Dali, Sunod Kanako
Doktrina ug mga Pakigsaad 20–22
Ang Nag-uswag nga Simbahan
Ni Elder Benjamín De Hoyos
Sa Seventy
Ang Simbahan sa Manluluwas napahiuli uban sa tinuod nga doktrina, ang gahum sa pagkapari, ug sagrado nga mga ordinansa.
Litrato pinaagi ni James Iliff Jeffery
Mga tuig ang milabay, atol sa akong unang semana nga nagtrabaho sa buhatan sa Simbahan sa public affairs sa Mexico, nakadawat kami og imbitasyon gikan sa usa ka pakighinabi nga pasundayag [talk show] sa radyo. Ang pasundayag, nga naghisgot sa mga relihiyon sa kalibutan mitanyag kanamo og 45 ka minuto sa pag-istorya mahitungod sa Simbahan.
“Talagsaon kaayo kini nga oportunidad,” giingnan nako ang Presidente sa Area samtang gipaambit nako ang mga detalye sa imbitasyon. “Kinsa man ang atong ipadala sa pagrepresentar sa Simbahan?”
Mitubag siya, “Ikaw, siyempre.”
Bag-o pa ako sa katungdanan ug batan-on pa kaayo. Nasurprisa ko nga wala siya mosugyot og usa ka tawo nga adunay mas daghan nga kasinatian. Bisan pa niana, nag-ampo ko, nangandam kutob sa akong mahimo, ug midapit og kauban nga mokuyog kanako. Sa wala madugay anaa na kami sa estasyonan sa radyo.
“Ania uban kanato niining gabhiona ang duha ka representante gikan sa Ang Simbahan ni Jesukristo sa mga Santos sa Ulahing mga Adlaw,” miingon ang direktor sa programa samtang iya kaming gipaila. Dayon nangutana siya, “Nganong ang inyong simbahan adunay taas kaayo nga ngalan? Nganong dili mo mogamit og mas mubo, mas komersyal nga ngalan?”
Ang akong kuyog ug ako nalipay sa pagtubag niana nga nindot nga pangutana. Gipasabut namo nga ang ngalan sa Simbahan wala gipili sa usa ka tawo. Kondili, ang Manluluwas Mismo ang mipadayag niini pinaagi sa usa ka propeta sa ulahing mga adlaw (tan-awa sa Doktrina ug mga Pakigsaad 115:4).
Ang direktor sa programa matinahurong mitubag, “Nan atong sublion ang ngalan sa kinatibuk-an niini uban sa dakong kalipay.” Ug iyang gibuhat—sa makadaghan nga mga higayon.
Nakahinumdom gihapon ko sa nindot nga diwa nga among gibati samtang gipasabut namo ang gigikanan sa ngalan sa Simbahan ug sa unsang paagi nga kana nga ngalan nagpasabut sa Manluluwas ug sa mga miyembro sa Iyang Simbahan karon. Ang akong kuyog ug ako mitubag og daghang pangutana, daghan niini nakasentro diha sa ngalan sa Simbahan. Ang kasinatian usa ka panalangin alang sa Simbahan sa among dapit ug alang kanako.
Niadtong 2018, si Presidente Russell M. Nelson mihangyo sa mga Santos sa Ulahing mga Adlaw “sa pagpahiuli sa saktong ngalan sa Simbahan sa Ginoo.” Misaad siya nga kon buhaton nato ang atong labing maayo sa pagsunod niana nga tambag, ang Ginoo “mobu-bu sa Iyang gahum ug mga panalangin diha sa mga ulo sa mga Santos sa Ulahing mga Adlaw, sa mga paagi nga wala nato makita sukad.”1 Si Presidente Nelson mibag-o niana nga saad atol sa Abril 2020 nga kinatibuk-ang komperensya.2
Sulod sa mubo nga panahon sukad si Presidente Nelson mihangyo kanato sa paggamit sa husto nga ngalan sa Simbahan, ang iyang saad nagsugod na sa pagkatuman. Uban sa minilyon nga mga miyembro nga nagpaambit sa tukma nga ngalan sa Simbahan, nagkadaghan ang mga tawo nga nasayud nga kita nagtuo ug nagsimba ni Ginoong Jesukristo. Isip resulta, nagtuo ko nga ang Simbahan nagtagamtam og pagbag-o sa impluwensiya ug pagtahud. Mas daghang tawo ang gustong maminaw, ug ang Pagpahiuli nag-uswag.
Samtang ang mga anak sa Dios makasabut nga ang pagpadayag nagpadayon karon ug nga ang Simbahan sa Manluluwas napahiuli uban sa tinuod nga doktrina, gahum sa pagkapari, ug sagradong mga ordinansa, mas ganahan pa silang masayud og dugang kabahin sa Pagpahiuli.
