« ដ្បិតសាសនាចក្ររបស់យើងនឹងត្រូវបានហៅថាដូច្នោះ »
ដោយប្រធាន ហិនរី ប៊ី អាវរិង
ទីប្រឹក្សាទីពីរក្នុងគណៈប្រធានទីមួយ
នៅពេលយើងប្រើឈ្មោះពេញលេញរបស់សាសនាចក្រ យើងមានពរ ហើយយើងផ្ដល់ពរជ័យដល់មនុស្សដទៃទៀត ។
នៅប្រទេសអាហ្វ្រិក មានមនុស្សជាច្រើនកំពុងស្វែងរកព្រះវិហារមួយដើម្បីចូលរួម ដោយប្រាប់ថាបានឃើញក្នុងសុបិន ។ នៅក្នុងសុបិនរបស់ពួកគេ ពួកគេត្រូវបានណែនាំឲ្យរកមើលព្រះវិហារមួយដែលត្រូវបានហៅតាមព្រះនាមនៃព្រះយេស៊ូវគ្រីស្ទ ។ នៅពេលពួកគេបានស្វែងរកនោះពួកគេបានរកឃើញថាមានតែព្រះវិហារមួយគត់ដែលមានព្រះនាមរបស់ព្រះអង្គសង្គ្រោះនៅចំកណ្ដាលគឺ—សាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយ ។
នៅទ្វីបអាមេរិកឡាទីន ពួកបរិសុទ្ធថ្ងៃចុងក្រោយជាច្រើននាក់បានប្រាប់ថា ការអញ្ជើញរបស់ពួកគេទៅកាន់មិត្តភក្ដិដើម្បីមកចូលរួមនឹង « សាសនាចក្រមរមន » គឺមានភាពស្មុគស្មាញណាស់ ។ ភាពស្មុគស្មាញនោះបានផ្លាស់ប្ដូរនៅពេលពួកគេបានធ្វើការអញ្ជើញមួយមកកាន់សាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយវិញ ។ មិត្តភក្ដិរបស់ពួកគេបានតបថា « ប្រសិនបើព្រះវិហាររបស់ឯងត្រូវបានហៅថា សាសនាចក្រនៃព្រះយេស៊ូវគ្រីស្ទ នោះយើងចង់ទៅមើល » ។
នៅសហរដ្ឋអាមេរិក ក្មេងប្រុសម្នាក់បានអញ្ជើញអ្នកជិតខាងគាត់ទៅចូលរួមពិធីបុណ្យជ្រមុជទឹករបស់គាត់ ។ គ្រូគង្វាលម្នាក់នៃសាសនាផ្សេងមួយបានថ្លែងថា គាត់មិនចង់ទៅពិធីបុណ្យជ្រមុជទឹករបស់ « សាសនាចក្រមរមន » ទេ ។ ប៉ុន្តែដោយសារគាត់អាចដឹងថា ព្រះវិហាររបស់ក្មេងប្រុសម្នាក់នោះបានផ្ដោតលើព្រះយេស៊ូវគ្រីស្ទ នោះគ្រូគង្វាលរូបនេះបានចូលរួមពិធីនោះជាមួយនឹងភរិយាគាត់ ។
នៅពេលភ្នាក់ងារកក់សំបុត្រយន្តហោះម្នាក់បានសួរទៅសមាជិកសាសនាចក្រសូមអាសយដ្ឋានអ៊ីម៉ែល សមាជិករូបនោះបានតបថា « churchofjesuschrist.org » ។
ភ្នាក់ងារនោះបានសួរថា « តើព្រះវិហារនោះជាព្រះវិហារអ្វីដែរ ? »
សមាជិករូបនោះបានតបថា « សាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយ » ។
ភ្នាក់ងារនោះតបថា « ខ្ញុំចេញទៅធ្វើការងារម្ដងៗច្រើនថ្ងៃណាស់ ហើយគ្មានឱកាសនិយាយអំពីព្រះអម្ចាស់ទេ ។ ដោយដឹងថាខ្ញុំកំពុងនិយាយនឹងគ្រិស្ដសាសនិកម្នាក់ទៀតវាធ្វើឲ្យខ្ញុំរីករាយខ្លាំងណាស់ » ។
