Misingi ya Injili

Kutumikia katika Miito ya Kanisa

Viongozi wa kanisa huwaomba waumini kutumikia katika majukumu maalum yanayojulikana kama “miito.” Miito huwapa waumini fursa za kuwatumikia wengine na kuja karibu zaidi na Mungu.

Picha na David Bowen Newton

Tunapotumikia katika miito yetu, tunasaidia kutimiza kazi ya Mungu. Tunawafundisha wengine kuhusu Baba wa Mbinguni na Yesu Kristo na kuwasaidia waje karibu zaidi na Wao. Tunapokea pia baraka tunapotumikia kwa uaminifu.

Kupokea Miito

Wale wanaotumikia katika Kanisa wameitwa na Mungu. Viongozi wa Kanisa wanaomba ili kupata mwongozo wa kiungu ili kujua ni nani wa kumwita atumikie katika kila wito. Kiongozi kisha anamwomba muumini kutumikia na kumwelezea majukumu ya wito huo. Kwa miito mingi, waumini wanakubaliwa katika mkutano wa Kanisa. Waumini wa kata au tawi hupiga kura ya kuwakubali. Hii inamaanisha kuwa wako tayari kumuunga mkono mtu yule anayepewa wito. Muumini kisha atapewa baraka na kiongozi wa ukuhani. Hii inaitwa kusimikwa. Muumini atapewa mamlaka ya kutenda katika wito huo na baraka zingine za kumsaidia yeye kutumikia.

Maaskofu

Askofu ni kiongozi wa kata. (Katika tawi, rais wa tawi ni sawa na askofu.) Rais wa kigingi humpendekeza mwanamume anayestahili aliye na ukuhani kuitwa kama askofu. Urais wa Kwanza unaidhinisha wito huo. Kisha askofu anakubaliwa na kusimikwa ili kutumikia. Yeye pia hupokea funguo za ukuhani, ambayo inamaanisha anayo mamlaka ya kuiongoza kata hiyo. Kama askofu, anawatumikia na kuwaongoza waumini wote katika kata.

Urais

Akidi za ukuhani na Muungano wa Usaidizi, Wasichana, Msingi, na vikundi vya madarasa ya Shule ya Jumapili huongozwa na marais, kwa kawaida rais na washauri wawili. Urais wa akidi za wazee huitwa na kusimikwa na urais wa kigingi. Uaskofu huwaomba waumini kutumikia katika urais mwingine katika kata na kuwasimika. Viongozi wote huwatumikia waumini katika akidi au vikundi vyao. Wanawatumikia waumini katika mahitaji yao na kuwasaidia wahisi upendo wa Mungu.

Miito Mingine

Miito mingine ya Kanisa ni pamoja na kufundisha, kusaidia katika muziki, kutunza kumbukumbu, kupanga shughuli za vijana au watoto, na kutumikia kwa njia zingine. Kila wito katika Kanisa ni muhimu na huwapa waumini nafasi ya kuwatumikia wengine na kumtumikia Mungu. Tunapofanya kazi pamoja kutimiza miito yetu, tunawaimarisha wengine na kulisaidia Kanisa kukua.

Kutoka kwenye Maandiko

Miito ya kutumikia katika Kanisa hutoka kwa Mungu (ona Makala ya Imani 1:5).

Tunaitwa na kusimikwa kabla ya kutumikia katika wito (ona Mafundisho na Maagano 42:11).

Tunapotumikia katika miito yetu, tunasaidia kulijenga Kanisa (ona Mafundisho na Maagano 84:109–10).

Kujifunza Jinsi ya Kutenda kwenye Wito Wako

Kuwa na wito ni fursa kubwa ya kuwatumikia wengine. Kila wito una seti yake ya majukumu, kwa hivyo ni muhimu kujifunza majukumu hayo wakati unapoanza kutumikia. Hizi hapa ni baadhi ya nyenzo za kukusaidia:

• Zungumza na kiongozi aliyekupa wito. Uliza ni mafunzo gani unayoweza kupata.

• Angalia wito wako katika Kitabu cha Mwongozo , kinachopatikana kwenye ChurchofJesusChrist.org. Kina sura juu ya Muungano wa Usaidizi, akidi ya wazee, Msingi, na kadhalika.

• Pia kwenye ChurchofJesusChrist.org, bofya “Miito” chini ya Serve kwenye menyu. Itakupa taarifa zinazohusiana na wito wako.

• Omba kupata mwongozo wa kiroho na soma maandiko na hotuba za mkutano mkuu ukizingatia wito wako katika mawazo yako. Baba wa Mbinguni atakubariki ili uwatumikie watoto Wake vizuri.