Itulau i le lotoifale
Ia Faia Lou Finagalo
Na aoao mai e Iesu i tatou ia tatalo ma le faatuatua atoa ma le faalagolago i le Atua. Na Ia a’oa’oina ona uluai soo, “Pe a tatou tatalo, ia faapea atu, . . . Ia oo mai lou malo. Ia faia lou finagalo i le lalolagi, e pei ona faia i le lagi” (Luka 11:2).
O upu autu ii o, “Ia faia Lou finagalo.”
O se mea masani mo i tatou le popole e uiga i o tatou manaoga faaletagata, o lea ou te manatu ai e tele ina tatou laaloa i lenei faatonuga. Pe o nisi taimi foi, tatou te faapea ai “Ia faia Lou finagalo,” e pei o se faaopoopoga pe a uma, ae e le tatau.
E silafia e le Atua mea uma ma ua i ai le mana uma. Tatou te gaua’i atu i Lona finagalo aua e tumu o Ia i le alofa e le uma, ma e manaomia i le vaaiga e faavavau ona filima’oti o tatou manaoga i le ala e tatau ai. O le faalagolago i Lona finagalo o se maa faavae lea o tatalo e aogā.
Na faaa’oa’o mai e lo tatou Faaola o Iesu Keriso lenei aoaoga, i le taimi o i ai i Ketesemane, na pipili ai i le avega matautia o agasala a le lalolagi, sa Ia augani atu ai, “Lo’u Tama e, afai e mafai, ia e aveese lenei ipu ia te a’u: ae ui o lea e le o lo’u loto a o lou finagalo” (Mataio 26:39).
Atonu e le tali maia i taimi uma a tatou tatalo i le ala tatou te faamoemoe i ai, ae pe a tatou tuu atu ia manumalo Lona finagalo, ua folafola mai e lo tatou Tama i le Lagi ia i tatou le filemu i taimi faigata.
I le tuneva o se tasi afiafi, ina o ma’i tigaina lo’u tama, sa ou tootuli ifo ai i autafa o lo’u moega ma sa ou tatalo ai ma le malosi uma o lo’u loto ma le agaga i le Alii e fesoasoani mai ia ou iloa pe o le a se mea e mafai ona ou faia e fesoasoani ai i lo’u tama. Sa ou tatalo ma le faatuatua atoa ma le faalagolago i lo’u Tama Faalelagi. Sa ou tatalo ona ou taofi lea, ma tatalo, ma toe taofi, i lo’u taumafai moni e taulai lo’u mafaufau. Sa ou taumafai moni e ua’i atu i le Agaga Paia.
Ona oo mai ai lea o se uuna’iga ia te au, ma sa ou faapea ifo ia te au lava, “O loo e tauanau pea le Alii e avatu ia te oe le mea e te manao ai. Ae faapefea le mea e finagalo ai o Ia?”
O upu na soo ai mai lo’u gutu o, “Le Tama Faalelagi e, ou te matua’i manao lava ia ola lo’u tama. Ou te matua’i mana’o moni lava e nofo mai o ia ma i matou. Ae afai e le o lau fuafuaga lea mo ia, ua ou naunau la e tuu o ia e alu. Ua ou naunau e talia Lou finagalo.”
Sa fetalai mai le Alii i lo’u loto ma faapea mai, “Lo’u afafine faatuatua e, ona ua e naunau e talia lo’u loto ae le o lou, o le a faamafanafanaina oe ma faamanuiaina i le filemu.”
O le taeao na sosoo ai, sa toe foi atu ai si o’u tama faapelepele i lo tatou Tama Faalelagi . . . ma sa ou lagonaina se mafanafana matagofie ma le maū to’afimalie i lo’u loto. Sa ou lagonaina le alofa mamā o le Atua mo a’u.
E ui ina sa ou faanoanoa, sa faamaluluina e le Alii le ta ma sa ia faafaigofieina le tiga mo a’u e tauaveina. Sa faaauau pea ona ou lagonaina Lana faamafanafanaga i le tele o ala eseese, ma e ala mai i le toatele o uo ma tagata o le aiga. Sa ou lagonaina le matuā faamanuiaina, e faapei lava ona sa folafola mai e le Atua.
Sa ou faia se isi tatalo e faafetai ai ia te Ia, ma sa ou faailoa atu i ai le tele o lo’u alofa ia te Ia.
Ou te matuā faafetai lava mo le meaalofa pele ma le matagofie o le tatalo. O le fesootai atu i lo tatou Tama i le Lagi o se avanoa paia moni. Ia tatou maua le faatuatua e talia ai Lona finagalo i mea uma, ma faalagolago i Lona alofa paia o le a mafai ai ona tatou asaina lu’itau uma o le olaga.