Ang Mahinungdanong Tahas sa Kababayen-an

Ni Presidente M. Russell Ballard

Akting nga Presidente sa Korum sa Napulog Duha ka mga Apostoles

Gikan sa usa ka pakigpulong sa Komperensya sa Kababayen-an sa Brigham Young University, “Women of Dedication, Faith, Determination, and Action [Kababayen-an nga adunay Pagpahinungod, Hugot nga Pagtuo, Determinasyon, ug Aksyon],” nga gihatag niadtong Mayo 1, 2015.

Ang buhat sa gingharian sa Dios dili makatuman sa tinuod nga kapalaran niini kon wala ang padayon nga pag-uswag nga magtambayayong kauban ang matinud-anon, talagsaon nga mga igsoong babaye sa Simbahan.

Ang kababayen-an adunay talagsaon nga impluwensya. Walay laing makatabang sa pagpauswag sa gingharian sa ebanghelyo ug paghimo sa kalibutan nga mas maayong dapit sama sa ilang mahimo.

Kon kamo nga mga igsoong babaye moapil sa ubang mga babaye sa pakigsaad diha sa panaghiusa ug panag-uyon, walay kinutoban ang inyong impluwensya alang sa kaayo. Nasaksihan nako ang inyong mahinungdanon ug mahangturon nga impluwensya sa indibidwal nga mga kinabuhi ingon man usab sa mga pamilya, ug nakita ko kini sa dili maihap nga mga kultura ug mga nasud sa tibuok kalibutan.

Nakakita ko sa unsay inyong makab-ot diha sa mga branch, mga ward, mga stake, mga misyon, mga templo, ug sa kinatibuk-ang mga buluhaton sa Simbahan. Ang inyong mga kontribusyon—sa dagko ug gagmay nga mga negosyo ug mga organisasyon nga gitukod aron motabang sa nanginahanglan [charity], ingon man usab sa pangsibiko, pang-edukasyon, panglawas, ug pangpaugnat sa kusog [sports] nga mga organisasyon—dili masukod.

Kababayen-an diha sa mga Konseho

Sulod sa katuigan namulong ko mahitungod sa gahum sa mga konseho nga adunay matinud-anong kababayen-an nga miapil. Ang inyong panabut ug tambag mahinungdanon kaayo. Karon ang Ginoo buhong nga mipanalangin sa Simbahan ug sa kalibutan tungod kay mas daghang sister nga mga misyonaryo ang matinud-anon nga nagserbisyo sa mga posisyon sa pagpangulo sa misyon ug miapil sa mga konseho sa pagpangulo sa misyon. Mas daghan ang mas sayo nga nakadawat sa ilang mga pagtuga [endowment], sa ingon nagpadako sa gidaghanon sa kababayen-an nga mipakigsaad didto sa templo nga nagserbisyo sa Simbahan. Ang sister nga mga lider sa Kinatibuk-ang mga Kapangulohan nag-ampo ug namulong sa kinatibuk-ang komperensya.

Kababayen-an diha sa mga Kasulatan

Pipila ka kababayen-an gusto nga makakita sila og dugang nga mga istorya sa kababayen-an diha sa mga kasulatan ug diha sa kasaysayan sa Simbahan. Kinahanglan natong mapalambo ang kahanas sa pagpangita sa ilang impluwensya, sama sa gibuhat sa usa ka batan-ong sister. Miingon siya, “Siguro si Mormon adunay talagsaon nga asawa nga nakapadako og talagsaong anak nga lalaki sama ni Moroni!”

Kon mabinantayon kamong mangita ug uban sa husto nga espiritu, makakita kamo og susama nga mga pagpakita sa epektibo nga pag-amuma diha sa tibuok kasulatan.

Sulod sa pipila ka tuig na karon, ang Simbahan mitutok sa atensyon diha sa matinud-anong mga sister sa Simbahan ug sa ilang mga kontribusyon. Sama pananglit, dapiton ko kamo sa pagsusi sa hilisgutan nga “Women of Conviction” nga makita sa history.ChurchofJesusChrist.org

Ang tahas sa pioneer nga mga igsoong babaye talagsaon. Sa dihang nagsulat mahitungod sa mga pioneer, ang usa ka tigsulat, kinsa dili usa ka Santos sa Ulahing Adlaw, miingon, “Ang ilang kababayen-an talagsaon.”¹

Samtang mangita kita ug makakaplag og kababayen-an diha sa atong mga kasulatan ug sa atong kasaysayan, mas makakita kita sa gahum ug impluwensya nga aduna sa kababayen-an diha sa atong pamilya, komunidad, sa Simbahan, ug sa kalibutan.

