O Leo o le Au Paia o Aso e Gata Ai
O le Tagata o loo O’u Taulimaina Lana Mataupu po o Lo’u Valaauga?
A o ou taumafai e faataunuu ou tiutetauave faaleperisitua, sa faaali mai e le Alii ia te au sa Ia silafia lou tulaga tautupe.
Atapue mai le Getty Images
Ina ua valaauina au e avea ma peresitene o le korama a toeaina i le 2000, e na o le toafitu toeaina sa auai i le sauniga a le au perisitua. E le gata i lea, matou te le o faia se galuega lelei o le faia o a matou aoaoga i aiga—lea ua taua o asiasiga—faaleauaunaga.
Sa ou iloaina sa matou feagai ma se luitau tele o le musuia o toeaina e agai i luma. O lea la, mo se amataga, sa tonu ai ia i matou e toefaatulaga tofiga ma faateleina le vaavaaiga.
Ona o au o se loia tutoatasi, o lea e tele ai iina ou fealuai. Ou te pisi tele, ae sa ou manao e faataunuu ou tiutetauave faaleperisitua.
I se tasi aso, sa ou malaga ai i le pasi e agai atu i se isi aai e tulitatao se tagata sa ou taulimaina lana mataupu. Ona e utiuti laʻu tupe, na ou faʻamoemoe o le a malie le tagata o loo ou taulimaina lana mataupu e totogi muamua aʻu.
I le ala e pue ai le pasi, sa tonu ia te au ou te alu e vaai ni tagata o le korama ma faamalosiau i latou e asiasi i a latou aiga. O nisi sa galo ae sa tautino mai e faia. O isi na tautino mai e faauma a latou asiasiga i lena lava vaiaso.
Sa matuai ou fiafia lava i a latou tautinoga o lea sa ou filifili ai e asiasi ma faamalosiau i isi tagata o le korama. Ae ou te lei iloaina, ua tea le aoauli. O lea, nai lo le tuua o le taulaga, sa tonu ia te au ou te alu i lo’u ofisa e iloilo ai le mataupu a lau tagata.
Sa ou te’i, ina ua ou taunuu atu i lo’u ofisa, sa tutu mai o ia i fafo faatasi ma se isi tagata. Sa ou faamalamalama atu ia te ia o lea sa ou sauni e iloilo lana mataupu ma o le a i ai se lipoti mo ia i le aso e sosoo ai. Sa ia fai mai na sau o ia e faailoa mai ia te au se tagata fou o loo manaomia foi la’u auaunaga. Ina ua uma ona ma talanoa ma lana uo, sa ma malilie i se tupe mo au e fesoasoani ai ia te ia e foia aona mataupu faaletulafono. Ma, sa faafuasei lava ona ofo mai ma la’u tagata e totogi muamua mai au.
Mo a’u, sa o se vavega lena mea. Sa silafia e le Tama Faalelagi sa ou taumafai e faamaoni ia te Ia. Sa Ia silafia foi o’u manaoga. Ua Ia faamanuiaina au i le tele o itu i le aluga o tausaga, ae o le taimi lenei, o Lana faamanuiaga na oo mai i mea tautupe. Sa Ia faataunuuina Lana afioga i tusitusiga paia ia i latou o e auauna atu ia te Ia: “Ia outou muai saili le malo o le Atua, ma lana amiotonu; ona faaopoopoina atu ai lea o ia mea uma ia te outou” (Mataio 6:33).
Ma le matou korama a toeaina? Na faamanuiaina i matou e le Alii a o matou agai i luma ma se agaga lotogatasi. E lei umi ae oo a matou asiasiga i aiga i le 100 pasene, ma na faateleina le auai o le perisitua i le 35 toeaiina faamaoni.
Ou te molimau atu e mafai ona avea i tatou uma ma meafaigaluega i le galuega a le Alii ma maua le olioli ma faamanuiaga i le auauna atu ia te Ia e ala i le auauna atu i isi.