Na’o le Faatekinolosi: Talavou Matutua
Sailia o Le Fesoasoani mo Tauiviga o le Soifua Maloloina Faalemafaufau
Sa ou fefe ina ua amata ona ou maua i aafiaga o le atuatuvale, ae sa ou liliu atu i le Alii—ma sa Ia fesoasoani mai ia te au ia maua le fesoasoani ma punaoa sa ou manaomia e amata ai le faamalologa.
I se tasi aso i ni nai tausaga ua mavae, sa ou lagonaina le matuai vaivai lava i luga o le nofoaafi i le agai atu i le fale mai le galuega. Sa faatumulia lo‘u mafaufau i mafaufauga popole ma taufaafefe. E le o le taimi muamua lea ua oo mai ai ni mafaufauga faapea i lou mafaufau, ae sa faaali soo mai, ma o le taimi lea, sa ou fefe.
Na faafuasei lava, ona ou lagonaina le tiga tiga tele i lo‘u fatafata, ma sa amata ona faigata ai ona ou manava. Na amata ona ou popole. Na tatavale lo’u fatu. Ina ua ou taunuu atu i le nofoaga o nofoaafi e lata ane i lo‘u fale, sa ou nofo i lalo i luga o se nofoa umi, sa le mafai ona ou faia se isi laa.
Sa vave ona ou i ai i se taavale a le falemai a o ou agai atu i le falemai, ma le mautinoa o le a ou oti.
Lagonaina o le Maasiasi
I ni nai masina a o lei tupu lenei mea, sa lofituina au i le tele o mea na tutupu i lou olaga, ma sa amata ona aafia lou soifua maloloina faalemafaufau. Sa ou lagonaina le faanoanoa ma le tele o le ita ia te au lava. Sa ma feiloai ma se faufautua, ae sa ou iloaina sa ou manaomia se fesoasoani sili atu. E ui i lea, sa le mafai ona ou aumaia au lava e vaai se fomai. Ou te lei manao lava e faamasinoina pe vaaia e vaivai, ma sa ou lagona le maasiasi i mea sa ou oo i ai.
Sa ou lagonaina lenei mea ona i totonu o Iapani, e le masani ona talanoa tagata e uiga i faafitauli faalemafaufau ma faalelagona, ma afai latou te faia, e le talanoaina faafitauli i fafo atu o le aiga o le tagata lava ia.
I le falemai, sa faapea mai fomai ou te le oti—sa na o ni aafiaga o se osofaiga o le atuatuvale. O lea sa auina atu ai au i le fale i le taimi lava na ou lagonaina ai le mausali.
Ae o le aso na sosoo ai, sa tupu pea le tata vale o lo‘u fatu. Sa ou iloa e pei na fesootai i lo‘u soifua maloloina faalemafaufau lea ua faaitiitia, o lea na iu ai ina ou aumaia le lototele e faia ai se taimi faatulagaina ma se fomai faapitoa o le mafaufau.
Sa maua a‘u i le faaletonu o le popolevale lautele, ma sa tusia e le fomai ni fualaau o le atuatuvale mo a’u.
I le faamaoni lava, sa faigata ona talia lenei faamaoniga i le taimi muamua. Ae i le taimi lava lea, sa ou maua le to‘a ina ua faamatala mai e le fomai e le o se vaivaiga lenei mea—o se tulaga sa manaomia ona togafitia.
Aapa Atu i le Tamā Faalelagi ma le Faaola
Sa ou manatu o le a vave ona ou malosi, ae e le o le tulaga lena. O le taamilosaga o le lagonaina pea o le lelei ona toe pau atu lea i se tulaga o le faanoanoa sa le fiafia ai.
I se aso na faapitoa le faigata, sa ou filifili ai e liliu atu i le Alii. Ma a o ou faia, sa amata ona ou vaai i la‘u faagasologa o le faamalologa o se avanoa e faamaualalo ai a’u lava, e tatala ai lo‘u mafaufau i le moni o tauiviga o le soifua maloloina faalemafaufau, e faataitai ai le taliaina ma le onosai, ma faalagolago atili ai i le Tama Faalelagi ma le Faaola.
I le talitonu ai e mafai ona La faamaloloina a‘u, sa amata ai ona ou tatalo ma le filiga mo le malosi ma mo le taitaiga i punaoa e mafai ona fesoasoani ia te a’u. Sa musuia foi au e fesili atu i o‘u uso a auaunaga mo ni faamanuiaga faaleperisitua i aso faigata moni lava. E ui lava sa lei faamaloloina atoatoa au i le taimi lava lena, o taimi uma lava ou te maua ai se faamanuiaga faaperisitua, sa mafai ona ou lagonaina le filemu i lou loto, taitaiga, ma le faamoemoe.
Sa ou lagona moni lava o le “agalelei vave o le Atua” lea na saunoa i ai Elder Kyle S. McKay o le Fitugafulu. E ui lava o loo tatou faatalitali ma le onosai i le Alii, ae e i ai faamanuiaga faapitoa e oo vave mai ia i tatou.”1
Mauaina o le Faamalologa
Ou te lei mafaufauina lava o le a ou tauivi ma ni luitau o le soifua maloloina faalemafaufau. Peitai, e ala i lenei aafiaga, ua ou toe aoaoina ai e silafia e le Alii i tatou taitoatasi.
Sa ou molimauina lenei mea ina ua ou filifili e fai se malologa mai le galuega e fesoasoani ai ia faamaloloina lo‘u mafaufau. I le talanoa ai ma lou pule, sa ou te‘i i le tele o le agaalofa ma le malamalama na ia faaali mai ia te au. Sa ia ta‘u mai foi ia te a’u o ia o se tagata faamaonia i tulaga tau faufautua o le soifua maloloina faalemafaufau.
Sa ou lagonaina e le o se mea na tupu fua lo‘u faigaluega ai mo lenei alii, ae maise lava le mea moni e faapea, o le soifua maloloina faalemafaufau e le talanoaina faasamasamanoa i Iapani. Sa atili ai ona ou nofouta i le alofa mutimutivale ma le aafiaga a le Tama Faalelagi i auiliiliga o o tatou olaga.
O faafitauli o le soifua maloloina faalemafaufau e mafai ona faigofie ona tupu i soo se tasi, ma e leai se mea e maasiasi ai. E manaomia ona togafitia i latou, e pei lava o isi tulaga faafomai po o gasegase.2 I le taimi nei o i latou o se vaega o lo‘u olaga, ou te lagonaina se lagona o le agaalofa ma le alofa mo isi o e o feagai ma tauiviga faapenei.
Ua ou iloaina e tusa lava pe toatele tagata o siomia au e le malamalama i luitau o le soifua maloloina faalemafaufau, e silafia lava e le Faaola. Ma ua Ia saunia mulimuli ane se ala mo a‘u e faatoilalo ai lenei luitau. Faatasi ai ma Ia, e oo lava i vaitau sili ona faigata o le olaga e mafai ona avea ma o tatou lelei ma mo lo tatou tuputupu ae faaleagaga (tagai Roma 8:28).
O loo faagaslo pea lo’u maloloina, ae ua ou iloaina o ou tofotofoga e mafai ona fesoasoani ia te au e iloa ai le alofa o le Tama Faalelagi ma Iesu Keriso mo i tatou taitoatasi. Ou te iloa a tatou faalagolago i lo tatou Tama oi le Lagi ma le Faaola, o le a La lagolagoina pea i tatou i o tatou tauiviga ma faaauau pea ona fesoasoani ia i tatou ia maua le faamoemoe ma le faamalologa.