Malamalama e Puipuia ai i Tatou
Sa lei alu i fafo le avetaavale mai lana taavale, ae na ou iloaina sa sau o ia e puipui i matou.
Pito i luga: ata pue mai le Getty Images; ogatotonu: ata pue mai faaaloaloga a le tusitala
I se po malulu o le taumalulu ia Fepuari, o matou ma laʻu fanau e toalua, faatasi ai ma loʻu tina, o Jo Ann, sa matou malaga atu i Idaho. O le matou faigamalaga e valu itula na aofia ai le ui atu i luga o ni mauga se lua. I le taimi lenei o le tausaga, e mafai ona matuai leaga lava le tau.
Na faatoa uma lava ona matou tuua le Aai o Baker, Oregon, ae amata loa ona pau le kiona. A o matou malaga atu, sa atili ona lapopoa mataua o le kiona. I totonu o ni nai minute, a o matou uia se mauga, sa le mafai ona ou iloa atu se mea i ou luma, o lea sa ou afe ai i autafa. Sa ou tatalo i le Tama Faalelagi e fesoasoani mai ia ou aveina atu lo’u aiga i le saogalemu. Ina ua uma ona ou tatalo, sa afe mai i o’u tua se loli la’u oloa, ma na tu i na o ni nai inisi lava oo mai i le pito i tua o la’u taavale.
Sa lei oso i fafo le aveloli mai lana loli, ma ou te lei vaai lava i ona foliga. Ae sa ou iloaina i lena taimi sa sau o ia e puipui i matou. E ala i le paka i tua atu o i matou, sa ia faaaogaina ai moli o lana loli e faailoa atu ai i isi avetaavale o loo matou afe i tua. Ina ua ou maua le lototele e faaauau ai le aveina o le taavale, sa matou toe oso i luga o le auala i tua atu o se isi loli la’u oloa ao tumau ai pea le loli muamua i o matou tua. Sa matou o i le va o loli e lua a o laua taiala i matou ia ui ese mai mea matautia.
Ina ua matou tuua le mauga, sa liua le kiona i le timu. Sa ou manao e faafetai atu i le aveloli sa i o matou tua, ae i le taimi lava na ou aluese ai mai le mauga, sa le mafai ona ou iloa atu o ia. O le taimi lena, sa ou iloa ai o le a lelei mea uma ma o le a matou taunuu saogalemu i le fale ma o lea sa matou oo lava.
O le taimi lea o loʻu olaga na matuai ou fefe ai lava. Ou te faafetai ona ua auina mai e le Tama Faalelagi ni agelu e puipuia i matou, tuumama o matou popolega, ma tuu mai ia te au le malosi ma le lototele sa ou manaomia e aumai ai lou aiga i le fale.
“O le taimi lea o loʻu olaga na matuai ou fefe ai lava,” o le tala lea a Chelsey, o loo i ai i le ata ma lona tina, o Jo Ann Bressler, ma ona atalii, o Wyatt ma Atamu.
Pito i luga: ata pue mai le Getty Images; ogatotonu: ata pue mai faaaloaloga a le tusitala
O le mea e malie ai, o a’u o le afafine o se aveloli. Na tali mai le Tama Faalelagi i laʻu tatalo i le auina mai lea ia i matou o ni tagata puipui i tulaga o ni aveloli. Sa matuai faatupulaia la’u molimau i lena po—e le gata i le tatalo ae faapea foi o loo i ai o Ia faatasi ma i tatou e le aunoa ma le faavavau.