ENNAAN AN RITŌL AN ERIA
Revelesōn an Juon Make—Juon Kam̧ool jān Anij, Jemed
Rikanaan ro rejjab armej ro wōt remaron̄ ebbōk revelesōn. Ekkar n̄an am̧ tōmak, komaron̄ bōk revelesōn n̄an jipan̄ eok kōn aolepān aikuj ko am̧, eddo, im kajjitōk ko n̄an jipan̄ eok kōkajoorļo̧k naan in kam̧ool eo am̧1.
Kejōkļo̧kjeņ kōn 40 iiō in aō membōr in Kabun̄ eo an Jisōs Kraist im Armej ro Rekwojarjar ilo Raan Ko Āliktata, ej lo̧kjeņaō im lukkuun kam̧m̧olool kōn en̄jake ko rem̧m̧an im rekar ukōt mour eo aō kōn revelesōn eo aō make jān Jema Ilan̄ me ikar en̄jake im rej wōnm̧aanļo̧k wōt ilo mour eo aō.
Ikar keememejļo̧k en̄jake eo jinoin aō ekabwilōn̄lōn̄ kōn revelesōn eo aō make. Ke ej 17 aō iiō; menin ekar bōk jikin ilo m̧weo im̧ōn jinō im jema ilo Suva, Fiji. Ikar pād ilo ruum̧ im kiki eo aō make ļo̧k iaaō, im ij riit jān Bok in Mormon kōn juon ikdeleel in kālet n̄an jeļā ippa make eļan̄n̄e bok in em̧ool. Menin kar juon idajon̄jon̄ jān mijenede ro Elder Rian Nelson im Elder Randy Price rekar kajjitōk bwe in kōm̧m̧ane ālkin katak eo aer kōn rikanaan Josep Smith im wāween an kar bōk pileij gold ko jān juon enjeļ, innem kar ukōt jeje ko n̄an kajin Pālle.
Mijenede rein rekar riit eoon kein jān Bok in Mormon ilo iien am kar katak, im rekar kwaļo̧k naan in kam̧ool ko aer rekajoor im reperan. Ikar en̄jake im̧we eļap, im ikar kōņaan jeļā ippa make eļan̄n̄e ta eo rekar kwaļo̧k rej jān Anij . . . im ikar kōņaan ba bwe rekar ba menin kein kōn juon wōt tōmak im lōke.
Ikar riiti 3 Nipai jebta 11; elukkun kajju mōkaj aō kar jino meļeļe im jino meram̧ļo̧k aō kōļmenļo̧kjeņ. Ikar pijaikļo̧k Rilo̧mo̧o̧r eo, Jisōs Kraist, wanlaļtak jān lan̄ im ej jutak ilubwiljin jarlepju eo ilo an erļo̧ke pein, im karuwaineneik er n̄an itok n̄an E, n̄an en̄jake jenkwan dila ilo Pein im ilo Neen. Menin rekar kōm̧m̧ane juon ilo̧k juon, im āliktata, rekar bun̄ pedo n̄an laļ in kabun̄jar n̄an E āinwōt kar Messaia eo kar kallim̧ur kake2.
En̄jake iakwe, kaenōm̧m̧an im aenōm̧m̧an ekar anjo̧ ioō im ikar jan̄ kōn kōmjaļaaļ in iakwe, kam̧m̧olol, im nōbar n̄an Irooj im kōn mijen in iakwe im tūriam̧o eo An. Ekar mōkaj aō kile bwe menin ekar juon kam̧ool an jetōb jān lan̄ . . . en̄in ta eo ikar riiti im en̄jake ke ekar m̧ool im ej jān Anij.