Pagbalanse sa mga Kapilian

Sa akong tibuok kinabuhi nakakita kami og daghang kababayen-an nga gitudlo ug gipili ngadto sa publiko nga mga katungdanan, mobuhat sa mga posisyon isip mga CEO sa dagkong mga korporasyon ug mga organisasyon, ug nag-anam og kadaghan ang nakasulod sa inila nga mga eskwelahan sa negosyo, balaod, ug medikal.

Misulti si Joseph Smith sa Relief Society niadtong 1842, “Ako karon mohatag sa yawe nganha kaninyo sa ngalan sa Dios, ug kini nga society maglipay ug ang kahibalo ug panabut modagayday sukad niini nga panahon—kini mao ang sinugdanan sa maayong mga adlaw [alang sa kababayen-an].”²

Atong makita ang katumanan niining propetikanhon nga panan-awon samtang ang bag-ong mga oportunidad ug mga kalamboan alang sa kababayen-an nahitabo sa mga paagi nga wala pa makita sukad. Ang pagbalanse sa tanan taliwala sa tanang anaa nga mga kapilian mahimong usa ka hagit. Sa katapusan, kadaghanan kanato kinahanglang mopili taliwala sa nag-indigay nga mga kapilian.

Siyempre, kita adunay usa ka balaan nga sundanan nga pagasundon ingon nga gilatid diha sa “Ang Pamilya: Usa ka Pamahayag ngadto sa Kalibutan,” apan nasayud kita nga ang mortalidad mahimong komplikado. Daghang kababayen-an wala maminyo sa dugay na nga panahon. Ang pipila ka kababayen-an naminyo. Ang uban mahimong single kon ang usa ka kapikas mamatay o kon sila magdiborsyo. Ug pipila ka kababayen-an mahimong dili gayud maminyo.

Bisan pa niana, kon kita matinud-anon ug molahutay hangtud sa katapusan, walay matarung nga tinguha ang ihikaw, ug ang tanan nga mga panalangin madawat sa katapusan. Matag usa kaninyo kinahanglan gayud masayod kon unsay gusto sa Ginoo alang kaninyo, sumala sa mga kapilian nga aduna kamo.

Sa panahon nga makahibalo kamo sa kabubut-on sa Ginoo, makapadayon kamo uban sa hugot nga pagtuo sa pagtuman sa inyong indibidwal nga katuyoan.

Mga Panalangin nga Giandam

Kon ang mga miyembro sa Simbahan kinsa nagsimba diha sa templo andam nga maminaw, sila makaamgo nga ang Ginoo adunay talagsaong mga panalangin nga giandam alang sa Iyang matinud-anong mga anak sa tibuok kahangturan.

Ug unsa kadto nga mga panalangin? Kini nga panabut sumala sa konteksto gikan ni Presidente Dallin H. Oaks, Unang Magtatambag sa Unang Kapangulohan, mipasabut niini: “Ang katuyoan sa mortal nga kinabuhi ug ang misyon sa Ang Simbahan ni Jesukristo sa mga Santos sa Ulahing mga Adlaw mao ang pag-andam sa mga anak sa Dios alang sa ilang kapalaran—nga mahimong sama sa atong langitnong mga ginikanan.”³

Ang istorya sa ebanghelyo usa ka istorya sa pamilya—walay sobra, walay kulang. Kini magsugod sa langitnong mga ginikanan, ug kini matapos uban sa mga anak nga nagpanaw sa usahay makadasig, usahay bug-at kaayo nga mga hagit sa mortalidad ug mobalik sa ilang langitnong panimalay, nga nakadawat sa tanan nga mahinungdanon nga mga ordinansa sa mahangturong kahimayaan.

Mao kana ang istorya sa atong mga kinabuhi. Ang Dios mihatag kanato sa latid, apan gisalig Niya kanato ang pagtino sa mga detalye pinaagi sa atong mga pagpili ug pagkamatinud-anon. Adunay usa ka talagsaong malipayong pagtapos nga giandam alang sa tanan kinsa magtinguha niini. Apan sa dili pa nato maangkon kini, kinahanglan mahimo kitang mas labaw pa kay sa Iyang mga anak lamang—kinahanglan mahimo kitang Iyang mga disipulo.

