NODA TABANA
Era Veivuke na Volodia Vei Ira na Gonelalai Didivara ena iTikotiko Raraba e Viti
Era a vakaitavi na lewenilotu ena Samabula 1st Ward (ivavakoso) ni Lotu i Jisu Karisito ni Yalododonu Edaidai ena dua na veivakatorocaketaki ena Harland Hostel baleti ira na didivara e Viti ena Maji ni 2021.
Era a cakacakataka e lewe 20 na volodia e tolu na auwa ena kena samaki na icili ka qito vata kei ira na gonelalai. Era a qaruta na rara, were co, teitei, ka sasamaki. Era a ripeataka talega e dua na misini ni savasava.
“Keimami a vinakata na neimami lewenilotu, vakabibi o ira na luvei keimami, mera raica sara ga e matadra na sala era biuta kina o ira na gone yabaki lima na nodra veivale kei ira era daulomana ka laki vakaitikotiko ena icili me rawa ga kina vei ira mera rawata na vuli torocake digitaki,” a vakamacalataka o Eileen Swann, e dua vei ira a vakaitavi.
Era tiko ena Harland Hostel me baleti ira na Didivara e 26 na gone mai na yabaki lima ki na 14. E tiko talega e dua na vale redetaki vei ira na cauravou qase cake kei na dua na icili vei ira na goneyalewa qase cake.
“Na icili e lima walega na miniti na kena yawa mai na neimami valenilotu keimami dau soqoni kina ena vei Siga Tabu me keimami kila tiko kina na lewe ni Lotu o ira eso tale ena itikotiko raraba keimami tiko kina,” e kaya o Swann.
“E gadrevi me keimami kila tiko na neimami itikotiko raraba, kila na veiqaravi sa tu kina se na sala keimami rawa ni qarava kina na neimami itikotiko raraba. Ena gauna keimami raibaleta kina na neimami duidui, keimami na kunea ni keimami sa duavata sara ena vuqa na ka. Ni caka oqo keimami sa tara cake kina na itikotiko raraba e qaqa ka gugumatua ka lewenivanua vinaka cake.”
Rau a vakaitavi talega e dua na drua goneyalewa mai na isoqosoqo ni itabagone ni Lotu, dina ga ni a nodrau siganisucu.
“Au a vakila na reki niu kila niu sa cakava tiko na ka dina meu veivuke ena veiqaravi,” a kaya o Mielda Waqa, e dua na itabagone a vakaitavi. “Dina ga niu sega ni kilai ira vinaka sara, na nodra matadredredre e tukuna e levu na ka.”
E kaya o Arti Malawarair, e dua tale na lewe ni Lotu, “A dua dina na veiqaravi digitaki ka totoka. Au a vuli vakaidina mai vei ira na gone e kea kei na sala eda sa luvena kece kina na Kalou. E vakacegu na lomada ni da vukei ira na tamata era tiko voliti keda. Sa dua dina na veivakalougatataki totoka.”
Era a vakaraitaka eso tale na vakaitavi kina na nodra vakavinavinaka ni ra raica na nodra mamarau na gone dina ga ni ra sega tu ni rogoca rawa e dua na ka ka tiko vakayawa maivei ira na nodra matavuvale.