BWEBWENATO KO AN IJO JOKWE IE
Tōmak n̄an Jar kōn Juon Menin Kabwilōn̄lōn̄
Eitok limon Brother Joseph Price jān Auckland New Zealand Papatoetoe Stake kōn ļon̄ bee ko. Ej riit kōn ļon̄ bee ko ilo jeje ko rekwojarjar—kōn wāween an riJared ro etto kar ebbōk honeybees (lale Ether 2:3), im wāween an Liai im baam̧le eo an kar m̧ōn̄ā wild honey (lale 1 Nipai 17:5).
Joseph ekar bar itok limoin ilo al kōn bee ko ilo juon al em̧m̧an tata ippān kōn Visōn eo M̧oktata im kejōkļo̧kjeņ kōn un ko rekabwilōn̄lōn̄ kōn ļon̄ bee ko ilo laļ in. “Ilo aer jab pollinate i wūt ko,” Josep ej ba, “jikin kallip eo am eban kar em̧m̧an.”
Ekar ettōņak kōn juon raan an lale im nejnej make ļon̄ bees ko, innem̧ ilo 2018, Josep—kiiō ej juon jimma—ekar maron̄ nejnej bee. Ekar wia ruo an m̧ōn bee im ekar kijorjor in likūti ilo melaaj eo an ilo likin m̧weo im̧ōn im ekar bōk juon an nuknuk an rilale bee n̄an kanōke aolep iien ej loļo̧k bee ko. Ejjab to kōņaan eo an n̄an nejnej bee ekar erom̧ juon men elukkun em̧m̧an ippān.
“Ej juon wāween ekam̧ōņōņō n̄an kam̧m̧olool Jemedwōj Ilan̄ kōn kōm̧anm̧an ko an, im bee ko rejjab akweel e eō,” ekar ettōn̄. Ekar lukkuun leļo̧k an n̄an m̧ōn bee ko an jon̄an leddik eo nejin ekkā an kajjitōk ejet an ajri bee ro nejūm̧ mour . . . im āinwōt ajri ro, bee ko rekar katakin e katak ko relukkuun aorōk ilo mour.
“Juon raan ikar loļo̧k m̧ōn bee ko ilo aō kar jab kanōk nuknuk an rilale bee,” Josep ekar ba. “Rikanaan eo ad, Russell M. Nelson, ekar kwaļo̧k n̄an juon jarlepju ilo Auckland ilo raan eo tok juon—im ikar etal bwe in kōm̧m̧an kūr eo aō ilo kweilo̧k eo ilo an lōn̄ aņņan̄ in an kar bee eo kiji meja.”
En̄jake in ekar katakin e bwe eaorōk bwe jen aolep iien kōjparok kōj make ilo mour in kanniōk im jetōb.
Men eo em̧m̧antata ilo iien an kar Josep nejnej bee ekar tōre eo me m̧ōn bee ko an rekar kwaļo̧k 60kg in wild honey ko raibojooj. Ekar ajeej bwijin bato in honey ko im elōn̄ ro rej kwaļo̧k jon̄an aer em̧m̧an im eņņo. “Jon̄an eo m̧ōttan me rej bar pejnej kōn honey rekar ba bwe honey ko aō renno̧ ļo̧k jān ko rej kōm̧m̧ani,” Josep em̧ōņōņō. Ekar jab maron̄ kōttar an loe an m̧ōn bee ko an bar ekwaļo̧ktok honey ilo iien bar m̧admōd in tok.
Innem juon jibbon̄, ekar lo bwe m̧ōn bee eo ekar ejjeļo̧k kobban. Aolep bee ko rekar jako!
Josep ekar kappukoti ilo aolep turin m̧weo m̧ōn, ak ekar ejjeļo̧k tōprak. “Jet iien jinen [bee] ko ej kālet n̄an em̧akūt im bōk jarlepju in bee ko ippānļo̧k,” ekar ba. “Jet iien komaron̄ bar loi, ak jet iien komaron̄ jab bar loi.”
Ekar jeļā bwe ļo̧kin wōt an jarlepju in bee etal jān m̧ōn bee eo an, remaron̄ bar jab ro̧o̧l tok. Barāinwōt, bee ko rejjab bar etal n̄an bar m̧ōn bee ko jet. Kōn un kein, rinejnej bee ko rekkein kōm̧m̧an elōn̄ m̧ōn bee ko—ak Josep ekar wōr wōt ruo an.