សមាជិកសាសនាចក្ររូបនោះបានប្ដូរប្រវត្តិសង្ខេបរបស់គាត់ភ្លាមៗជាមួយអាសយដ្ឋានអ៊ីម៉ែលថ្មីរបស់សាសនាចក្រ ៖ ChurchofJesusChrist.org ។១
ការសន្យាមួយបានបំពេញ
ដំណើររឿងដ៏អស្ចារ្យទាំងនេះតំណាងឲ្យការបំពេញការសន្យាដែលប្រធាន រ័សុល អិម ណិលសុន បានសន្យាទៅកាន់ពួកបរិសុទ្ធថ្ងៃចុងក្រោយនៅខែតុលា ឆ្នាំ២០១៨ និងនៅខែមេសា ឆ្នាំ២០២០ ។
ប្រធាន ណិលសុន បានមានប្រសាសន៍ថា « ខ្ញុំសូមសន្យាដល់បងប្អូនថា ប្រសិនបើយើងធ្វើឲ្យអស់ពីលទ្ធភាពដើម្បីស្ដារឈ្មោះត្រឹមត្រូវនៃសាសនាចក្ររបស់ព្រះអម្ចាស់ឡើងវិញ នោះទ្រង់ដែលជាសិរសានៃសាសនាចក្រនេះ នឹងចាក់ស្រោចព្រះចេស្ដា និងពរជ័យរបស់ទ្រង់មកលើពួកបរិសុទ្ធថ្ងៃចុងក្រោយ ដែលយើងពុំធ្លាប់បានឃើញពីមុនមកឡើយ ។ យើងនឹងមានចំណេះដឹង និងព្រះចេស្ដានៃព្រះដើម្បីជួយយើងនាំយកពរជ័យនៃដំណឹងល្អនៃព្រះយេស៊ូវគ្រីស្ទដែលបានស្ដារឡើងវិញទៅដល់គ្រប់ទាំងសាសន៍ គ្រប់ពូជមនុស្ស គ្រប់ភាសា និងគ្រប់ទាំងប្រជាជន ហើយដើម្បីរៀបចំពិភពលោកនេះសម្រាប់ការយាងមកជាលើកទីពីររបស់ព្រះអម្ចាស់ » ។២
ថ្មីៗនេះ តាមរយៈគណនីប្រព័ន្ធផ្សព្វផ្សាយសង្គមរបស់ខ្ញុំ ខ្ញុំបានអញ្ជើញសមាជិកសាសនាចក្រឲ្យប្រាប់ខ្ញុំអំពីពរជ័យដែលពួកគេបានទទួលមកពីការប្រើឈ្មោះត្រឹមត្រូវរបស់សាសនាចក្រ ។ ខ្ញុំរំភើបចិត្តជាខ្លាំងដោយទទួលបានការឆ្លើយតបជាង ២,៦០០ ។
ខ្ញុំចង់ចែកចាយរឿងនេះមួយចំនួនជាមួយនឹងបងប្អូន ។ បងប្អូនប្រហែលជាធ្លាប់ស្គាល់ពរជ័យទាំងនោះ ដោយសារបងប្អូនធ្លាប់ទទួលវា នៅពេលបងប្អូនបានធ្វើតាមការប្រឹក្សារបស់ប្រធានណិលសុន ។
ការខិតទៅជិតព្រះយេស៊ូវគ្រីស្ទ
ខ្ញុំមានចិត្តរំភើបដោយស្ដាប់ឮទីបន្ទាល់របស់យ៉ាកុប អំពីរបៀបដែលឈ្មោះពេញលេញរបស់សាសនាចក្របានជួយគាត់ផ្ដោតលើព្រះអង្គសង្គ្រោះ ហើយគាត់បានចែកចាយនឹងខ្ញុំថា « ខ្ញុំបានកត់សម្គាល់ឃើញថា ការផ្ដោតអារម្មណ៍របស់ខ្ញុំទៅលើព្រះយេស៊ូវគ្រីស្ទបានជ្រាបចូលទៅគ្រប់ទិដ្ឋភាពនៃជីវិតខ្ញុំ » ។ « នៅពេលខ្ញុំទទួលទានសាក្រាម៉ង់ ខ្ញុំគិតពីទ្រង់ និងពលិកម្មធួនរបស់ទ្រង់ ។ នៅពេលខ្ញុំអានព្រះគម្ពីរ ខ្ញុំផ្ដោតអារម្មណ៍ច្រើនលើបន្ទូលទ្រង់ និងសេចក្ដីផ្សេងទៀតអំពីទ្រង់ ។ ការណ៍នេះបាននាំខ្ញុំឲ្យខិតទៅជិតទ្រង់ ហើយបានជួយខ្ញុំយល់កាន់តែប្រសើរឡើងពីតួនាទីទ្រង់ជាព្រះអង្គសង្គ្រោះ និងព្រះប្រោសលោះខ្ញុំ » ។
