Noda tabana
Veiuqeti ni Yalo
Na Kalou ena vakayagataki keda meda vakayacora na Nona ilesilesi kevaka eda rogoca ka cakava vakatotolo na vakasolokakana ni Yalo Tabu.
Na Tamada Vakalomalagi sa vakalougatataki ira na luvena ena vuqa na isolisoli vakayalo.1 Nida papitaiso meda lewe ni lotu i Jisu Karisito ni Yalododonu Edaidai, eda ciqoma na Yalo Tabu ena cakacaka vakalotu ni veivakadeitaki, ka vakayacori ena veitabaki ni liga mai vei ira era “taura tu na matabete”2 E yalataka na Tamada Vakalomalagi ni kevaka eda bula kilikili ena vuku ni noda veiyalayalati ni papitaiso, na Yalo Tabu ena yaco me noda itokani e veigauna.3
Na Yalo Tabu, o koya na ikatolu ni lewe ni iTutu Vakalou, e vakadinadinataka na Tamada kei na Luvena.4 E vakatakila vei keda na dina ni veika kecega5 ka sereki keda mai na ivakavuvuli ca kei na vuku vakatamata.6
Na Turaga e vakamacalataka na sala veivakurabuitaki ni nona dau veitaratara na Yalo Tabu:
“Io, raica, au na tukuna ki na nomu vakasama kei na vu ni yalomu, ena Yalo Tabu, ka na qai lako mai vei iko ia ka na tiko sara e na lomamu.
“Ia oqo, raica, sai koya oqo na yalo ni vakatakila.”7
Ena dua na siga ni vula o Jiulai 1989, au tiko ena noqu valenivolavola e Tarawa, Kiribati, kau vakananuma tiko na noqu ilesilesi vakadauveiqaravi e yaco mai ki na noqu vakasanma e dua na veiuqeti kaukauwa ka tukuna vei au meu gole ki valenibula. E ka vou sara, ia au a kila ni domo malumu o ya a mai vua na Yalo. A lomaqu sara meu cakacakataka na veiuqeti o ya ka kua tale ni bera.
Niu a vakavakarau tiko meu biubiu, e dua na noqu itokani makawa ni kaulotu, o Founuku Kitiona, a basika mai ena gauna sara ga au gadrevi koya kina. Au a kerei koya se rawa me tomani au ki valenibula.
“E dua e tauvimate?” a taro o koya. Au tukuna vua, “Au sega ni kila . . . Au vakila ga vakaukauwa ni dodonu me daru gole ki kea.”
Ni keirau gole yani ki valenibula, ni vo e tinikalima na miniti me keirau yaco, au sega ni kila na ka meu namaka. Au vakananumi ena vosa i Nifai ni tukuna vua na Turaga me lesu tale ki Jerusalemi me kauta mai na peleti parasa, “A sa liutaki au tiko na Yalo, kau a sega ni kila rawa tiko yani na ka meu na cakava.”8
Keirau yaco yani ki valenibula kau raica sara e dua na lori vulavula ni kele koto e mata ni rumu ka dau qaravi vakatotolo kina na leqa. Na nodrau o Elder kei Sister Trethowan, e dua na veiwatini daukaulotu qase totoka ka yalodina mai Ositerelia. Keirau lomatarotaro sara ena vuku ni kena tiko e kea!
Ni keirau curu kina rumu ka dau qaravi vakatotolo kina na leqa, keirau raici Elder Trethowan ena dua na idavodavo, ni sega tu ni vakilai koya vakavinaka ka buno tu! E a tekiduru toka e yasana na watina, ka masu tiko.
Rau tiko ekea ni rauta e dua na auwa nodrau waraka tiko na veivuke. Sa dua na ka na nona nuiqawaqawa . . . ia a sega ni luluqa na nona nuitaka ni na takoso o lomalagi. O rawa ni raitayaloyalotaka na lutu ni nona icegu ni raici keirau, “Vinaka vakalevu kemudrau na taciqu. Na Kalou sa sauma na noqu masu” a kaya.
Ena gauna o ya, au kila sara ga na vu ni nona talai keirau mai na Turaga. Keirau a tabaka na ulu i Elder Trethowan ka solia vua e dua na veivakalougatataki ni matabete.