Buhi nga mga Propeta
Ang seksyon 20 sa Doktrina ug mga Pakigsaad nagsugod uban niining mahinungdanong mga pulong: “Ang pagsugod sa Simbahan ni Kristo niining katapusan nga mga adlaw” (bersikulo 1; emphasis gidugang). Sukad sa organisasyon sa Simbahan niadtong Abril 6, 1830, ang Ginoo ang migiya niana nga pagsugod pinaagi sa mga lider nga Iyang gitawag.
Si Propeta Joseph Smith “gidasig sa Espiritu Santo sa pagpahimutang sa tukuranan” sa gipahiuli nga Simbahan. Sa samang paagi, sa atong panahon ang Ginoo nagdasig ni Presidente Nelson sa pagpangulo sa Simbahan, sa “pagtukod niini” ug sa “pagbuhat sa kahimoan sa Zion sa labing gamhanan nga gahum alang sa kaayohan” (Doktrina ug mga Pakigsaad 21:2, 7).
Atol sa Abril 2020 nga kinatibuk-ang komperensya, ang mga miyembro sa Simbahan nakakita sa pagkumpirmar kalabut sa padayon nga giya sa Ginoo ug sa padayon nga pag-uswag sa Iyang Simbahan sa dihang gibasa ni Presidente Nelson ang “Ang Pagpahiuli sa Kahingpitan sa Ebanghelyo ni Jesukristo: Usa ka Pamahayag ngadto sa Kalibutan sa Ikaduhang Siglo nga Kasaulogan”:
“Malipayon kaming modeklarar nga ang gisaad nga Pagpahiuli padayon nga mahitabo pinaagi sa nagpadayon nga pagpadayag,” miingon siya. “Ang kalibutan dili na gayud mahimong sama kaniadto.”
Si Presidente Nelson midugang, “Ang kalangitan bukas. Kami momatuod nga ang Dios mipahibalo sa Iyang kabubut-on alang sa Iyang pinalanggang mga anak nga lalaki ug mga anak nga babaye.”3
Ang Ginoo misaad sa pagpanalangin sa nag-unang mga miyembro sa Simbahan kinsa naminaw sa Iyang kabubut-on ingon nga gipadayag pinaagi ni Propeta Joseph Smith. Kadto nga mga saad molakip kanato samtang mosunod kita sa pinili nga mga sulugoon sa Ginoo karon: “Ang mga ganghaan sa impyerno dili makabuntog batok kanimo; oo, ug ang Ginoong Dios mopatibulaag sa mga gahum sa kangitngit gikan sa imong atubangan, ug mohimo sa mga langit sa pagkurog alang sa imong kaayohan, ug himaya sa iyang ngalan” (Doktrina ug mga Pakigsaad 21:6).
Si Presidente ug Sister Nelson nga nagtimbaya sa mga miyembro sa Simbahan human sa iyang debosyonal niadtong Mayo 16, 2019, sa Kona, Hawaii.
Tinuod nga Doktrina
Usa sa mga butang nga nakat-onan sa batan-ong si Joseph Smith didto sa Sagradong Kakahoyan 200 ka tuig na ang milabay mao nga ang mga relihiyoso nga mga magtutudlo sa iyang panahon nagtudlo “og mga doktrina nga mga sugo sa mga tawo, nga may hulagway sa pagkadiosnon, apan sila nanghimakak sa gahum niana” (Joseph Smith—Kasaysayan 1:19).
Si Elder Jeffrey R. Holland sa Korum sa Napulog Duha ka mga Apostoles bag-ohay lang nga mideklarar nga samang “relihiyusong mga pagkulang” sa atong panahon karon ang “hinungdan nga ang kagutom ug paglaum sa uban wala gihapon matubag.” ug nga “daghan nianang [doktrinal nga] kakulang sa katagbawan nagpahilayo sa uban gikan sa naandan nga eklisyastikanhong mga institusyon.”4
Unsay gikinahanglan sa kalibutan, ug unsay gitanyag sa Ginoo, mao ang matam-is, makaluwas nga mga doktrina nga makita diha sa kayano ug kahingpitan niini diha sa gipahiuli nga ebanghelyo.
