Ipabilin ang Musika nga Sentro sa Pagsimba
Ang musika sa kanunay nahimo na—ug sa kanunay mahimo pa—nga sentro sa pagsimba, diha sa simbahan ug diha sa panimalay.
Wala pay pipila ka semana human ang Simbahan naorganisar, ang Ginoo misugo kang Emma Smith sa “paghimo og pagpili sa sagrado nga mga himno, … diin makapahimuot ngari kanako, alang sa akong simbahan” (Doktrina ug mga Pakigsaad 25: 11). Ang mga Santos nagkinahanglan og mga paagi aron makakat-on sa bag-ong gipadayag nga mga kamatuoran sa ebanghelyo ug aron maghiusa diha sa pagdayeg sa Dios. Ug ang mga himno mahimo nga sentro sa ilang pagsimba ug pagkat-on.
Mga tuig na ang milabay, sa dihang ang akong pamilya mipasakop sa Simbahan, ang akong mga ginikanan miawhag kanamo sa pagkat-on sa musika sa among bag-ong tinuohan. Ako adunay pipila ka klaro nga panumduman nianang panahona:
-
Pagmemorya sa “Pag-ampo mao ang Sinsero nga Tinguha sa Kalag,” (Mga Himno, nu. 87) uban sa akong pamilya.
-
Pagpaminaw sa “O Amahan Ko” (Mga Himno, nu. 182) ug sa pagkat-on nga ako adunay usa ka Langitnong Amahan ug Inahan kinsa akong makita pag-usab sa umaabut nga adlaw.
-
Ang Pagbati sa gugma sa Dios samtang nagkanta sa “Gihigugma Ako sa Langitnong Amahan” (Songbook sa mga Bata, 11–12)—bisan og ako nagpuyo sa disyerto ug wala gayud makakita og punoan sa lilac!
Sa paglaktod ngadto sa usa ka miting sa sakramento sa ulahing bahin sa Pebrero 2020. Pipila ka mga miyembro sa among ward nagsagubang sa sakit nga kanser, ug mibati og dakong kahupay sa dihang ang choir sa ward mikanta sa “Unsa Kalig-on ang Tukuranan” (Mga Himno, nu. 44). Pipila ka semana ang milabay, usa ka sunod-sunod nga makabalda nga panghitabo ang miabut: mga quarantine, mga pagkanselar sa simbahan, ug nagsunod-sunod ang mga linog ug mga aftershock. Ug kana nga himno misugod na usab sa pagtukar diha sa akong hunahuna:
Ayaw og kahadlok, ni kalisang,
Kay Ako ang imong Dios nga motabang.
Ako molig-on, motabang, mosagang,
Pinaagi sa kamot kong gamhanan.
Usahay kini ingon og ang global ug personal nga mga hagit nagtubo hapit kada adlaw. Labaw sa tanan, nagkinahanglan kita sa espirituhanong pagsustiner pinaagi sa mga himno, mga kanta sa Primary, ug uban pang sagrado nga musika.
Walay Kausaban sa Katuyoan o Kaimportante
Hinoon, samtang giusab nato ngadto sa duha ka oras nga iskedyul ang mga miting sa Simbahan, ang uban naghunahuna kon ang tahas sa musika mokunhod ba sa atong pagsimba. Ang tubag dili.
-
Ang sagradong mga himno anaa gihapon sa matag miting sa sakramento, lakip ang pagtabang sa pag-andam sa atong mga kasingkasing sa mga ordinansa sa sakramento. Ang choir ug ang pagpanganta sa kongregasyon ug ubang sagradong musika mahimo pa gihapon nga planohon aron sa pagpalambo sa miting, sama sa una. Atol sa pandemya nga COVID-19, ang sagradong musika importante gihapon nga bahin sa gipamob-an nga mga miting sa sakramento, bisan kon instrumento lamang ang magtugtog niini.
-
Ang among mga anak karon makagahin katunga sa ilang panahon diha sa Primary nga magkat-on sa ebanghelyo pinaagi sa musika.
-
Sa ikaduha nga takna, wala nay pangbukas ug panapos nga mga awit alang sa mga klase sa hamtong ug sa mga kabatan-onan. Apan ang musika mahimo gihapon nga magamit sa mga klase sa pagtudlo ug pagdasig.
-
Kini mas nahimong sayon ang pagpaminaw sa sagradong musika diha sa mga himan nga digital, gamit ang Sacred Music nga app sa Simbahan.
Minusan ang Pagmando, Dugangan ang Katuyoan
Sa gihapon, aduna pay pipila ka dili pagsinabtanay. Usa ka Dominggo sa Pasko sa Pagkabanhaw, ang usa ka magtutudlo nangayo og pasaylo ngadto sa iyang klase sa Doktrina sa Ebanghelyo: “Nasayud ko nga kita dili kinahanglan nga mokanta sa Sunday School, apan ganahan kaayo ko nga kantahon og dungan ang ‘Buhi ang Akong Manunubos’.” Kana nga magtutudlo tingali wala nag-inusara niining sayop nga pagsabut.
Sa pagkatinuod, ang musika ingon gihapon kaimportante sa atong pagsimba sama sa kaniadto. Saksihi ang importanting timaan sa bag-uhay nga update nga nagsingabut sa atong himno ug sa mga koleksyon sa awit sa mga bata. Isip kabahin niana nga paningkamot, ang mga miyembro sa Simbahan sa tibuok kalibutan misumiter og talagsaong 16,000 ka bag-ong mga himno, mga kanta, ug mga teksto.