En̄jake in aibojooj ikar en̄jake ippān mijenede ro raan eo m̧okta jān aer kar bar rool tok, ak ilo iien in ikar make iaaō. Im̧we eo an Jetōb Kwojarjar ekar aō make im ekar lukkuun kajoor. Ikar jab kōņaan bwe iien in eaorōk im em̧m̧an in en jemļo̧k. Ikar jeļā ilo iien eo ta meļeļein revelesōn an juon make. Aolep iien ikar kwaļo̧k en̄jake in aō ium̧win 40 iiō ko, kam̧ool eo em̧m̧an kōn Jetōb Kwojarjar ekar kobrak buruō.
Bar juon en̄jake ikar en̄jake kōn revelesōn eo aō make ke ikar jerbal āinwōt juon stake petriak. Ekar ļo̧kjeņaō im kar lukkuun ettā kōn revelesōn eo jān Jetōb Kwojarjar kajjojo iien ij likūt peiū ņai ioon bōran membōr ro rekar itok im bōk kōjeraam̧m̧an in petriak ko aer. Ilo kajjojo iien ko raorōk im̧we eo ealikkar ikar en̄jake ekabwilōn̄lōn̄ ekar jiktok ilo kōļmenļo̧kjeņ eo aō im ikar maron̄ leļo̧k n̄an kajjojo armej kōjeraam̧m̧an ko me Anij, Jemāer Ilan̄ ekar kōņaan bwe ren bōki. Jerbal eo aō ej n̄an lukkuun ron̄jake . . . im kōnono kōn ta eo ij en̄jake.
Ilo an en̄jake kein ruo oktak, men eo me rej juon wōt kake ej bwe ikar aikuj revelesōn eo aō make jān Anij n̄an katakin, tōl im kaenōm̧m̧an eō; im ekar wōr aō tōmak bwe E enaaj kōjeraam̧m̧an eō ekkar n̄an ankilaan.
Rikanaan eo ad emour rainin, Būreejtōn Russell M. Nelson, ekar katakin eō kōn pedped in katak ko an revelesōn ko ilo Eprōļ 2020 Kweilo̧k eo Eļap. Ekar ba:
“Rikanaan Josep Smith ekar kōm̧m̧ane juon jon̄ak n̄an kōj n̄an ņa mejļan kajjitōk ko ad. Roollikļo̧k n̄an kallim̧ur eo an Jemes bwe eļan̄n̄e jabdewōt iaami ej aikuj jeļāļo̧kjeņ en kajjitōk kōn e ippān Anij, ļaddik in Josep ekar kajju bōkļo̧k kajjitōk in an n̄an Jemedwōj Ilan̄. Ekar kappukot revelesōn eo an make, im kōn an kappukot ekar peļļo̧k epepen in bōk eddo in ilo raan ko āliktata.
“Ilo wāween in, ta eo kwoj kappukot naaj tōl eok n̄ane? Jeļāļo̧kjeņ ta eo ejjeļo̧k ippam̧? Ta en̄jake eo am̧ kōn juon aikuj eo emenin ekairiir n̄an jeļā im meļeļe? Ļoor waanjon̄ak eo an Rikanaan Josep. Kappukot juon jikin eo ejjeļo̧k keroro ijo komaron̄ etal n̄an e aolep iien. Kōttāik eok make im̧aan mejān Anij. Leļo̧k aolepān buruōm̧ n̄an Jemam̧ Ilan̄. Oktakļo̧k n̄an E kōn uwaak ko im n̄an kaenōm̧m̧an.
“Jar ilo etan Jisōs Kraist kōn kajjitōk ko am̧, am̧ mijak, am̧ m̧ōjņo—aaet jan̄nuwaade ko an būruōm̧. Innām ron̄jake! Je ļōmņak ko me rej jiktok ilo kōļmenļo̧kjeņ eo am̧. Je en̄jake ko am̧ im ļoor ilo am̧ kōm̧m̧ane ta eo kwoj en̄jake. Ilo am̧ āliji kōm̧m̧an in raan n̄an raan, allōn̄ n̄an allōn̄, iiō n̄an iiō, kwonaaj “eddōkļo̧k ilo pedped in katak ko kōn revelesōn”.3