Ngaahi Peesi Fakalotofonuá
Fakakau ʻe he Kautaha Fakapuleʻangá ʻa e Ngaahi Tefitoʻi Moʻoni Fakalaumālié ki he Ngaahi Polokalama Kumi Ngāué
ʻOku tokoniʻi ʻe he ngaahi kalasi Moʻui Fakafalala pē Kiate Kita ʻa e Siasí ʻa e kau ʻōfisa ʻi Tahití.
ʻE taaʻimālie ʻa e kautaha tuʻu ki muʻa ʻi Tahiti ʻoku nau tokoniʻi ʻa e kakai taʻengāué, mei ha Ngaahi Kalasi Moʻui Fakafalala pē Kiate Kita naʻe fokotuʻu ʻe he Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní.
ʻI ha fakataha ʻi he konga kimuʻa ʻo e taʻu ní, ne fakataha ai ʻa e pule ngāue mo ʻiloa ʻi he ngaahi meʻa fakaako ki Tea Uilaú, ko Māsolo Laihauti mo Manea Tuahu, ko e talēkita fakapuleʻanga ʻo e moʻui fakafalala pē kiate kita maʻá e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní, ke talanoa fekauʻaki mo ʻena hoa ngāué.
Naʻe pehē ʻe Māsolo, “ʻOku ʻikai faʻa maʻu ʻe he kakai ʻoku mau ngāue mo iá ʻa e loto-falalá pea ʻoku ʻikai pē ke fuʻu loko ʻi ai haʻanau ngaahi palani ki he kahaʻú.”
Naʻe hoko atu ʻene fakamatalá fakataha mo ʻene fiefia ʻi heʻene fakaʻaliʻali hake ʻene ʻū tohi lēsoni ki he kalasi Moʻui Fakafalala pē Kiate Kita ʻa e Siasí, “Ne u maʻu ha faingamālie ʻi he taʻu 2018 ke u kau atu ki ha kalasi moʻui fakafalala pē kiate kita ne fakalele ʻe he Siasí ʻi Punāuia pea ne ongo kiate au he naʻe ʻuluaki tokoniʻi ʻe he polokalamá ʻa e kakaí ke nau ʻiloʻi ʻenau ngaahi palopalema fakatāutahá ʻo fakafou ʻi ha founga ngāue fakalaumālie.
“Ko ʻeku taumuʻá ke fakahoko ʻa e liliuʻanga moʻui tatau ko iá ʻiate kinautolu, ʻo hangē ko ia kuó u aʻusiá. Pea te ke lava ʻo aʻusia ia fakataha mo e Laumālié; ʻoku ʻi he uhouhonga ia ʻo hoʻo ngaahi polokalama fakaiviá.”
Naʻá ne hoko atu ʻo pehē, “ʻOku mau maʻu ʻa e taukeí, naunaú, ngaahi maʻuʻanga tokoni fakapaʻangá, mo e ako ʻoku feʻunga mo iá. Ka ʻoku ʻikai ke mau maʻu e meʻa ʻoku toki lava pē ʻo ʻomi ʻe hoʻo ngaahi polokalamá. Te ke lava ʻo ueʻi fakalaumālie kinautolu. ʻOku maʻu ʻe he Kau Māʻoniʻoni ʻi he Ngaahi ʻAho Kimui Ní ʻa e mana ʻoku ʻikai ke mau maʻu ia ʻe kimautolu. Ko e Laumālie eni ʻo e ʻEikí. Ko e meʻa ia ʻokú ne fakatupu ʻa e liliu ʻo e lotó. Pea ko e meʻa mahuʻinga tahá ia.”
Naʻe pehē ʻe ʻAveliʻi Nolemipēkā, ko e kouʻōtineita ki Tea Uilau ʻi Pilaé, mo e ngaahi senitā ngāue mo e ako ʻi Fāʻā mo Mōleá: “ʻOku ou saiʻia he ko e liliú ʻoku fakatefito ia ʻi he tokotahá pea ʻoku moʻoni leva ʻa e tefitoʻi moʻoni ʻo e taliui fakafoʻituitui kiate kita peé.”
Naʻe fakamatalaʻi ʻe Manea ʻa e ngaahi maʻuʻanga tokoni ʻo e Siasí fakataha mo e ngaahi kalasi hangē ko e “Ko Hono Kamataʻi mo Fakatupulaki ʻEku Pisinisí” mo e “Ngaahi Meʻa Fakapaʻanga Fakatāutahá.”
Naʻá ne fakamatalaʻi ʻa e fakakaukau ʻo e moʻui fakafalala pē kiate kitá: “ʻI he Siasí, ʻoku ʻikai ʻuhinga pē ʻa e moʻui fakafalala pē kiate kitá ki hono maʻu ʻo ha ngāue leleí, ngaahi tānakiʻanga meʻakaí, pe paʻanga ʻi he pangikeé. Ko e ivi malava ia ke foaki ki he ngaahi fiemaʻu fakalaumālie mo fakatuʻasino ʻo e moʻuí. Ko ha fengāueʻaki fakataha, pea ʻoku ʻikai lava ke fakamavaheʻi ia.
“ʻI he taimi ʻoku moʻui fakafalala ai ʻa e kakaí kiate kinautolu peé, ʻoku lahi ange leva honau ivi malava ke tokoniʻi e niʻihi kehé, pea ʻoku ʻi he uhouhonga ʻo e moʻui fakafalala pē kiate kitá ʻa hono tokoniʻi ʻo e niʻihi kehé.
Naʻe fakaʻosi ʻe Māsolo ʻene fakamatalá ʻo pehē, “Neongo ʻa e ngaahi tokoni kotoa pē kuo fokotuʻu atu ʻe kimautolu mei he puleʻangá, ʻoku kei hokohoko atu pē ʻa e moʻui fakafalala ʻa e tokolahi taha ʻo ʻetau kau kumi ngāué, ʻo ʻikai lava ke nau maʻu ha ngāue maʻuʻanga moʻui tuʻu maʻu. Ko e meʻa ʻoku puliá ko e liliu ʻo e lotó. ʻOku ou ʻilo ko e taimi ʻokú ke fakamuʻomuʻa ai ʻa e ʻOtuá, ʻoku kamata ke ava ʻa e ngaahi matapaá.”