Apan tungod sa mas diyutay nga mga panahon sa pagkanta sa pipila sa atong mga miting sa Dominggo, kinahanglan kita nga mas mahunahunaon ug tuyuon sa pagplano ug sa paggamit sa musika.
Duha ka mahinungdanong mga baruganan ang makatabang kanato nga ipabilin ang musika nga sentro sa atong pagsimba:
1. Kamahinungdanon sa Pagtudlo
Kita mahimong maghunahuna sa mga pakigpulong ug mga panaghisgutan isip ang nag-unang pamaagi sa paghatud sa mga mensahe sa ebanghelyo diha sa panimalay ug sa simbahan. Ug kita tingali mogahin sa kadaghanan sa atong panahon niadto nga mga elemento. Apan ang musika dili lang usa ka pakapin nga adorno. Anaa gayud kini sa pinakasentro sa pagtudlo uban sa gahum ug uban sa Espiritu.
Sama sa gitambag ni Apostol Pablo sa mga Santos, “Papuy-a sa inyong mga kasingkasing ang bahandianong mensahe ni Kristo; pagtinudloay ug pagpahimangnoay kamo uban sa tanang kaalam. Pag-awit kamog mga salmo ug balaang mga alawiton ug awiti ninyo ang Dios uban sa pasalamat diha sa inyong mga kasingkasing” (Mga Taga-Colosas 3:16).
Ang musika makadala diha-diha dayon sa Espiritu ngadto sa usa ka leksyon o miting. Ang pagpili og usa ka awit nga kantahon atol sa klase sa Sunday School o sa Dali, Sunod Kanako nga panaghisgutan angayan nga hatagan sa samang mahunahunaon, mainampuon nga konsiderasyon sama sa mga kasulatan nga atong gipili nga basahon o ang kabahin sa leksyon nga atong gipili nga ipaambit. Ang musika nga gipili sa mainampuon nga paagi makatandog sa mga kasingkasing, magbilin og espirituhanong mga hunahuna nga mahimong molungtad sa tibuok kinabuhi.
2. “Usa ka Pag-ampo ngari Kanako”
Adunay mga higayon, kitang tanan tingali nakasinati og mga panahon diin kita mibati og kasubo, mga panahon diin ang atong mga dalan dili klaro. Usahay kini maingon nga kita nagsige lang og pangaliyupo sa samang dinalian nga panginahanglan ngadto sa langit, nga walay bisan unsa ang pagtubag o kasulbaran. Sa ingon nga mga panahon, lagmit makatintal ang paghunahuna nga ang Dios wala nagpakabana o nga kita dili takus sa iyang pagpakabana. Usahay kita mobati pa gani nga mohunong na sa pag-ampo.
Sa mga panahon diin kita mobati nga nagkulang og espirituhanon nga koneksyon sa langit, ania ang makahupay nga kamatuoran: Ang sagradong musika sa pagkatinuod mamahimong usa ka matang sa pag-ampo. Ang Ginoo Mismo mipasabut niini sa dihang Siya misugo kang Emma sa paghimo sa atong unang himno: “Kay ang akong kalag mahimuot sa awit sa kasingkasing; oo, ang awit sa mga matarong mao ang usa ka pag-ampo ngari kanako” (Doktrina ug mga Pakigsaad 25:12).
Ug kon kita sinsero nga mohalad sa awit sa atong kasingkasing ngadto Kaniya, ang Ginoo misaad nga kanunayng motubag uban sa usa ka panalangin: “Ug kini pagatubagon uban sa usa ka panalangin diha sa ilang mga ulo. Busa, ipataas ang imong kasingkasing ug paglipay” (Doktrina ug mga Pakigsaad 25: 12–13).
Atol sa usa ka lisud nga higayon sa akong kinabuhi, ako dili makaila sa mga tubag sa akong kinasingkasing nga mga pag-ampo sulod sa taas nga panahon. Usa ka minahal nakong higala nagsagubang og mga kalisdanan sa iyang kaugalingon. Apan samtang among gitugtog ug gikanta ang mga himno ug nagdungan sa pagpanganta og awit sa ebanghelyo, kami sa kanunay nakasinati og malukpanon nga mga pagbati sa kalinaw ug pagpamatuod. Ako karon makaila na nga ang Ginoo nagtuman sa Iyang saad. Siya mao ang mitubag og balik-balik sa mga awit sa akong kasingkasing. Ug kana tinuod gayud nga nakatabang kanako nga mobayaw sa akong kasingkasing ug magpadayon.
Photograph by Robert Casey
Sa Bisan Unsa nga Dominggo
Sa bisan unsa nga Dominggo, kita makasiguro nga ang pipila diha sa atong kongregasyon, ang pipila sa atong mga klase, ug uban sa atong mga pamilya hilabihan nga nag-antus og mga personal nga kasakit. Ang uban maanaa sa malinawon nga kahimtang uban sa mga naghingapin nga mga panalangin. Ang uban nagkat-on pa gihapon sa sukaranang mga kamatuoran sa ebanghelyo.
Kon atong ipabilin ang musika sa tukmang dapit nga sentro sa atong pagsimba, kita makatabang sa tanan nga makakita sa mga oportunidad aron mobati sa Espiritu, sa pagkat-on sa mga kamatuoran sa ebanghelyo, ug sa pagdayeg sa Ginoo alang sa Iyang kaayo. Ug kita makatabang sa tanan nga matubag ang mga awit sa ilang kasingkasing diha sa paagi nga ang atong mahigugmaon, mahangturong Amahan lang ang makahimo.