O Uluai Tamaitai o le Toefuataiga
Sa Naunau Kalolaine e Faasoa Atu
E fia le tupe na naunau Kalolaine Tippets e foai atu e fesoasoani e faatau ai fanua i Siona?
Ata na tusia e Toni Oka
Sa galulue malosi Kalolaine Tippets ma lona aiga, i le faaletino ma le faaleagaga. Sa galulue tuagane o Kalolaine i fale ililaupapa, e fesoasoani e mamanu laupapa sa tele i le Setete o Niu Ioka, ISA, lea sa latou nonofo ai. Sa auai le latou aiga i le Ekalesia i le 1832. O lea la, o se tasi o ona tuagane laitiiti, o Aleva, na taitaia le paranesi o le Au Paia i lo latou eria.
I le 1834, na tau atu ai e Aleva ia i latou e uiga i se faaaliga na tuuina mai e le Alii i le Perofeta o Iosefa Samita e talosaga atu ai i tagata o le ekalesia e foai atu pe nono atu se tupe e fesoasoani ai i le “faatuina o Siona” (Mataupu Faavae ma Feagaiga 101:74). O le iloaina sa manaomia e le Ekalesia ona faatau mai ni fanua lea e mafai ai ona faapotopoto le Au Paia, o lea na malie ai Karolaine, e 21 tausaga, e tuuina atu le $150 i le tinoitupe ma le $107 i fanua, lea sa sili atu nai lo se isi lava foai a se tagata o le paranesi.1
Sa malolo Karolaine, o lona tuagane laitiiti, o Iosefa, ma se tasi o o laua tausoga i Katelani, Ohaio, a o latou agai atu i Misuri. Sa latou feiloai ma Iosefa Samita ma le au fautua maualuga a Katelani. Sa faamalumalu ifo se ao o aitalafu i luga o le Ekalesia i le taimi lea, ma sa talosaga atu fautua maualuga pe o le a naunau Karolaine e faaune atu i le Ekalesia nisi o ana tupe. E pei ona taʻua i faamatalaga o le fonotaga, “Na iloa e le aufono [na] umia e Tuafafine Kalolaine Tippets se tupe e $149.75. … Na faapena foi ona valaauina o ia i le aufono ma faaalia lona naunautaiga e nono atu le aofaiga lava lea.”2
Sa vaai Kalolaine i le sainiga o le maliega o le nonogatupe e Iosefa Samita, Oliva Kaotui, ma Feterika Viliamu. Ae atonu na te lei vaai ia Iosefa ma Oliva o tootutuli i le tatalo i le aso na sosoo ai, ma tuuina atu le “faafetai mo le toomaga lea na auina mai talu ai nei e le Alii.”3 Faafetai i le naunau o Kalolaine e faasoa atu ana punaoa, sa mafai ai e le Ekalesia ona totogi faauma ni aitalafu ma faaauau ai le fausia o le Malumalu o Katelani.