Dali, Sunod Kanako

Unsay buot ipasabut sa “inuyunan sa kadaghanan” diha sa Simbahan?

Marso 8–14

Ang Ginoo misugo nga “tanan nga mga butang mabuhat nga inuyunan sa kadaghanan diha sa simbahan” (Doktrina ug mga Pakigsaad 26:2). Ang inuyunan sa kadaghanan nagtugot sa mga miyembro sa Simbahan nga “mopaluyo niadto nga gitawag sa pag-alagad diha sa Simbahan, ingon usab sa uban nga mga gimbut-an sa Simbahan nga nagkinahanglan sa ilang pagpaluyo, kasagaran gipakita pinaagi sa pagpataas sa tuo nga kamot.” (Giya ngadto sa mga Kasulatan, “Gikauyonan sa Tanan,” scriptures.ChurchofJesusChrist.org).

Kita ba “mobotar” kon kita mopaluyo sa mga miyembro?

“Walay propeta o lider niining Simbahan, ang mitawag sa iyang kaugalingon. Walay propeta ang gibotaran sukad. Giklaro kana sa Ginoo sa dihang Siya miingon, ‘Kamo wala magpili kanako, hinonoa ako ang nagpili kaninyo, ug nagtudlo kaninyo’ [Juan 15:16]. Kamo ug ako wala ‘mobotar’ sa mga lider sa Simbahan bisan asa. Kita, hinoon, dunay pribilehiyo sa pagpaluyo nila” —Presidente Russell M. Nelson, “Pagpaluyo sa mga Propeta,” Liahona, Nob. 2014, 75.

Ang mao tinuod alang sa tanang calling. Ang pagpaluyo usa ka kahigayunan sa pagpakita ug paghatag sa atong pagsuporta ug sa pag-ila sa kabubut-on sa Dios.

Ang pag-isa ba sa atong mga kamot sa pagpaluyo sa mga miyembro usa lang ka yano nga pormalidad?

“Pinaagi sa atong boto sa pagpaluyo, kita mihimo og balaan nga mga saad. Kita nagsaad nga mag-ampo alang sa mga sulugoon sa Ginoo ug nga Siya mogiya ug molig-on kanila [tan-awa sa Doktrina ug mga Pakigsaad 93:51]. Kita nagsaad nga kita mangita ug magdahum nga mobati og inspirasyon gikan sa Dios diha sa ilang tambag ug kon sila mobuhat sa ilang calling.”—Presidente Henry B. Eyring, “Gitawag sa Dios ug Gipaluyohan sa Katawhan,” Liahona, Hunyo 2012, 4.

Ang pagpaluyo sa mga miyembro sa ilang mga calling kinahanglan nga magpadayon basta sila takos nga naghupot sa katungdanan.

Unsa kaha kon ako dili makapaluyo sa usa ka tawo?

Sa talagsa nga mga higayon, ang usa ka indibidwal mahimong nasayud og balido nga rason kon ngano nga ang usa ka miyembro kinahanglang dili maghupot og calling. Niana nga mga sitwasyon, ang misupak nga miyembro mahimong pribadong makigkita sa bishop o presidente sa stake aron sa paghisgot sa ilang mga kabalaka.