Kaburom̧ōjm̧ōj eo, jejjo allōn̄ tokālik, m̧ōn bee eo an juon ekar bar jako.
Josep ekar rub būruwōn: “Ikar lukkuun būrom̧ōj. Ikar lukkuun en̄jake āinwōt ejako juon men aorōk jān eō.”
Ekar katotoiki nuknuk in lale bee eo an im etal im ba n̄an kōrā eo pāleen, Atelaite, nuuj eo ekaburomōjmōj. “Bee ko nejid rejako,” Josep ekar ba n̄an e. Ekar rōjan̄ e bwe en jar.
Jān jibbon̄on eo, ekar emakijkij an jar, aolep raan, kōn ļon̄ bee ko nejier. Rej kam̧m̧olool Jemedwōj Ilan̄ kōn jeraam̧m̧an in ilo aer kar nejnej bee, im kōn m̧ōņōņō eo rej en̄jake kōn men kein, innām rekar jar kōn juon kabwilōn̄lōn̄—bwe bee ko ren bar ro̧o̧l tok.
Ālkin eiten ruo wiik, mekarta, Josep ekar tin jino ebbweer. Ekar ba n̄an Atelaite ekar pojak n̄an bōk nien honey ko me ejjeļo̧k kobbaer im bar wia bee ilo jijen in tok. “Āindein,” ekar ba n̄an e. “Jen kōtļo̧k bwe menin kōm̧anm̧an kein ren make kōm̧m̧ane ta ko rej kōm̧m̧ani.”
Ak Atelaite ekar jab pojak in ebbweer. Ekar pād ilo būruōn naan ko an Alma:
Aaet, kōttāik kom̧, im wōnm̧aanļo̧k ilo jar n̄an e . . . Kūr n̄an e n̄e kom̧ij pād ilo meļaaj ko ami, aaet, ioon aolepān mennin mour ko ami . . . bwe kwōn maron̄ jeraam̧m̧an ilo er (Alma 34:19–20, 24–25).
Ekar jab bōjrak an jar.
Juon jibbon̄ in Jādede, Josep ekar lo bwe bee ko rekar aolep ekekā ioon wūt ko ilo jikin kallip eo an. Kōn mej ko an mejān juon rinejnej bee eo etijemļo̧k, ekar lo bwe elōn̄ bee iaer elōn̄ bōlen ippāer, im bwe rej tin kajju n̄an m̧ōn bee ko an.
Josep ekar ekairiir im likūt nuknuk in lale bee eo an im etal im lukkuun etale. Bee ko rekar jepooļe eļaptata juon iaan nien honey ko an, im ke ekar kōppeļļo̧ke, ekar obrak kōn taujin bee ko.
Josep ekar dān in kōmjaļaaļ im ekar kōm̧m̧an jar in kam̧m̧olool eo an. Ekar reilo̧k n̄an queen bee eo im kam̧m̧olool e kōn an kar bar karo̧o̧ltok jarlepju in bee ko n̄an nien honey in. Innām ekar ettōrļo̧k n̄an ippān Atelaite im ba.
“Ikar ba, ‘jera e, kojeļā ta? Em̧ōj an bar bee ko ro̧o̧ltok!’” Ekar atbokwoje im mejān māiki kōrā eo pāleen, innām ekar ba n̄an e, “Tōmak eo am̧ eļapļo̧k jān n̄a.”
N̄an rainin, Josep ejjab jeļā eļan̄n̄e bee ko ilo m̧ōn bee eo an kiiō rej ejja bee ko wōt me rekar em̧m̧akūt, ak eļan̄n̄e rej jet bee ko roktak ko me rej pād ilo m̧ōn bee eo an. Jekdo̧o̧n jekjek kein ruo ak, ejeļā wōt ke juon menin kabwilōn̄lōn̄ ekar waļo̧k, im ekar itok m̧okta kōn tōmak.
“Ikar tin pere im kōtļo̧k , ‘bwe menin kōm̧anm̧an ko ren kōm̧m̧ani ta ko rej kōm̧m̧ani,’” Josep ekar ba, “ak kōrā eo pāleeō ekar jab ebweer. Ikar ekkatak bwe jen jab ebbweer ilo jar ko ad im n̄an lōke ilo Jemedwōj Ilan̄. Juon menin kabwilōn̄lōn̄ eban kajju bōk jikin, ak n̄e ej bōk jikin, ej bōktok eļap lan̄lōn̄.”