Mga Sukaranan sa Ebanghelyo
Si Jesukristo Mihangyo Kanato sa Pag-ambit sa Sakramento
Malimpyo ug mamaayo kita kon atong hinumduman ang atong Manluluwas kada semana.
The Last Supper [Ang Katapusang Panihapon], ni Carl Heinrich Bloch; litrato sa batan-ong babaye nga nag-ampo, ni Angela Suitter; Prayer at Gethsemane [Pag-ampo didto sa Getsemani], ni Del Parson; That Ye Do Always Remember Me [Nga Kamo Sa Kanunay Mahinumdom Kanako], ni Gary L. Kapp, dili mahimong kopyahon
Sa wala pa Siya mamatay, si Jesukristo mikaon og katapusang pagpangaon nga gitawag og ang Katapusang Panihapon. Sa katapusan niini nga pagpangaon, gipaila Niya ang sakramento ngadto sa Iyang mga sumusunod. Gipikas-pikas Niya ang pan ug gipanalanginan kini. “Buhata ninyo kini aron paghandom kanako” (Lucas 22:19). Dayon Siya mipanalangin ug mipaambit og usa ka kopa sa bino.
Kabahin sa Sinemana nga Pagsimba
Sa dihang ang Simbahan ni Jesukristo gipahiuli dinhi sa yuta, ang sakramento nahimo nang kabahin sa sinemana nga pagsimba. Atol sa pagsimba, ang sakramento gipanalanginan ug giapud-apod niadtong kinsa naghupot sa pagkapari. Sila mag-ampo gamit ang mga pulong gikan sa mga kasulatan (tan-awa sa Doktrina ug mga Pakigsaad 20:75–79). Dayon ang matag tawo sa kongregasyon mokaon sa pan ug moinom sa tubig aron sa paghinumdom ni Jesukristo ug sa Iyang sakripisyo alang kanato, sa paagi nga Siya mihangyo kanato.
Pagpangandam sa Pag-ambit
Aron maandam sa pag-ambit sa sakramento, kinahanglang matinuoron kitang maghunahuna mahitungod sa atong mga kinabuhi ug mga pagpili. Kinahanglang maghinulsol kita sa mga sayop ug sa mga sala sa miaging semana, lakip sa pagpangayo og kapasayloan sa Dios. Dili kita kinahanglan nga mahimong hingpit aron moambit sa sakramento, apan kinahanglan nga mapainubsanon ang atong mga kasingkasing.
Labaw pa Kay sa Pan ug Tubig
Ang pag-ambit sa sakramento usa ka sagrado, balaan nga panahon. Ang mga pag-ampo sa sakramento nagpahinumdom kanato nga samtang kita moambit sa pan ug tubig, kita naghinumdom sa lawas ug dugo nga gihatag ni Jesukristo alang kanato. Kita mosaad nga mosunod Kaniya ug magpuyo og Kristohanong kinabuhi. Kita mosaad nga mosulay sa pagtuman sa mga sugo sa Dios. Isip bugti, ang Espiritu Santo mohupay, mogiya, ug moalim kanato.
Pagbag-o sa mga Pakigsaad
Kon kadtong mga nabunyagan na kanato moambit sa sakramento uban sa putli nga kasingkasing, kita nagbag-o sa pakigsaad nga atong gihimo sa bunyag. Kini naglakip sa pagdawat sa Espiritu Santo ug malimpyohan gikan sa sala sama nga kita gibunyagan pag-usab. Mao kini ang paglaum ug kalooy nga gitanyag ni Jesus sa matag usa kanato. Dili pa gayud ulahi nga maghinulsol ug mapasaylo.
Unsa ang Gitudlo sa mga Kasulatan mahitungod sa Sakramento?
Kinahanglan nga susihon nato ang atong mga kaugalingon sa espirituhanong paagi, matinuorong mosusi sa kahiladman, sa dili pa moambit sa sakramento (tan-awa sa 1 Mga Taga-Corinto 11:28).
Human Siya Nabanhaw, si Jesus mipakita sa Iyang mga katawhan sa Amerika kon unsaon sa pag-ambit sa sakramento (tan-awa sa 3 Nephi 18).
Ang mga propeta sa modernong panahon nagsulti kanato sa paggamit sa pan ug tubig alang sa sakramento, apan unsay atong kaunon o inumon dili gayud igsapayan (tan-awa sa Doktrina ug mga Pakigsaad 27:2). Usahay kadtong adunay mga allergy kinahanglan nga mogamit og laing sama sa pan nga pagkaon.