Ngaahi Peesi Fakalotofonuá
Kuó Ne Hoko pea Te Ne Kei Hoko Maʻu ai Pē Ko Hotau Fakahinohino
Naʻa mau tui ki he ʻOtuá ʻi heʻemau tutupu hake mo hoku ngaahi tokoua mo e tuongaʻané, ka naʻe ʻikai tui fakalotu homau fāmilí. Ne mau fai pē ʻemau meʻa pē ʻamautolu ʻo ʻikai tokanga ke ako fekauʻaki mo e taumuʻa ʻo ʻemau ʻi he māmaní.
Ka, kimuʻa peá u aʻu ki hoku taʻu hongofulu tupú, naʻe mālōlō ha niʻihi tokosiʻi hoku kāingá, pea naʻá ku fifili ai pe te u toe mamata nai kiate kinautolu. Ne u manatuʻi e fakatokanga mai ʻeku kuitangatá kiate kimautolu ke ʻoua te mau faʻa mohe koeʻuhí ko e taimi te mau mate aí, te mau mohe ʻo taʻengata, pea naʻe fakatupu fifili ia kiate au. Naʻe hoko nai ʻa e maté ko ha feituʻu fakapoʻuli pē ʻo e mohe taʻengatá?
ʻI he fekumi hoku laumālié ki he tali ki he meʻa ʻoku hoko hili ʻemau maté, ne ʻomai ʻe ha kaungāʻapi—ne hoko kimuʻa ko ha pīsope ʻi he Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní—ha ongo faifekau mei hono siasí ke feʻiloaki mo kimautolu. Naʻá na akoʻi hoku tokoua, ko Fiasilí, mo au kau ki he ongoongolelei ʻo Sīsū Kalaisi naʻe fakafoki maí mo fakafeʻiloaki kimaua ki he Palani ʻo e Fakamoʻuí, ʻa ia ne tali kotoa ai ʻeku ngaahi fehuʻi fekauʻaki mo e maté . . . faifai pea tali ia!
Naʻe vave pē ʻema papitaiso mo Fiasilí. Naʻá ne taʻu 13 ia ka naʻá ku kei taʻu 12 pē.
Naʻe fiefia ʻema ongomātuʻá ke ma kau ki he Siasí, ka naʻe ʻikai ke na fie kau kinaua ki ha meʻa ʻe taha. Hili hono papitaiso mauá, ne ma feinga mo hoku tokouá ʻaki homa lelei tahá ke ma ʻalu maʻu pē ki he ngaahi fakatahaʻanga ʻa e Siasí, ka naʻe ʻikai faingofua ia, makatuʻunga ʻi he ngaahi fefusiaki ʻi homau ʻapí. Hangē ko ʻení, ne pau ke ma faʻa fili pe te ma ō ki he houalotu sākalamēnití pe ko e ō fakataha mo homa fāmilí ki tahi ʻi he Sāpaté.
Ka naʻá ku ngāue mo Fiasili ke ma fefakamālohiaʻiʻaki ʻema fakamoʻoní. Ne ma pehē kapau ʻe lava pē ʻema ongomātuʻá ʻo tali fiemālie ʻa e ongoongoleleí, ʻe ʻikai fie maʻu ke tafaʻaki ua ʻema moʻuí. Ko ia ai, naʻá ma fakaafeʻi ʻa e ongo faifekaú ke akoʻi kinaua, pea ʻi he founga ko iá, naʻe kau hoku tokoua siʻisiʻí—mo ha niʻihi tokolahi ʻokú ma tokouaʻaki ne nau nofo fakataha mo kimautolu—ki he Siasí.
Naʻe kiʻi fuoloa ange ki heʻeku ongomātuʻá. Naʻe faifai pea papitaiso ʻeku faʻeé, lolotonga ia ʻa e ngāue fakafaifekau taimi kakato hoku tokouá ʻi Suva, Fisi. Ko hono moʻoní, ne fuoloa pē ʻa e mēmipa māmālohi ʻeku tamaí, pea ko ha meʻa fakafiefia ʻa e mamata kiate kinaua ʻoku kamata ke na fakatou haʻu mo kimautolu ki he lotú.
Pea ʻi he 2019, ne uiuiʻi ai au ki he Misiona Philippines Quezon City. Naʻe hangē ʻa e ngāue ʻi aí ha misí—ne u manako maʻu pē ʻi he anga fakafonua ʻo Filipainí pea ne u fie maʻu ʻaupito ke ako ʻa e lea faka-Takaloká. Ka naʻe akoʻi foki kiate au ʻe heʻeku aʻusia ʻi he ngāue fakafaifekaú ʻa e natula moʻoni ʻo ʻetau Ongomātuʻa Fakalangí, pea ʻi heʻeku foki ki Haʻamoa ʻi he taʻu kuo ʻosí, naʻá ku ongoʻi ha holi mālohi ke mamata ki hoku fāmilí kuo nau sila fakataha ki he nofo taimí mo e kotoa ʻo e nofo taʻengatá.
ʻOku ʻi ai haʻamau ngaahi ngāue ke fakahoko kimuʻa pea mau toki lava ke aʻusia ʻa e taumuʻa ko iá. ʻOku kei foʻou pē ʻeku ongomātuʻá ki he ongoongoleleí pea ʻokú na kei hoko atu pē ʻi he ako fekauʻaki mo e ngaahi tefitoʻi moʻoni fakamoʻui ʻo e ongoongoleleí. ʻOku kei lolotonga fekumi pē hoku tuongaʻané ki hono halá—ʻi he feinga ke ʻiloʻi pe ʻe ʻalu ʻo ngāue fakafaifekau pe ʻikai—pea ʻoku kei hokohoko atu pē ʻema kītaki mo Fiasilí. ʻOku mau tukupā ke “vilitaki atu ki muʻa ʻi he tui mālohi kia Kalaisi, pea maʻu ʻa e ʻamanaki ʻoku mālohi haohaoa, mo ha ʻofa ki he ʻOtuá” (2 Nīfai 31:20), ʻi heʻemau feinga ke tokoni ki hono fakamālohia ʻa e ului homau fāmilí.
ʻOku ou faʻa fakakaukauloto ʻi he taimi ʻe niʻihi ki he anga ʻo ʻeku ʻilo mo hoku ngaahi tokouá/tuofāfiné ʻa e ongoongoleleí pea mo ʻemau kei nofo maʻu ʻi he ngaahi taʻu lahi ko ʻení, tautautefito ki he fuoloa ʻa e ʻikai ke lotu ʻemau ongomātuʻá. ʻOku ou ʻilo he taimí ni naʻe fakahinohinoʻi maʻu pē kimautolu ʻe heʻemau Tamai Hēvaní. Ne mau ongoʻi Hono toʻukupú ʻi heʻemau moʻuí takitaha, ʻo aʻu pē ki heʻemau ngaahi faingataʻaʻiá, pea ʻoku ou ʻiloʻi ʻoku—hangē pē ko ia naʻá Ne fakahoko ki he kau Sēletí ʻi he ʻEta 2:7—he ʻikai ke Ne mālōlō kae ʻoua kuo mau aʻu ki he matāfanga fakaʻofoʻofa ko ia ʻo e fonua ʻo e talaʻofá kuo teuteu maʻamautolú.