ne muimui e tokoua ʻo Sēletí ki ha tā sīpinga kimuʻa: ʻaʻake ʻo Noá. Naʻe fakahā ange ʻe he ʻEikí ki he tokoua ʻo Sēletí he ʻikai lava ke ʻai ha afi pe ko ha ʻū kātupa ʻi heʻene ʻū vaká (vakai, ʻEta 2:23–24), ka ʻoku pehē ʻe he Tohi Tapú ne ʻi ai ha “kātupa” ʻi he ʻaʻake ʻo Noá (Sēnesi 6:16). Ka neongo iá, mahalo ko e foʻi lea ne liliu ki he “kātupá” naʻe ʻikai ko ha matapā ia ki tuʻa. ʻOku pehē ʻe ha kau lāpai mo ha kau mataotao ʻe niʻihi, ko e “kātupa” ʻo e ʻaʻaké ko ha maka mahuʻinga ʻa ia naʻe ngingila ʻi he loto ʻaʻaké (vakai, Sēnesi 6:16, footnote a). Mahalo naʻe ʻilo ʻe he tokoua ʻo Sēletí ki he talanoa ʻo e ʻaʻake ʻo Noá. (ʻOku kau ʻi he lekooti ʻa e kau Sēletí ha fakamatala fekauʻaki mo e Fakatupú ʻo aʻu ki he taua ʻo Pēpelí [vakai, ʻEta 1:3–4].) Ko ia ai, mahalo naʻe ʻikai ke fuʻu hā ngali kehe e kole ʻa e tokoua ʻo Sēletí.