Lotu maʻa Mekisī
ʻI hoku taʻu onó, ne fie maʻu ʻe ha ongomātuʻa mali matuʻotuʻa ʻi homau uōtí ke kumi ha ʻapi lelei maʻa ʻena kulī ko Mekisií. Naʻá na ʻilo ʻe ʻofaʻi ʻe homau fāmilí ʻa Mekisī. Ko ia naʻa mau pusiakiʻi ia!
Hili ha ngaahi uike siʻi mei ai, ne haʻu ha niʻihi ʻo homau ngaahi kaungāmeʻá ʻo nofo mo kimautolu ʻi ha ngaahi ʻaho siʻi. Naʻe fonu homau falé ʻi he longaʻifānau ne nau manako ke lele takai holó.
Ka naʻe anga ʻa Mekisī ia ki ha ʻapi maau mo fakalongolongo. Ne matuʻaki ilifia ia ke nofo ʻi ha fale ne fuʻu longoaʻa ai ʻa e fānaú. ʻI ha ʻaho ʻe taha ʻi he lolotonga ʻemau vaʻingá mo e kakatá, ne toki fakatokangaʻi hake pē kuo pulia ʻa Mekisī ia!
Ne mau fekumi ʻi he feituʻu kotoa pē kia Mekisī. Naʻá ku meimei tangi ʻi heʻemau feleleaki holo mo ʻeku faʻeé ʻi homau ngaahi kaungāʻapí. Naʻe aʻu ʻo mau toe vakaiʻi e ʻuluaki tauhi ʻo Mekisií. Ka naʻe ʻikai pē ke maʻu ia ʻi ha feituʻu.
ʻI heʻemau aʻu atu ki ʻapí, ne pehē hake ʻe ha tokotaha “Tau lotu maʻa Mekisī!” Ne mau tūʻulutui ʻi ha foʻi siakale ʻo fai ha kiʻi lotu faingofua. Naʻa mau kole ki he Tamai Hēvaní ke mau fakakaukau lelei ki ha feituʻu ʻe maʻu ki ai ʻa Mekisī.
ʻI heʻemau pehē pē “ʻēmení,” naʻe ongo mai ha kālou mei he tukuʻanga valá! Ko Mekisī ia!
ʻOku ʻafioʻi kitautolu ʻe he Tamai Hēvaní pea ʻokú Ne ʻofaʻi kitautolu. Mahalo he ʻikai faʻa tali mai ʻi he taimi pē ko iá ʻetau ngaahi lotú. Pea mahalo he ʻikai ke faʻa tali mai ʻe he Tamai Hēvaní ʻetau ngaahi lotú ʻi he founga ʻoku tau fie maʻú. Ka ko e founga ia ʻoku tau tupulaki ai ʻi he tuí mo e faʻa kātakí.
Kapau ʻoku ʻi ai haʻo faʻahinga palopalema pe fie maʻu pē ke talanoa, ʻe fanongo mai maʻu ai pē ʻa e Tamai Hēvaní kiate koe!