Nao le Faatekinolosi: Sau, Mulimuli Mai Ia Te Au
Mataupu Faavae ma Feagaiga 102–105
Toe Foi Vave i le Fale—O Mea na Ou Aoaoina mai le Tolauapiga a Siona
E alaala le tusitala i Iuta, ISA.
Ina ua ou toe foi vave mai i le fale mai la‘u misiona, sa ou maua le mafanafana i se tala i uluai Au Paia.
A o ou tuputupu ae, sa le popole ma faigofie lo’u olaga. Sa faigofie ona oo mai ia te au le aoga ma mea e fiafia i ai. Sa le tele ni mea ou te faitio i ai ma sa masani ona fiafia.
Ae ina ua atoa lo‘u 19 tausaga, sa suia lo’u olaga.
Ina ua ou alu mo la‘u misiona i Asuncion, Parakuei, sa ou fiafia lava. Sa ou faamoemoe o le a lelei mea uma, e pei lava ona sa i ai i lo‘u olaga atoa. Ina ua mavae le pe a ma le fa masina i la‘u misiona, sa ou toe foi mai i lo’u nuu ona o le lofituina i le faanoanoa ma le atuatuvale. I lou mafaufau, sa faamanuiaina lava au i taimi uma—o se tasi e lei iai ni vaivaiga, e pei lava e moni lena mea. O lenei ua faatumulia a‘u i le fefe, tausalaina, ita, leai se faamoemoe, ma le faanoanoa. Pau lava le mea na mafai ona ou mafaufau i ai o le tele o le toilalo sa ou iai.
Aoaoina mai le Tolauapiga a Siona
O se tala i le talafaasolopito o le Ekalesia na ou maua ai sina mafanafana. I le aso 24 Fepuari, 1834, na maua ai e Iosefa Samita se faaaliga (Mataupu Faavae ma Feagaiga 103) e faatulaga ai le silia ma le 100 alii e malaga atu i le Itumalo o Siakisone, Misuri, ISA, e fesoasoani i le Au Paia e toe maua mai le laueleele na faoa ina ua faateaese i latou mai iina i le tausaga ua mavae atu. Pe tusa ma le 230 alii, tamaitai, ma tamaiti na auai i le malaga, lea na ta‘ua o le Tolauapiga a Siona. Ina ua uma ona sauniuni, sa tuua e le vaega le aiga ia Me ma savavali atu e tusa ma le 40 maila i le aso.1
E le gata ina feagai le Tolauapiga a Siona ma itu faaletino o le malaga, ae sa faaalia foi e ni nai tagata o le vaega le faatuai, le usiusitai, ma le fouvale. Ae e toatele isi sa tumau faamaoni ma faitauina le malaga ma le avanoa e faatasi ai ma Iosefa o se faamanuiaga. Faatasi ai ma tulaga na suia ai i latou, sa sailia ai e le Perofeta le taitaiga mai le Alii ma maua ai se isi faaaliga ia Iuni (Mataupu Faavae ma Feagaiga 105) ma fai mai ua latou le toe manaomia ona faaauau a latou taumafaiga. Sa toe foi mai tagata o le tolauapiga i le fale e aunoa ma le foliga mai na faataunuuina lo latou faamoemoega e laveai Siona, e ui ina sa toatele na iloaina e le o se toilalo aua o le malaga na mafai ai ona latou latalata atili atu i le Atua ma vaai i Lona aao i o latou olaga.2
Tauiviga i le Tolauapiga a Siona, saunia e Clark Kelley Price
Fesuiaiga o le Taulai Ese Mai “Mafuaaga” o Taimi ua Tuanai
Ina ua feagai le Au Paia i le Tolauapiga a Siona ma le tala o le a latou toe foi atu i le fale e aunoa ma lo latou faamanuiaga faamoemoeina, atonu sa latou mafaufau poo le a le mafuaaga na faatonuina ai i latou e le Tama Faalelagi e malaga atu i le amataga. Sa ou mafaufau foi a’u i le mafuaaga na taitaiina ai au i se itu lea e lei oo i ai e pei ona sa ou fuafuaina.
Ina ua mavae ni vaiaso se tele o lagona faanoanoa sili atu nai lo le mea sa ou lagonaina muamua, sa ou iloaina ou te lei manao e faaauau pea ona ola ma se uiga le lelei faapena. Sa ou iloa e lei auina mai au i le lalolagi e ola i se olaga ua lofituina i le lotovaivai ma le le mautonu. E mavae mea uma, ua tatou i ai ina ia tatou “maua le olioli”! (2 Nifae 2:25). Sa ou filifili e fesuiai la‘u taulaiga mai “mafuaaga” o le tuanai i le sailia o se faamoemoe i le lotolotoi o puapuaga.
Sa ou aapa atu i isi tagata, sa ou aafia i ni mea faafiafia fou, ma toe foi i le aoga. Sa ou amataina foi se api talaaga o le lotofaafetai i aso taitasi. O le mea na amataina i se laina se tasi na iu ina liua i ni laupepa atoa ao amata ona ou iloa le aao o le Alii i lo‘u olaga e aunoa ma ni taumafaiga. Na suia a‘u tatalo mai lisi o moomooga i lisi o le lotofaafetai.
E ui lava e lei mou atu o‘u aso faigata—e lei mou atu lava—ae ua ou iloa nei le eseesega e iai i le taulai atu o la’u vaaiga i le lelei i le olaga. Nai lo le vaaia i o‘u tofotofoga o se mea leaga, sa ou filifili e vaai i ai o se avanoa mo le tuputupu ae.
Iloaina o Mafuaaga
O le toe tepa i tua i auala na suia ai mea uma talu ona ou sau i le fale mai Parakuei, ua mafai ona ou iloa le ala na taialaina ai au e le Tama Faalelagi ma tuuina mai ia te au avanoa e ala i ou aafiaga. Sa ou feiloai i nisi o a‘u uo mamae i na masina ina ua maea la’u misiona, ma sa mafai loa lava ona amata ona ou suesue i se iunivesite i le lotoifale, e ui lava ua pasi le aso na faagata ai le lesitala. O lena polokalama na taitai atu ai au i se aoga i Suitiselani, lea na mafai ai ona ou faasoa atu le talalelei i lo‘u aiga na talimalo ai.
O na tausaga o le filifili ma le iloa lelei o le lotofaafetai ua uunaia ai au i se mausa o le faafetai atu i le Tama Faalelagi mo mea uma, lea ua faateleina ai lou faatuatua ia te Ia.
O upu nei i se faamanuiaga faaperisitua na ou mauaina i se vaiaso o faafitauli na fesoasoani foi ia te au e malamalama ai i le faatuatua: “Ou te faamanuia ia te oe i le malamalama ma le poto o le Atua … o le a tuuina atu ia te oe na mea o le a le gata ina avea mo lou lelei ae … fesoasoani ia te oe ia avea ma tagata e finagalo o Ia ia avea ai oe. O le a le faigofie i taimi uma na faamanuiaga, ona o tatou tauiviga ma faigata o mea ia tatou te tuputupu ae ai.”
Ou te iloa e faapaiaina e le Tama Faalelagi a tatou taumafaiga, ma e pei ona sa aoao mai Peresitene Russell M. Nelson, “E fiafia le Alii i taumafaiga.”3 E sailia moni lava e le Atua lo tatou fiafia ma o le a faavavau ona i ai i o tatou autafa.