“Gusto Ko nga Moadto sa Paraiso”
Dihang nag-ampo ko ug nangutana sa Dios kabahin niining bag-o nga dalan, mibati ko nga mas nakombinser sa kamatuoran nga akong nakit-an.
Litrato gikan sa Getty Images, giposingan sa modelo
Ako usa ka masaligon nga miyembro sa laing simbahan, apan misugod ko sa pagtuon sa mga pagtulun-an niini mahitungod sa purgatoryo. Nagtudlo kining ideya nga ang kalag, human sa pisikal nga kamatayon, isulod ngadto sa usa ka dapit nga susama sa bilanggoan, diin kinahanglan gayud nga maputli kini sa dili pa moadto sa paraiso.
Samtang naghunahuna ko mahitungod sa pag-antus sa kalag sa purgatoryo, namalandong ko sa akong kaugalingong espirituhanon nga kaugmaon ug sa akong relasyon ni Jesukristo. Gisugdan nako sa pag-ampo, “Unsay kinahanglan nakong buhaton aron makalingkawas sa purgatoryo? Gusto kong moadto sa paraiso.”
Ang unang butang nga misantop sa akong hunahuna mao ang pagsunod sa Napulo ka Sugo. Mibati ko nga kon akong buhaton, ang kalooy sa Ginoo motugot kanako nga malikayan ang purgatoryo. Ako mipasalig sa pagtuman sa mga sugo ug misugod og grabing panahon sa pagpuasa, pag-ampo, pagtuon sa mga kasulatan, ug pagpamalandong.
Niining panahona, mibati ko nga naaghat sa pagpangutana og dili kasagaran nga pangutana ngadto sa usa ka doktor diha sa klinika diin nagtrabaho ko isip labaw nga accountant.
“Dr. Thibaut,” miingon ko, “ang Ginoong si Jesukristo anaa ba sa inyong simbahan?”
Namahayag siya nga nahisakop siya sa Ang Simbahan ni Jesukristo sa mga Santos sa Ulahing mga Adlaw. Gikan nianang higayona, ang Espiritu migiya sa among panaghisgutan. Nangutana ko niya kabahin sa kalainan tali sa iyang simbahan ug sa akoa. Gisultihan ako niya mahitungod sa Basahon ni Mormon. Samtang among gipadayon ang among panag-istoryahanay, ang kalipay mipuno sa akong kasingkasing. Mibati ko nga nakadawat ko og mga tubag sa akong mga pag-ampo.
Paglabay sa duha ka adlaw ang mga misyonaryo mihatag kanako og Basahon ni Mormon, diin akong gibasa ug gitun-an uban kanila. Akong nasuta nga maanindot kaayo ang makat-on og bag-ong mga butang gikan sa mga kasulatan. Misugod ko sa pagtuman sa Pulong sa Kaalam.
Sa dihang nakaamgo ko nga nawad-an ko og interes sa akong simbahan, diin ako nalambigit pag-ayo, naghunahuna ko kon unsay nahitabo. Nag-ampo ko ug nangutana sa Dios kabahin niining bag-o nga dalan. Sa dihang akong gibuhat, mibati ko nga mas nakumbinser sa kamatuoran nga akong nakaplagan. Mihukom ko nga mopasakop sa Simbahan, bisan og nasayud ko nga ako mag-atubang og pagpanggukod.
Ang pagpanggukod miabut gayud, apan ang Ginoo milig-on kanako. Ako nasayud nga Ang Simbahan ni Jesukristo sa mga Santos sa Ulahing mga Adlaw mao ang tubag sa akong sinsero nga pag-ampo: “Gusto kong moadto sa paraiso.” Nasayud ko nga ako makaadto didto human ko mamatay, kon ako magpabilin nga matinud-anon sa mga sugo sa Dios.