Mga Baruganan sa Pagpangalagad

Pagsuporta sa Usag Usa sa Atong mga Paningkamot sa Paggamit sa Media sa Maalamong Paagi

Kini nga mga ideya ug mga kapanguhaan mahimong makatabang kon kadtong inyong gipangalagaran adunay mga pangutana mahitungod sa paggamit sa teknolohiya.

Mga litrato gikan sa Getty Images

Usa sa labing sagad nga mga pangutana nga giatubang sa mga pamilya sa daghang kultura karon mao ang unsaon sa paggamit sa media ug teknolohiya sa tukmang paagi. Ang digital nga mga himan karon paspas nga nahimong importante nga bahin sa daghang mga kultura, nga nakapausab sa daghan bisan gani sa atong labing yano nga inadlaw-adlaw nga mga kalihokan.

Uban sa walay katapusan nga potensyal niini alang sa kaayohan ug alang sa dautan, daghang mga indibidwal ug mga pamilya nangita alang sa maayo nga impormasyon kon unsaon sa paggamit sa media sa luwas nga paagi.

Si Marta (giusab ang mga ngalan), usa ka lider sa Simbahan sa Spain, nakakita kon sa unsang paagi nga ang iyang smartphone nakapalambo sa iyang pagtuon sa ebanghelyo, nakapahimong mas sayon nga makakontak niadtong gipangalagaran niya, nakatabang sa iyang personal nga kalamboan samtang gigamit niya ang Gospel Living nga app, ug mitugot kaniya nga makabuhat og mas daghan sa iyang calling. Apan, nasayud siya nga naglisud siya sa paghunong og gamit sa iyang telepono sa higayon nga makig-istoryahanay unta siya sa iyang pamilya.

Si Kwan, usa ka tin-edyer nga lalaki sa Korea, kanunay nga naggamit sa kompyuter sa pamilya alang sa pagsiksik [research] diha sa eskwelahan, mga assignment, ug mga proyekto. Human mabuhat ang iyang buluhaton sa eskwelahan, gigamit niya ang iyang libre nga oras sa online nga pagdula. Nabalaka ang iyang mga ginikanan.

Kada adlaw, si Declan, usa ka young adult sa Kenya, nakakita og mga tawo nga naggunit og mga smartphone. Ingon og makakuha dayon kini og impormasyon nga makahimo sa iyang kinabuhi nga mas sayon ug mas makahinam, lakip sa mga kasulatan, mga magasin, ug ubang sulod [content] kalabut sa Simbahan. Apan, human og bayad sa iyang mga galastuhan, wala nay kwarta nga nahibilin para sa usa ka smartphone. Mibati si Declan nga nabiyaan.

Samtang mangalagad kita, unsaon nato sa pagsuporta ug paglig-on sa atong mga kaigsoonan sa ilang pagpangita og mga tubag mahitungod niining usahay makalibog nga hilisgutan? Aniay pipila ka mga ideya ug mga kapanguhaan alang sa mga paagi sa paggamit sa media sa maalamong paagi.

Mga Sugyot alang sa Paggamit sa Media ug Teknolohiya sa Maalamong Paagi

• Pangita og mapuslanong mga paagi sa paggahin sa inyong bililhon nga panahon gawas sa teknolohiya, lakip sa pagpangalagad sa uban, pagpalambo og mga kahanas ug mga talento, ug pag-apil sa uban sa makahuluganon nga mga kalingawan ug ang ubang mga kalihokan.

• Pagbaton og piho nga katuyoan alang sa paggamit sa teknolohiya, ug limitahi ang paggamit niini kon kamo gilaayan, nag-inusara, nasuko, o naugtas. Kini ug ubang nagkadaiyang mga emosyon makahimo kaninyo nga mahuyang o matintal sa dili angay nga paggamit sa teknolohiya. Pangita og maayo nga mga paagi sa pagtubag sa mga emosyon.

• Mahimong disiplinado. Paggamit og mga setting nga magtugot kaninyo sa pagsubay o paglimita sa panahon nga gigahin sa inyong device.

• Mahimong sama sa Manluluwas. Hatagi og hingpit nga pagtagad ang usa ka tawo kon sila nakig-istorya kaninyo.

• Unaha ang personal nga koneksyon. Pagmintinar og balanse tali sa elektronik ug dili elektronik nga mga matang sa komunikasyon, ilabi na kon magpaambit og kinasingkasing nga mga pagbati o importante nga mga hunahuna.

• Paghimo og regular nga mga pagpahulay. Dapita ang tanan sa pamilya nga tuyuon ang paghimo og regular nga mga pagpahulay gikan sa ilang mga device.

• Bansaya ang inyong kaugalingon nga dili motubag dihadiha dayon sa matag pagpahibalo ug pag-alerto.

Pagsugod og Pag-istoryahanay

• Pagsugod og panaghisgutan bahin niining importante nga hilisgutan pinaagi sa pagpaambit sa mga panglimbasug o mga pangutana nga aduna kamo kabahin sa paggamit sa teknolohiya ug media.

• Pangutan-a kon unsay ilang nakit-an nga makatabang kanila. Adunay daghan nga inyong makat-unan sa paggamit niini nga paagi. Mahimong makahatag usab kini og mga oportunidad sa pagpaambit sa pipila sa unsay inyong nakat-unan.

• Mga kasulatan nga mahimo ninyong ipaambit: Ang mga propeta midapit kanato nga mahimong maalamon (tan-awa sa Jacob 6:12), nga mahimong mapugnganon sa tanan nga mga butang (tan-awa sa Alma 7:23), sa pagbantay sa atong mga hunahuna, mga pulong, ug mga buhat (tan-awa sa Mosiah 4:30), ug sa pagkahimong maayong mga panig-ingnan (tan-awa sa 1 Timoteo 4:12).

Makatabang nga mga Kapanguhaan

• Pagkat-on kon sa unsang paagi nga ang pagdumala sa inyong paggamit sa teknolohiya makatabang kaninyo nga mas makakonektar sa pamilya ug mga higala. Basaha ang “Unsaon sa Pagdumala sa Digital nga mga Himan [Devices] ug Mabawi og Balik ang Inyong Pamilya,” Liahona, Ago. 2020, 26–31.

• Basaha ang Mga Pag-amping sa Paggamit sa Teknolohiya (2018). Bisan og gisulat alang sa mga misyonaryo, ang mga sumbanan niini nga booklet mahimong mapahiangay ngadto sa bisan kinsa nga indibidwal o pamilya. Anaa kini sa 28 ka pinulongan diha sa Gospel Library o sa giimprinta pinaagi sa mga distribution center o sa online store.