Matutua ma le Faamaoni
O Lo’u Fesoasoani Faamaoni
A oo i auaunaga, sa lei vaaia lava Lale i le matua o se papupuni.
Ata na tusia e Carolyn Vibbert; ata pue mai faaaloaloga a le aiga o Morgan
Ina ua toe me’i atu lo’u aiga i le nuu lea na ou ola ae ai, sa matou maua ai se nuu ua suia. Sa masani ona lauiloa o se nofoaga mo aiga talavou, o le pitonuu ua avea nei ma aiga o le toatele o fafine ua oti a latou tane ma tamaloloa ua oti a latou avā, o matua ua matutua a latou fanau ma ua me’i ese, ma se vaega itiiti ae faatupulaia o aiga talavou o e na me’i mai pe a avanoa ni fale.
Ona o le fesuisuiai o le faitau aofai o tagata, sa toe faatulagaina ai tuaoi o le uarota. O vaega o uarota e tolu sa tuufaatasia i se uarota e tasi, ma sa valaauina ai au o se epikopo. Sa na o ni nai aso sa tuu mai e mafaufau ai i ni fesoasoani. Sa vave ona oo mai le igoa muamua ma sa faamautu mai e le Agaga. Ae sa lei vave lava ona ou mautinoa po o ai le isi fesoasoani e tatau ona i ai.
Sa ou mafaufau i nisi o alii talavou i le uarota fou, ae ou te lei iloaina lelei i latou. Sa foliga mai ia te au, sa matou manaomia tele i latou i le faalapotopotoga a Alii Talavou.
Sa ou iloa se tagata matua, o Lale Morgan, o le sa nofo i le pitonuu mo se taimi umi lava. O le mea moni, sa avea o ia ma se taitai o le autalavou a o ou talavou. O lea la ua 76 ona tausaga. Sa ou lagona le uunaiga e talanoa atu ia te ia. “Atonu o le a ia fesoasoani mai ia ou masani lelei i nisi o tagata ou te le iloa,” sa ou mafaufau ai.
Sa tu o ia i le auala taavale ina ua ou taunuu atu i lona fale, ma e aunoa ma se upu na tautalagia, sa ou iloaina o le a avea Lale ma se fesoasoani. Sa ou asiasi atu ia te ia mo ni nai minute; ona ou toe foi atu lea i le fale ma valaau atu i le peresitene o le siteki. O le Aso Sa lena sa lagolagoina ai le au epikopo, faatasi ai ma Lale o le fesoasoani lua.
O Lale sa leomalu ma sa faaeteete lana amio, ae ina ua ia saunoa, sa faalogo tagata. Sa le maluelue foi lona faatuatua i le Alii. Sa vave ona ou aoao e faalagolago i lana fautuaga.
“O le a Matou Asiasi Atu Ia i Latou”
O faiaoga o aiga (ua lauiloa i aso nei o uso o auaunaga) sa faia se galuega maoae o le asiasi atu i fafine ua oti a latou tane ma tamaloloa ua oti a latou avā ma faailoa atu i le au epikopo pe na faapeī mai i latou. O le aso, o le tele o le tiutetauave mo lo latou manuia o le a i luga o le Korama a toeaina ma le Aualofa. Ae i lena taimi, sa ou lagonaina se tiute e asiasi atu ia i latou. O lea sa ou faia ai se taumafaiga e asiasi atu i se toatasi pe toalua i le vaiaso. I le saoasaoa lena, o le a toeitiiti atoa le tausaga e asia ai i latou uma. Faatasi ai ma se aiga talavou sa manaomia foi lou taimi, sa tau le lava ai so’u taimi e fai ai mea uma.
Sa ou talanoa e uiga i lenei mea i le fonotaga a le au epikopo, ma sa i ai se manatu o Lale.
Lale ma Elisapeta Morgan
Ata na tusia e Carolyn Vibbert; ata pue mai faaaloaloga a le aiga o Morgan
“Ae a pe a ma fesoasoani atu ma lo’u toalua?” na ia fai mai ai. “Ma te avanoa i le aso atoa e asiasi ai. Faalagolago i faiaoga o aiga, ae tuu mai ia maua ma Elisapeta ma te o e vaai i latou o e manaomia sina manatulia faaopoopo. O le a ma faailoa atu ia i latou o loo e mafaufau atu ia i latou.”
Ina ua mavae lena, sa faia e lo’u fesoasoani faamaoni ma lona faletua le tele o asiasiga ma faafiafiaina ni agaga se toatele. Sa laua matuai faamamaina la’u avega mamafa naua.
“O Le A Le Matua o le Perofeta?”
I se tasi taimi, sa manaomia ai e le matou uarota se faiaoga o Aoaoga Faavae o le Talalelei i le Aoga Sa. I le avea ai ma se au epikopo sa matou tatalo ma iloiloina ma le peresitene o le Aoga Sa ni nai igoa. Ae matou te lei lagonaina se faamautinoaga e uiga i le mea e fai. Na toe i ai foi se manatu o Lale. “Ae a Ila Gibb?” O Ila sa 70 ma ona tupu ona tausaga, ae sa matou lagonaina uma le uunaiga o le a avea o ia ma se faiaoga lelei. Sa ioe i ai le peresitene o le Aoga Sa.
Sa ata Tuafafine Gibb ina ua ma faasafua atu i ai le valaauga. “Ua ou matua,” o lana tala lea. “O au ua le toe taulia.”
Ina ua tali atu Lale, “Tuafafine Gibb, o le a le matua … ,” sa ou manatu o le a ia faia o ia lava ma faataitaiga. Ae leai. Sa ia fai atu ma le agalelei, “O le a le matua o le perofeta?” O le taimi lea, na faatoa avea ai lava Peresitene Gordon B. Hinckley (1910–2008) ma Peresitene o le Ekalesia i le 84 o ona tausaga.
“Ua ou iloa le mea o le a e agai i ai,” na tali mai ai Ila. “Ou te matea e le mafai ona tatou matutua mo le auauna atu.” Ma mo le isi tolu tausaga na sosoo ai, sa avea ai o ia ma se faiaoga maoae o Aoaoga Faavae o le Talalelei.
Ua 69 nei ou tausaga, ma e masani ona ou mafaufau ia Lale ma le faatuatua sa ia faaalia e talia ai le valaauga e auauna atu o se fesoasoani i le au epikopo i le 76 o ona tausaga. A o ou mafaufau e uiga i lana auaunaga, e musuia lava au e mafaufau faapea, o loo tele lava mea e mafai ona ou faia—ma o le toatele o i tatou i o tatou 60, 70, ma 80 ona tupu tausaga e mafai ona faia—e faaauau ai ona fausia le malo o le Atua.