Digital Lamang: Mga Tingog sa mga Santos sa Ulahing mga Adlaw
Gigiyahan sa Ginoo
Ang Ginoo nakaila kanato ug sa unsay angay alang kanato karon.
Gilitratohan ni Cody Bell
Giselle
Sa wala pa kami maminyo, si André nagtrabaho sa iyang pagkadoktor sa pilosopiya [PhD] ug nakadawat og usa ka posisyon nga motrabaho sa University of Michigan. Nagminyo kami ug mibalhin ngadto sa Michigan. Sa kaulahian, si André nagsugod nga nagkaproblema sa trabaho ug gusto nga mobalhin og trabaho.
Batan-on pa kami, bag-o lang kaming naminyo, ug wala kami masayud unsay buhaton. Nakahukom kami nga mag-ampo mahitungod niini.
André
Usa ka adlaw, miadto ko sa unibersidad ug nakakita og usa ka pisara diin gibutang ang anaa nga mga posisyon sa panarbaho. Mi-apply ko sa tulo ka lain-laing trabaho. Sulod sa usa ka semana, gitanyagan ko sa tanang tulo ka trabaho.
Giselle
Naghunahuna kami kon unsay buhaton. Nag-ampo kami pag-usab. Ang usa ka posisyon anaa didto sa England, apan gusto namong magpabilin sa Estados Unidos. Ang usa anaa sa Texas, ug ang laing trabaho anaa sa Maryland duol sa Washington, D.C. Ang trabaho sa Maryland kay didto sa NASA. Si André usa ka scientist, busa ang NASA ingon og usa ka maayong dapit nga adtoan.
André
Sa among pagbalhin ngadto sa Maryland, nagdrayb ko samtang natulog si Giselle. Sayo kadto sa buntag sa dihang nakita nako ang Templo sa Washington D.C.
“Pagmata! Pagmata! Makita ba nimo?” Miingon ko kang Giselle. “Sama kini sa usa ka kastilyo!”
Giselle
Giingnan nako si André nga tingali usa ka adlaw makaadto kami ug makabisita. Wala kami ideya kon unsa kadto. Pipila ka adlaw human miabut sa Maryland, miadto ko sa librarya aron mogamit sa internet sa pag-aplay og mga trabaho ug mosusi sa akong email.
Usa ka babaye kinsa nagtrabaho didto nakadungog sa akong tonada ug nangutana kon taga-asa ko. Giingnan nako siya nga taga-Brazil ko ug nagsugod kami sa pag-istorya. Ang iyang ngalan mao si Edna. Giingnan nako siya nga bag-o lang mi nga mibalhin gikan sa Michigan ug misulti kon diin kami nagpuyo.
“Nagpuyo ko sa samang mga apartment,” miingon ni Edna.
Sa dihang mibalik ko sa librarya sa pagkasunod adlaw, si Edna miingon, “Nalipay kaayo ko nga nabalik ka. Gusto kong dapiton ka ug ang imong bana sa akong balay alang sa panihapon.”
Naghunahuna ko nga kahibulongan kadto tungod kay siya wala makaila kanako. Dayon miingon siya, “Nag-ampo ko mahitungod kanimo tungod kay adunay espesyal gayud nga butang nga akong nabati dihang nahimamat ka nako kagahapon.”
Miadto kami sa iyang balay ug nakahibalo nga iyang bana bag-ohay lang namatay. Human sa panihapon, mitukar siya sa, “Sundon Ko Ikaw Ginoo” (Mga Himno, nu. 133) diha sa piano. Miingon siya nga kini ang paborito nga himno sa iyang bana ug gipatukar kini sa haya sa iyang bana. Dayon naghisgot siya kanamo kabahin sa plano sa kaluwasan ug midapit kanamo sa pag-adto sa simbahan uban kaniya.
Miadto kami sa simbahan, ug ang mga tawo didto maabi-abihon. Nakahukom kami nga moadto sa sunod Dominggo. Miuyon kami nga magpatudlo sa mga misyonaryo. Mitanyag si Edna nga adto sa iyang balay ipahigayon ang mga leksyon. Sulod sa lima ka bulan misimba kami matag Dominggo. Ang among mga kasingkasing ug mga espiritu giandam alang sa bunyag.
André
Sa dihang gipahibalo ang among bunyag, ang tanan ingon og natingala. “Wow, dili kamo mga miyembro?” miingon sila. “Apan ania kamo dinhi matag semana!” Ang among bunyag espesyal. Hapit ang tibuok ward mitambong.
Nasilyo kami sa Templo sa Washington D.C. pagkahuman sa usa ka tuig. Sa dihang miadto kami sa templo, nakaamgo kami nga kini ang kastilyo nga among nakit-an sobra sa usa ka tuig na ang milabay!
Giselle
Human nga nasilyo kami sa templo, daghang butang ang wala magmalampuson.
Human sa Septyembre 11, 2001, lisud alang kanamo ang pagbag-o sa among mga visa. Naguol ko tungod kay bag-o lang kong migradwar sa usa ka kolehiyo sa komunidad ug mi-apply alang sa usa ka hingpit nga scholarship sa University of Maryland. Wala ko makakuha sa scholarship, ug ang laboratoryo nga gitrabahoan ni André manirado na.
Naghunahuna kami nga tingali miabut na ang panahon alang kanamo nga mobalik ngadto sa Brazil.
André
Ang among bishop misulti kanamo nga makatabang kami sa daghang miyembro sa Brazil ug molambo sa mga paagi nga tingali dili mahitabo kanamo sa Estados Unidos. Mitambag siya kanamo nga magpabiling duol sa Simbahan.
“Adto sa Brazil ug pagserbisyo sa Ginoo,” miingon siya.
Human nga nagpuyo sa Brazil sulod sa taudtaod nga panahon, ang among presidente sa stake mianhi sa among balay ug gitawag ko nga moserbisyo isip bishop. Morag nasayud na ko nga tawagon ko. Sulod sa pipila ka gabii sa wala pa ang akong tawag, dili ko makatulog. Naghunahuna ug nagtuon ko.
Giselle
Natingala ko kon unsay nahitabo. Nakita nako siya nga nausab sa wala pa ang iyang tawag.
André
Sa dihang nagsugod ko sa akong calling, ang among ward adunay 80 ka aktibong mga miyembro. Sa dihang na-release ko, mas daghan ang nagsimba kanunay, ug 12 ka misyonaryo ang miadto sa misyon gikan sa among ward. Nindot kaayo kadto!
Niadtong higayuna nga na-release ko, si Presidente Dieter F. Uchtdorf gi-release gikan sa Unang Kapangulohan. Nakahinumdom ko nga nag-ingon si Presidente Russell M. Nelson nga si Presidente Uchtdorf adunay bag-o ug importante nga mga responsibilidad sa Korum sa Napulog Duha ka mga Apostoles.
Tulo ka bulan ang milabay, gitawag ko isip unang magtatambag sa kapangulohan sa misyon. Wala ko makaserbisyo og misyon, apan ganahan ko sa akong calling. Ganahan ko nga magtrabaho uban sa mga misyonaryo. Ang Ginoo nakaila kanako. Nasayud Siya nga kinahanglan kong ma-release isip usa ka bishop aron makaserbisyo ko sa panahon ug dapit nga husto alang kanako karon.