ខ្ញុំបានមានអារម្មណ៍ថា មានពរណាស់ដោយរៀនពីអត្ថន័យនៃព្រះនាមរបស់ព្រះអង្គសង្រ្គោះចំពោះ ប៊េត និង ប្រ៊ីស ។ ប៊េត បាននិយាយថា « ខ្ញុំមានអារម្មណ៍កាន់តែស្និទ្ធស្នាលចំពោះព្រះអង្គសង្រ្គោះរបស់ខ្ញុំ ។ នៅពេលគេសួរខ្ញុំថាតើខ្ញុំទៅព្រះវិហារមួយណា ហើយខ្ញុំឆ្លើយថា ខ្ញុំជាសមាជិកនៃសាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយ ខ្ញុំទទួលបានអារម្មណ៍ពិតនៃការជាសមាជិក ។ ខ្ញុំជាសមាជិកចំពោះរាស្រ្តទ្រង់ ។ ខ្ញុំជាសមាជិកក្រុមគ្រួសាររបស់ទ្រង់ ។ ខ្ញុំជាសមាជិករបស់ទ្រង់ » ។
ប្រ៊ីស បានប្រាប់ខ្ញុំថា ឈ្មោះត្រឹមត្រូវរបស់សាសនាចក្រជួយគាត់ឲ្យ « ចងចាំថាតើគាត់បម្រើនរណា និងនរណាដែលគាត់ចង់ប្រែក្លាយដូច ។ វារឭកដល់ខ្ញុំថា ព្រះអង្គសង្រ្គោះជាអង្គដែលប្រទានការបង្រៀនទាំងនេះ ហើយថាការបង្រៀនទាំងនេះពុំមែនមកពីមនុស្សនោះទេ » ។
ហាលៃ ជាអ្នកផ្សព្វផ្សាយសាសនាពេញម៉ោងម្នាក់បាននិយាយថា « ព្រះនាមរបស់ព្រះអង្គសង្រ្គោះមានព្រះចេស្តាណាស់
ការប្រើប្រាស់ឈ្មោះត្រឹមត្រូវរបស់សាសនាចក្រនៃព្រះអម្ចាស់នាំមកនូវព្រះចេស្តា និងសិទ្ធិអំណាចនៅពេលយើងបង្រៀនអ្នកដទៃពីដំណឹងល្អដែលបានស្តារឡើងវិញរបស់ទ្រង់ ។ នៅពេលខ្ញុំនិយាយថា ‹ សាសនាចក្រនៃព្រះយេស៊ូវគ្រីស្ទ នៃពួកបរិសុទ្ធថ្ងៃចុងក្រោយ › ព្រះវិញ្ញាណនៃព្រះអម្ចាស់បញ្ជាក់ និងធ្វើជាសាក្សីថាសាសនាចក្រនេះ គឺជា សាសនាចក្ររបស់ព្រះអម្ចាស់ដែលបានស្តារឡើងវិញនៅលើផែនដីនាសព្វថ្ងៃនេះ ។ ខ្ញុំ ចូលចិត្ត ប្រើឈ្មោះត្រឹមត្រូវ ពីព្រោះខ្ញុំក៏កំពុងបន្ថែមសាក្សីរស់របស់ខ្ញុំថា នោះជាការពិតផងដែរ ! »
ហើយ នីកូល បានប្រាប់ខ្ញុំ ៖ « ពីមុនប្រសិនបើខ្ញុំនិយាយថា ‹ មរមន › ជាញឹកញាប់វានឹងមានភាពច្របូកច្របល់នៃភាពមិនប្រាកដប្រជាជាមួយអ្នកដែលមិនមានជំនឿដូចយើង ។ បងប្អូនស្ទើរតែអាចឮពីការនឹកឃើញឡើងវិញភ្លាមៗនូវអ្វីៗទាំងអស់ដែលពួកគេតែងតែបានឮអំពី ‹ មរមន › ។ ប៉ុន្តែឥឡូវនេះមានសេចក្តីសុខសាន្ត ដែលមនុស្សភាគច្រើនទទួលយក ។ ព្រះនាមរបស់ព្រះអង្គសង្រ្គោះមានព្រះចេស្តាណាស់ ។ ទ្រង់នាំមកនូវសេចក្ដីសុខសាន្ត ។ ទីបន្ទាល់របស់ខ្ញុំពីសេចក្តីពិតដ៏ពេញលេញនៃដំណឹងល្អបានរីកលូតលាស់ គឺគ្រាន់តែតាមរយៈការហៅឈ្មោះត្រឹមត្រូវរបស់សាសនាចក្រប៉ុណ្ណោះ ។ ខ្ញុំទទួលអារម្មណ៍ពីព្រះវិញ្ញាណជារៀងរាល់ពេលដែលខ្ញុំនិយាយឈ្មោះសាសនាចក្រ ។ ពេលខ្លះវាជាអ្វីដែលខ្ញុំត្រូវនិយាយអំពីអ្វីដែលយើងជឿ ប៉ុន្តែវាគ្រប់គ្រាន់ហើយ ។