Ang Kababayen-an isip mga Disipulo ni Kristo

Ang kinabuhi napuno sa mga makabalda nga adunay kalagmitan nga modala kanato palayo gikan sa mahinungdanon nga mga pagtulun-an sa Simbahan—ilabi na sa Pag-ula ni Jesukristo.

Si Propeta Joseph Smith miingon, “Ang sukaranan nga mga baruganan sa atong relihiyon mao ang pagpamatuod sa mga Apostoles ug sa mga Propeta, mahitungod ni Jesukristo, nga Siya namatay, gilubong, ug mibangon sa ikatulong adlaw, ug mikayab ngadto sa langit; ug sa ubang mga butang nga may kalabutan sa atong relihiyon sumpay lamang niini.”⁴

Ang Pag-ula ni Jesukristo mao ang sentro sa atong mensahe! Kini mao ang atong kinauyokan nga mithi. Kini mao ang atong sentro sa doktrina. Kini mao ang kasingkasing ug kalag sa Ang Simbahan ni Jesukristo sa mga Santos sa Ulahing mga Adlaw.

Kon wala pa ninyo mabati ang kamatuoran ug gahum sa Pag-ula sa Manluluwas diha sa inyong kinabuhi, dapiton ko kamo sa pagtutok og usab sa importante nga mensahe sa Pagpahiuli—usa ka mensahe nga nagpahayag nga kita “nahimo nga hingpit pinaagi ni Jesus ang tigpataliwala sa bag-o nga pakigsaad, kinsa nagbuhat niini nga hingpit nga pag-ula pinaagi sa pagpaagas sa iyang kaugalingon nga dugo” (Doktrina ug mga Pakigsaad 76:69).

Mga igsoong babaye, palihug buhata ang bisan unsa nga gikinahanglan aron magpabilin nga nakatutok sa yano ug labing importante nga mensahe sa Pagpahiuli. Dawata kini. Sabta kini. Hangupa kini. Higugmaa kini. Ipaambit kini. Panalipdi kini.

Kababayen-an sa Gahum sa Pakigsaad

Karon, ako mohangyo kaninyo sa pagbuhat sa samang butang nga gihangyo ni Propeta Joseph Smith sa mga igsoong babaye sa Relief Society sa pagbuhat. “Ang … Relief Society dili lamang sa paghupay sa kabus, apan sa pagluwas sa mga kalag,” miingon siya.⁵

“Ang matag igsoong babaye dinhi sa Simbahan kinsa mihimo og mga pakigsaad uban sa Ginoo adunay usa ka balaan nga mando aron sa pagtabang sa pagluwas sa mga kalag, sa pagpangulo sa mga babaye sa kalibutan, sa paglig-on sa mga panimalay sa Zion, ug sa pagtukod sa gingharian sa Dios.”⁶ Palihug tabangi kami sa pagpatunhay sa Simbahan nga magpadayon pinaagi sa pagtabang nga makamugna og dugang nga pagtuo diha sa mga kinabuhi sa atong indibidwal nga mga miyembro.

Ang matarung ug matinud-anon nga kababayen-an kanunay nagbuhat og importanting tahas sa pagluwas og mga kalag ug sa pagpanalipod sa gingharian sa Dios. Apan, kamo mga kababayen-an niining katapusang dispensasyon adunay labihan ka importante nga mga tahas ug mga responsibilidad nga tumanon. Kamo mga kababayen-an sa determinasyon, pagtuo, dedikasyon, ug aksyon.

Sama sa matinud-anon nga mga igsoong babaye sa nangagi, kinahanglang makakat-on kamo unsaon sa paggamit ang awtoridad sa pagkapari diin kamo gitugahan aron sa pag-angkon sa matag mahangturon nga panalangin nga mainyo.

Mohangyo ko sa atong Langitnong Amahan sa pagpanalangin kaninyo nga unta makabaton kamo sa kalinaw ug kalma nga kasiguroan nga ang unsay inyong gibuhat diha sa Simbahan mahinungdanon sa pagtubo ug sa pagpangandam niini nga kalibutan alang niana nga adlaw sa dihang ang Ginoo ug Manluluwas moingon, “Igo na kana,” ug moanhi aron sa pagmando ug paghari.

Ang buhat sa gingharian sa Dios magpadayon sa pag-uswag, apan dili kini makatuman sa tinuod nga kapalaran niini kon wala ang padayon nga pag-uswag nga magtambayayong kauban kamo nga matinud-anon, talagsaon nga mga igsoong babaye sa Simbahan.