Itulau i le lotoifale
O Mea Uma i le Taimi a le Alii
E masani ona fai mai lo’u tina ua maliu, “E te selesele le mea e te lulu.” Sa ou talitonu pea lava i lena mea.
Ia Aperila, 2006, sa ou faaipoipo ai ia Teni Leavai i Aukilani, Niu Sila. E ui o i ma’ua uma o ni tagata o Le Ekalesia a Iesu Keriso o le Au Paia o Aso e Gata Ai ae ma te lei toa’aga i le lotu i lena taimi, o lea sa i’u ai i se sauniga faalemalo na faatinoina e lo’u epikopo. Ona amata ai lea ona ma faia ni suiga i o ma olaga ina ia mafai ai ona ma aga’iga’i i luma faaleagaga, ua ma auai atoatoa i le talalelei ma tuuvaa faatasi ai i la ma faigamalga o se aiga.
Na pei o se emo o le mata, ua oo mai le 2012. Ua atili ona loloto lo ma fealofani ma Teni ma ua felata’i atili—ae peitai sa i ai se mea maoa’e na misi. Mo le ono tausaga, sa le mafai ona ou ma’itaga. Sa manino mai le mea moni, o le a faavavau lo’u avea ma aunt, ae e le o se mum.
Sa ma lagonaina lo ma matua’i le atoatoa.
I se tasi afiafi, sa ma maua se valaau mai se telefoni o le a suia ai o ma olaga! Sa i ai se talafou o se pepe tama e le’i fanau mai, ma sa naunau se tina ma’itaga e su’e se aiga lelei mo ia.
I le po na fanau mai ai Kahn Ui, sa tuuina mai ai e lona tina failele—faatasi ai ma loimata na tafe ifo i ona foliga—ma le faaeteete o ia i o’u lima ma musumusu mai, “O lau tama. Faafetai atu i lou alofa ia te ia e faapei ona ou alofa i ai.”
Sa tilotilo a’e pepe Kahn ia te a’u ma e tiotio ma le fiailoa, e matua’i le iloa lava le vavega faato’ā tupu. Sa ofi lelei o ia i o’u lima, ma faatasi ai ma lena lava lagona faigofie ma le masani, na fetaui lelei ai foi i lo matou aiga.
Sa ma ulu faatasi atu ma lo’u toalua i le lalolagi o le avea ma matua. Sa ma feauaua’i i le fafagaina o le ma pepe i le po atoa; sa ma talanoa atu ia te ia, pesepese atu ia te ia, ma loimata e le mafuatiaina o le olioli ina ua oo ina ma iloa o ia.
Sa ma iloaina se mea moni maoa’e i na ulua’i aso. E faapei ona manaomia tele e Kahn i ma’ua, o i ma’ua foi o matua fou—na manaomia le Alii e sili atu nai lo se isi lava taimi. Sa ma tatalo mo Lana taitaiga a o ma a’oa’oina a ma’ua matafaioi fou.
Ma te le’i iloaina, o loo i ai foi se isi vavega o loo teuina mo i ma’ua.
Ina ua 4 tausaga o Kahn, sa matou tafafao i lo matou nuu i Samoa, lea sa matou toe feso’ota’i ai ma le aiga na fanau mai ai Kahn. Sa latou talia lelei i matou, ma sa tagi le tina matua o le tina moni o Kahn ina ua ia matauina o ia. “Ese le aulelei o lau tama,” o lana tala lea. “E ese le malosi, ma e foliga mai o la e fiafia foi i ana meaai,” sa ia ataata ai.
O se toefaatasiga faamomoiloto. Sa latou matuai faafetai mai i lo ma alolofa ma tausia Kahn, . . . ona latou fesili mai lea pe o totoe sina avanoa i o ma loto mo se isi tamaitiiti.
Sa ma ofo ma lo’u toalua.
Sa iloa ua i ai se isi pepe a le tina moni o Kahn. O Naree Alalafaga sa 5 masina le matua i le taimi lea, ma sa manana’o lona aiga mo se mea sili atu mo lenei tamaitiiti nai lo mea sa mafai ona latou maua.
Sa oo lemu mai upu a lo’u tina i lo’u mafaufau: e te selesele mea e te lulu.
Sa le o se mea faafuaveta lo matou feiloai faapea i le ma tama teine vavega. Ua silafia e le Alii o ma naunauga loloto, ma le mea silisili mo i ma’ua. O lea, ina ua aumaia e la matou toefaatasiga ma le aiga na fanau mai ai Kahn se isi faaopoopoga taua—o lona tuafafine pepe—i lo matou aiga, sa lagonaina le tonu o lea mea.
Sa toe masii atu lo matou aiga ua faaopoopo i Ausetalia, ona oo lea ia Setema 2017, sa faamauina lo matou aiga, mo le olaga nei ma le faavavau atoa i le Malumalu o Melepone, Ausetalia. O se aafiaga mamana tele, o le a ma manatua e faavavau.
Faatasi ma loto ua faatumulia i le alofa mo si o ma’ua aiga ua faato’ā faamauina, pe faapefea ona ma iloa sa i ai i le Tama Faalelagi se isi vavega maofa mo i matou.
Manatu i lo’u fiafia faate’ia i le na o le tolu masina mulimuli ane, ae ou iloaina ua ou ma’itaga. Pe mafai faapefea lenei mea? Sa ma toe siakia faalua le su’ega i le fale pe ma’itaga—e sa’o! E lua ni su’ega na ma faia ina ia mautinoa. Sa ma fetagisi.
Ou te iloa sa ma faatasi ma le Alii i laasaga uma o lena ma’itaga. Sa ou lagonaina le alofa ma le malosi’aga o o’u matua, mai le isi itu o le veli, e faamautinoa mai ai ia te a’u o le a lelei mea uma.
I le vaveao o le aso 12 o Aokuso 2018, sa fanau mai ai si a’u teineitiiti pele e pei ona masani ai. Sa faaigoa o ia e lo’u toalua i le igoa o lona tina o—Faaifomailelagi, o lona uiga i le faaSamoa, “Na auina mai le Lagi.’
O le avea ma tina o se tasi o mea e aupito sili ona faigata ua ou oo i ai, ae e oo mai i le taimi nei, e sili ona faamalieloto. E oo mai i le asō, o loo faaauau pea ona fai e le ma fanau ia sili atu o ma tagata ma avea ma ni auauna sili atu a le Alii. Latou te a’oa’o i ma’ua ia onosai, lotofaamagalo, lotomaualalo ma le anoanoai o isi mea.
Ou te iloa o o’u luitau uma, sa mo lo’u lelei. Pe a ma onosa’ia lelei o ma tofotofoga ma a’oa’o mai ai, ona ma iloaina lea e le o se mea faafuaveta, ae o le mamanu faalelagi . . . ma o mea uma lava i le taimi a le Atua.