ការបកស្រាយការយល់ច្រឡំ
ហារ៉ូល ជាសាស្រ្តាចារ្យនៅសាកលវិទ្យាល័យមួយក្នុងសហរដ្ឋអាមេរិកបាននិយាយថា ការប្រើឈ្មោះពេញរបស់សាសនាចក្របានជួយគាត់ឲ្យបកស្រាយការយល់ច្រឡំជាច្រើន ។ គាត់បានប្រាប់ខ្ញុំថាមាននិស្សិតម្នាក់ ព្យាយាមសង្ខេបការពិភាក្សាមួយអំពីសាសនាដោយបាននិយាយថា « ខ្ញុំគិតថាសាសនាទាំងអស់គឺជាគ្រិស្ដសាសនិកលើកលែងតែពួកមរមនប៉ុណ្ណោះដែលមិនមែនជាគ្រិស្ដសាសនិក » ។
ដោយការមើលឃើញឱកាសល្អដើម្បីជម្រះកង្វល់ដែលយល់ខុស នោះហារ៉ូលបានថ្លែងថា « ខ្ញុំបានប្រាប់និស្សិតទាំងនោះថា ‹ មរមន › គឺជាឈ្មោះហៅក្រៅដែលបានដាក់ឲ្យសមាជិកសាសនាចក្រ ដោយសារតែជំនឿរបស់យើងលើព្រះគម្ពីរប៊ីប និងព្រះគម្ពីរមរមនថា ជាសាក្សីអំពីបទគម្ពីរបុរាណពីរនៃព្រះយេស៊ូវគ្រីស្ទ » ។
ម៉ារី បានបើកដួងចិត្តនាងចំពោះខ្ញុំ ដោយការចែកចាយពីរបៀបដែលឈ្មោះពេញរបស់សាសនាចក្របានផ្ដល់ពរជ័យឲ្យនាងនៅក្នុងការបង្រៀនកូនៗនាងថា « ឥឡូវនេះកូនៗខ្ញុំមិនសូវភាន់ច្រឡំទៀតទេ នៅពេលខ្ញុំបង្រៀនពួកគេថា យើងគឺជាពួកបរិសុទ្ធថ្ងៃចុងក្រោយនៃសាសនាចក្រនៃព្រះយេស៊ូវគ្រីស្ទថ្ងៃចុងក្រោយខុសពីការហៅខ្លួនឯងថាជា ‹ ពួកមរមន › ។ ពួកគេធ្លាប់ភាន់ច្រឡំ ហើយសួរថា ‹ ហេតុអ្វីគេហៅយើងថាមរមន ? តើវាមានន័យថាយើងមិនមែនគ្រិស្ដសាសនិកទេឬ ? › ខ្ញុំមានអារម្មណ៍ថា ការផ្លាស់ប្ដូរនេះបានជួយពួកគេ នៅពេលពួកគេនិយាយនឹងកុមារផ្សេងទៀតនៅឯសាលារៀនដែលមានជំនឿផ្សេង » ។
« ខ្ញុំគឺជាអ្នកផ្សព្វផ្សាយសាសនារបស់ព្រះយេស៊ូវ គ្រីស្ទ » ។
ប្រធាន ណិលសុនបានសន្យាថា នៅពេលយើងប្រើឈ្មោះត្រឹមត្រូវរបស់សាសនាចក្រ នោះ « យើងនឹងមានចំណេះដឹង និងព្រះចេស្ដារបស់ព្រះ » ដើម្បីផ្សព្វផ្សាយដំណឹងល្អ ។ ថេរេសា បានបំផុសគំនិតខ្ញុំជាមួយនឹងដំណើររឿងរបស់នាងអំពីអ្វីដែលបានកើតឡើងនៅពេលមិត្តម្នាក់នៅកន្លែងការងារបានសួរនាងអំពីសាសនាចក្រ ។ ដោយធ្វើតាមការប្រឹក្សារបស់ប្រធានណិលសុន ថេរេសាបានចាប់ផ្ដើមចែកចាយឈ្មោះពេញរបស់សាសនាចក្រ ។