Vakalailai, era sa basika mai e vica na nasi kei na vuniwai. Ni oti na nona vakadikevi, tukuna vei keirau na vuniwai ni tiko vua na daukaulotu e dua na ituvaki bibi ni mate ni uto ka na gadrevi me curu kina.
Niu kila tu na takiveiyaga ni ituvaki ni iyaya ni veiqaravi vakavuniwai ena yanuyanu, au vakusakusa ki na noqu valenivolavola ka qiri ki na Valenivolavola ni Lotu ni Wasewase meu taro ivakasala. E saumi vakatotolo mai me vakau yani o Elder Trethowan ena waqavuka ka na vakarau biubiu yani. Na leqa e tiko, ni vuka ga vakadua na waqavuka ka sa biubiu na vuka ena macawa ya.
Niu vakadeuca tiko na leqa oqo, a vosa kina noqu vakasama na Yalo “meu gole ki na valenivolavola ni vuka.” Au gole sara vakatotolo ni bera ni sogo na valenivolavola.
Au taroga baleta na waqavuka au kurabui ni dua na vuka ni leqatubukoso ena vuka tiko ki Honolulu ena siga ka tarava. Au a vakalewena sara na nodrau idabedabe na veiwatini ena vuka oya.
Ena mataka ka tarava erau biuti Tarawa ka kele ki Honolulu ena vica na auwa ka tarava. E kau vakadodonu sara ko Elder Trethowan ki na dua na vanua ka vakayacori kina na veiqaravi vakavuniwai ka vakabulai kina ena sala veivakurabuitaki.
Ni oti e vica na yabaki, au marau meu sotavi Brother Trethowan ena Valetabu e Serene Ositerelia. A bulabula vinaka o koya ka rau tomana tiko na nodrau veiqaravi vakaveiwatini vua na Turaga vaka liga ni cakacaka vakalotu ni valetabu e kea. E tukuna vei au ke sega ni biuta na yanuyanu ena waqavuka o ya, na nona bula vakayago sa na rairai cava e kea.
Mai na veika oya, kei na vuqa tale, na noqu vakabauta kei na noqu ivakadinadina sa tubu kau vulica e dua na lesoni bibi: rogoca ka vakayacora sara vakatotolo na veiuqeti ni Yalo.
O Elder Ronald A. Rasband e kaya, “Sa kila tu na Turaga na veika era gadreva na luvena–ka kila o Koya se o cei sa vakarau tu me veivuke.” A vakuria tale, “Kevaka meda laiva vua na Turaga me kila ena noda masu ena mataka ni da sa vakarau ena kacivi keda o Koya meda veivuke . . . ka da na qai raici keda ena ka e kaya o Peresitedi Monson, ‘na lesilesi mai vua na Turaga,’”9
Sa vakamasuti keda o Peresitedi Russell M. Nelson, “mo cakava na cava ga ena taura me vakalevutaka nomu gugumatua vakayalo mo ciqoma kina nomu ivakatakila.”10 ka meda “. . . vakasaqara, ena sala kece eda rawata, meda rogoci Jisu Karisito, e vosa vei keda ena kaukauwa kei na cakacaka ni Yalo Tabu.”11
Nanuma ni noda gugumatua vakayalo meda ciqoma na ivakatakila e vakatautaki vakatabakidua ki na bula dodonu vakayadudua.12 Oqo e sega ni kena ibalebale ni da sa taucoko. E sega ni dua na tamata ka sa bula oti ena vuravura oqo e taucoko,13 ka vakavo ga ko Jisu Karisito. Ia, kena ibalebale ni gadrevi meda bula kilikili: “kilikili kaya meda vakaivotavota ena sakaramede, kei na veivakalougatataki ni valetabu, kei na ciqomi ni ivakatakila yadua.”14
Meda vakaruataka tale na noda igu vakayalo meda talairawarawa ki na ivakaro ni Kalou ka muria na ivakasala kei na veivakavulici vaka parofita mai vei koya na parofita bula kei ira na i apositolo ni gauna edaidai. Au vakadinadinataka ni da vakayacora vakakina, eda na rogoca na domo ni Yalo “me wasoma cake ka me makare cake”15 ka vakaivotavota ena nona Vinaka.”16
Ena yaca i Jisu Karisito. Emeni.