NGAAHI PEESI FAKALOTOFONUÁ
Ako ʻa ha Kau Faiongoongo Pāpua Niu Kini Fekauʻaki mo e Ngaahi Meʻa Tefito ʻoku Tui ki ai ʻa e Siasí
ʻOku nau aleaʻi foki hotau temipale foʻoú pea mo ʻetau polokalama ʻFakamaama ʻa e Māmaní.
Naʻe fakataha e kau faiongoongo televīsone, letiō mo nusipepá pea mo e kau taki ʻo e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimuí Ni ʻi Pāpua Niu Kiní ʻi Pooti Molesipei ʻi he konga kimuʻa ʻo Tīsema, 2021.
ʻI he fakatahá, ne talanoa ai e kau taki ʻo e Siasí ki he kau palōfesinale faka-mītiá kau ki he Siasi ʻi Pāpua Niu Kiní, kau ai e tokolahi ʻo hono kau mēmipá (31,000) mo e ngaahi haʻofangá (81).
Naʻe kau ʻi he ngaahi meʻa kehe ne tālangaʻí ʻa e tokoni ʻofa fakaetangata, ako mo e ngaahi ngāue ke poupou ki he moʻui fakafalala pē kiate kita ʻa e Siasí, kae pehē ki he fanongonongo ʻi he 2019 ʻe langa ha temipale foʻou ʻi Pooti Molesipei ʻi he ngaahi taʻu ka hoko maí.
Naʻe kole e kau faiongoongó ke fakamahinoʻi ange e faikehekehe ʻi he vahaʻa ʻo e ngaahi falelotu angamaheni ʻo e Siasí pea mo e ngaahi temipalé. ʻOku fakataumuʻa e ngaahi falelotú ki he ngaahi ouau moihū ʻi he Sāpaté pea ko e ngaahi temipalé ki he ngaahi sākalamēniti māʻolunga taha ʻo ʻetau tuí.
ʻI he ngaahi temipalé, ʻoku fakaloloto ʻe he kau moihuú ʻenau mahino ki he palani ʻa e ʻOtuá ki Heʻene fānaú mo e ongoongolelei ʻa Sīsū Kalaisí. ʻOku nau kau foki ʻi he ngaahi ouau ʻokú ne fakatahaʻi e ngaahi fāmilí ke taʻengatá.
Naʻe vahevahe foki ʻe he kau fakafofonga ʻo e Siasí ha fakamatala mo e kau faiongoongó fekauʻaki mo e polokalama Kilisimasi “Fakamaama ʻa e Māmaní” ʻa ia ʻoku tuʻuaki ʻi he televīsoné, letioó, ngaahi nusipepá mo e mītia fakasōsialé.
Naʻe fokotuʻu e taumuʻa ki he taʻu kuo ʻosí ko e “Fakamaama e Māmani ʻaki ʻa e ʻOfá”. Naʻe kau ʻi he ngaahi maʻuʻanga tokoni ʻi he ʻinitanetí ha ngaahi vitiō faka-Kilisimasi mo ha ngaahi tohi māhina ngāue tokoni fakaʻaho naʻá ne fokotuʻu ange e founga ʻe lava ke fakahoko ai ʻe he kakai lalahí mo e fānaú ha ngāue ʻofa maʻa ha taha ʻi he ʻaho takitaha ʻo aʻu ki he ʻAho Kilisimasí.