Fesoasoani mai le Isi Itu o le Veli
A o ou taoto i le tiga i le falemai, sa ou lagona le tuuatoatasi seia oo ina ou manatuaina ou tuaa pele.
Atapue mai le Getty Images
I le 2017, na ou maitaga ai i le ma tama muamua. Sa ma fiafia lava ma lou toalua o Lucas, ae sa ou fefe mo le taunuu mai o tamai Juan Lionel.
I le tuneva o se tasi po i le amataga o Fepuari 2018, sa amata ona ou tigafanau. Sa na o le valu masina sa ou i ai, ae sa foliga mai o le a vave ona sau le ma pepe nai lo le mea na faamoemoeina. Sa ma aumaia ni nai mea ma vave ona o ese atu mo le falemai. Ou te lei lagona le sauni e fanau, ae sa ou tatalo, ma ole atu i le Atua ina ia faia Lona finagalo e tusa lava po o le a lo ma fefefe.
Ina ua ma taunuu atu i le falemai, sa faailoa atu i la’u fomai ae sa fai mai o le a taunuu o ia i se taimi mulimuli ane. Sa valaau ma tesi atu lou toalua i o ma matua ma o ma tei, ae e leai se tasi o i latou na ala i lena taimi. Sa faaauau ona ia valaau atu ma tesi i le po atoa, ae sa leai se tasi na tali mai. Na ou lagona ai lava le tuuatoatasi.
A o faateleina le tiga o lou manava, sa atili ai ona ou lagonaina le tuuatoatasi. Ae peitai, na faafuasei lava, ona tupu se mea matagofie lava. Sa amata ona ou mafaufau i ou tuaa—ae maise lava le tina matua o lou tina, o Rosa Mercado, ma lona tina, o Javiera Balmaceda.
A o ou manatuaina i laua, sa ou lagonaina i lou loto ma lou mafaufau e faapea, sa la i ai faatasi ma au i lena taimi. Sa ou lagonaina lo laua i ai i se auala malosi ma le matagofie lea e le mafai ona ou faamatalaina atoatoa i upu mea sa ou oo i ai. Ou te lei vaai ia i laua, ae sa ou lagonaina i laua na latalata mai, ma tuuina mai ia te au le lototele, lagolago, ma le alofa i le avea ai ma ou tina ma o se vaega o lo’u aiga. Sa ou lagonaina o i laua o agelu o loo auauna mai ia te a’u i lou taimi o puapuaga.
I tausaga na muamua atu i totonu o le malumalu, sa matou faia ai ma lou tina, tama, ma nai ou tei, lo’u toalua, o la galuega sui ma galuega sui o isi tuaa. Ou te lagona o le lototele na ou maua ma le lagona sa ou maua o ou tuaa sa latalata mai o se meaalofa e ala i le mana ma le pule a le Atua.
Talu mai lena taimi, sa ou lagonaina le Agaga o ou tuaa i isi taimi, e fesoasoani ia te au ma taialaina au o se tina ma se ava ma i isi vaega taua o lou olaga.
Ou te molimau atu o le a le tuulafoaiina lava i tatou e le Atua i luga o le ala o o tatou olaga. Afai tatou te faia Lana galuega, o le a tuuina mai ia i tatou le fesoasoani mai le isi itu o le veli. O le a tatou maua le alofa, poto, malosi, ma le filemu “e silisili lava i mea uma e manatu i ai” (Filipi 4:7).