នាងបានប្រាប់ខ្ញុំថា « គាត់បានមានចំណាប់អារម្មណ៍នឹងសាសនាចក្រ ។ គាត់បានស្វែងរកសាសនាចក្រអស់រយៈពេលបីបួនខែ រួចហើយដោយអព្ភូតហេតុគាត់បានជ្រមុជទឹកដោយកូនប្រុសខ្ញុំដែលជាប៊ីស្សព ។ ខ្ញុំមានចិត្តរីករាយណាស់នៅថ្ងៃនោះ ហើយគ្រួសារខ្ញុំក៏ដូចគ្នាដែរ ។ ការសន្យាទាំងនោះគឺពិត » ។
ជ័រដាន់ បាននិយាយថា មនុស្សជាច្រើននៅតែមិនស្គាល់ឈ្មោះរបស់សាសនាចក្រ ។ គាត់បានថ្លែងថា « ការប្រើឈ្មោះពេញរបស់សាសនាចក្រផ្ដល់ឱកាសឲ្យខ្ញុំពន្យល់ពីរបៀបដែលសាសនាចក្របានផ្ដោតទៅលើព្រះយេស៊ូវគ្រីស្ទ និងហេតុផលដែលយើងហៅខ្លួនយើងថាជាពួកបរិសុទ្ធថ្ងៃចុងក្រោយ » ។
នៅពេលបុរសម្នាក់បានសួរ ក្លូ ថាតើនាងគឺជា « អ្នកផ្សព្វផ្សាយសាសនាមរមន » មែនទេ នាងបានថ្លែងទីបន្ទាល់ដ៏មានអានុភាពថា « ទេ ខ្ញុំគឺជាអ្នកផ្សព្វផ្សាយសាសនារបស់ព្រះយេស៊ូវគ្រីស្ទ » ។ ក្លូ បានប្រាប់ខ្ញុំថាបុរសម្នាក់នោះបានបង្ហាញបំណងចង់ធ្វើតាមព្រះអង្គសង្គ្រោះ ដូច្នេះនាងបានបង្រៀនគាត់ថា សាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយគឺត្រូវបានដឹកនាំដោយព្រះអង្គសង្គ្រោះ ។ បន្ទាប់មក នាងបានផ្ដល់ព័ត៌មានអំពីសាសនាចក្ររបស់ទ្រង់ដល់គាត់ ។
« ហៅសាសនាចក្រតាមនាមយើង »
នៅក្នុងការបើកសម្ដែងពីឈ្មោះរបស់សាសនាចក្រទៅកាន់ព្យាការី យ៉ូសែប ស្ម៊ីធ នោះព្រះអង្គសង្គ្រោះបានប្រកាសថា « ដ្បិតសាសនាចក្ររបស់យើងនឹងត្រូវបានហៅថាដូច្នោះហើយនៅគ្រាចុងក្រោយបង្អស់ គឺជាសាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយ » ( គោលលទ្ធិ និងសេចក្ដីសញ្ញា ១១៥:៤ ) ។ ហើយទ្រង់បានមានបន្ទូលទៅកាន់នីហ្វៃថា « អ្នករាល់គ្នាត្រូវហៅសាសនាចក្រតាមនាមយើង » ដ្បិត « តើនេះជាសាសនាចក្ររបស់យើងដូចម្ដេចកើត លើកលែងតែហៅតាមនាមយើង ? » ( នីហ្វៃ ទី៣ ២៧:៧, ៨ ) ។
ខ្ញុំសូមថ្លែងទីបន្ទាល់រួមនឹងពួកបរិសុទ្ធថ្ងៃចុងក្រោយម្នាក់ឈ្មោះ ថមមី ថានៅពេលយើងប្រើឈ្មោះពេញរបស់សាសនាចក្រ យើងមានពរ ហើយយើងផ្ដល់ពរជ័យដល់មនុស្សដទៃទៀត ។ ថមមីបានប្រាប់ខ្ញុំថា « នៅពេលខ្ញុំចែកចាយជាមួយនឹងមនុស្សដទៃទៀតអំពីពរជ័យនៃការធ្វើជាសមាជិកសាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយ នៅគ្រាដែលមានជម្លោះ និងការភ័យខ្លាច នោះខ្ញុំដឹងខ្លួនថា ខ្ញុំកំពុងជួយមនុស្សដទៃឲ្យដឹងថា មានទីជ្រកកោនពីព្យុះភ្លៀងជាមួយនឹងពួកសិស្សរបស់ព្រះយេស៊ូវគ្រីស្ទ ដែលខ្វល់ខ្វាយពីពួកគេ ហើយដែលធ្វើតាមទ្រង់ » ។