Ang tinuod nga doktrina makaplagan diha sa Basahon ni Mormon, diin naglangkob sa “kahingpitan sa ebanghelyo ni Jesukristo ngadto sa mga Hentil ug ngadto sa mga Judeo usab” (Doktrina ug mga Pakigsaad 20:9). “Nagtudlo kini sa katuyoan sa kinabuhi ug nagpasabut sa doktrina ni Kristo, nga mahinungdanon alang niana nga katuyoan. … Ang Basahon ni Mormon nagpamatuod nga ang tanang tawhanong nilalang mga anak nga lalaki ug mga anak nga babaye sa usa ka mahigugmaong Amahan sa Langit, nga Siya adunay balaan nga plano alang sa atong kinabuhi, ug nga ang Iyang Anak, si Jesukristo, namulong karon sa samang paagi sa karaang panahon.”5
Ang tinuod nga doktrina makaplagan diha sa Doktrina ug mga Pakigsaad, nga ang usa ka propeta mitawag nga “ang bugkos nga nagsumpay tali sa Basahon ni Mormon ug sa nagpadayong buhat sa Pagpahiuli pinaagi ni Propeta Joseph Smith ug sa iyang mga sumusunod.”6
Ang tinuod nga doktrina makaplagan usab diha sa mga pagtulun-an sa mga propeta ug apostoles sa modernong panahon nga gitawag sa Ginoo sa atong panahon aron sa pagpanalipod kanato gikan sa pagpanglingla. Nasayod kita nga unsay ilang gisulti ubos sa impluwensya sa Espiritu Santo mao ang kabubut-on, hunahuna, pulong, ug tingog sa Ginoo (tan-awa sa Doktrina ug mga Pakigsaad 68:4).
Ang tinuod nga doktrina makapadasig, makapalig-on, ug makahupay tungod kay kini nagdapit sa Espiritu Santo, nagpadayag sa plano sa kaluwasan, ug nagpamatuod ni Jesukristo ug sa Iyang Pag-ula.
Pagkapari ug mga Ordinansa
Ang Ginoo nagdapit kanatong tanan sa pagduol ngadto Kaniya ug sa Iyang Simbahan ug sa pagdawat sa mga ordinansa sa kaluwasan.7 Ang mga ordinansa mahinungdanon sa tinuod nga Simbahan sa Ginoo, ingon man ang awtoridad sa pagkapari sa pagpahigayon niini.
Lakip sa ubang mga butang, kadtong nangita sa tinuod nga Simbahan ni Jesukristo kinahanglang magdahom nga ang Ginoo nagtakda sa tukma nga bunyag (tan-awa sa Doktrina ug mga Pakigsaad 20:37, 71–74) ug sa katungdanan sa mga miyembro human sila mabunyagan (tan-awa sa Doktrina ug mga Pakigsaad 20:68–70). Kinahanglang magdahom sila nga makakaplag og boluntaryo nga pagpangalagad ug sa mga katungdanan niadto nga mga boluntaryo nga mga tigpangalagad. Ug kinahanglang magdahom sila og mga oportunidad sa pagpangalagad ingon nga ang Manluluwas nangalagad. (Tan-awa sa Doktrina ug mga Pakigsaad 20:38–67; tan-awa usab sa Mosiah 18:8–10; Moroni 6:4.)
Ang pagpangalagad diha sa gipahiuli nga Simbahan ang nakapalahi kanato. Ang pagserbisyo sa pagkapari nagpasabot sa pagpangalagad sa tanan, lakip niadtong dili sa atong tinuohan. Ang pagpangalagad nakapanalangin niadtong nangalagad ug niadtong kinsa gipangalagaran.
Sa katapusan, kadtong nangita sa tinuod nga Simbahan sa Ginoo kinahanglang magdahom nga makakaplag sa awtoridad sa pagkapari ug sa mga ordinansa nga makabugkos sa mga pamilya sa kahangturan.
“Alang kaninyo unsay gipasabut nga ang ebanghelyo ni Jesukristo gipahiuli sa yuta?” nangutana si Presidente Nelson atol sa Abril 2020 nga kinatibuk-ang komperensya. Kini nagpasabut nga kamo ug ang inyong pamilya mabugkos sa kahangturan! Kini nagpasabut nga tungod kay kamo nabunyagan pinaagi sa dunay awtoridad gikan ni Jesukristo ug nakumpirmahan nga miyembro sa Iyang Simbahan, kamo makatagamtam sa kanunay nga pakig-uban sa Espiritu Santo. … Kini nagpasabut nga ang gahum sa pagkapari makapanalangin ninyo sa inyong pagdawat sa importanting mga ordinansa ug paghimog mga pakigsaad uban sa Dios ug pagtuman niini.”8
Dako kaayo kini nga panalangin nga mahimong mga miyembro sa usa ka Simbahan nga nag-uswag ug nga gipangulohan sa buhing mga propeta ug apostoles! Hinaot nga dili nato gayod ibaliwala ang balaan nga giya sa Ginoo, ang Iyang gipahiuli nga Simbahan, ang gahum sa pagkapari, ug ang mga ordinansa nga nakapanalangin kanato karon ug sa kahangturan.