NGAAHI PEESI FAKALOTOFONUÁ
ʻAve ʻo e ʻOfa ʻa e Kāinga Tahití ki Tonga
Tokoni ʻa e puleʻangá, ngaahi siasi mo e tukui koló ki ha fakatamaki fakanatula ne fie maʻu ha tokoni ki ai.
Ne ofo e kakai ʻo Tahití ʻi he maumau mo e fakaʻauha ʻi Tonga mei he pā ʻa e moʻunga afí mo e hake ʻa e peaukulá ʻi he ʻaho 15 ʻo Sānualí.
Ne lotu mo ʻaukai ʻa e kāingalotu ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní ʻi Tahití koeʻuhí ko honau kaungā-Kaingalotu ʻi Tongá, pea tuku atu ha ngaahi pōpoaki ʻo e poupou ʻi he mītia fakasōsialé.
Hili e ngaahi fakatamaki fakanatula kehe ʻi he māmaní, kuo tokoni ai ha kāingalotu mo e kaungāmeʻa tokolahi ʻo e Siasí ʻaki ha foaki lahi ki he paʻanga tokoni ʻofa fakaetangata ʻa e Siasí pe ngaahi kautaha ʻofa kehe.
Naʻe pehē e ʻEletā Feletiliki Liemea, ko ha Fitungofulu Fakaʻēlia ʻi he Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní, “Naʻe ongoʻi lahi ʻe homau kau takí e fiemaʻu ke mau tokoni, ka ko e fehuʻí ko e hā te mau lava ke fai ke tokoni ai ki Tongá.
Ne mau kolea e lotu fakamātoato ʻa e taha kotoa ke ʻiloʻi ai e founga lelei taha te mau lava ʻo tokoni ai ki homau kāinga ʻi Tongá.”
Ne maʻu e talí ʻi he fanongonongo ʻa e Palesiteni ʻo Tahití, ʻEtuate Filiti, ʻe nō ʻe he puleʻangá ʻa e vaka Tahiti Nuí ke ʻave ʻa e naunau tokoni ki Tongá, ko e vaka tatau naʻá ne ʻave e tokoni ki Fisi ʻi he tō ʻa e saikolone ʻi he taʻu kuoʻosí. Naʻá ne kole ki he kakai ʻo Tahití ke fakahaaʻi ʻenau ʻofa angamaheni ki honau kaungāʻapi Polinisiá.
Ne pehē ʻe ʻEletā Liemea ne ongo ia hangē ha tali ki heʻenau ngaahi lotú. ʻI heʻenau fakataha alēlea ki he meʻa fakatuʻupakeé, ne loto ai mo e kau palesiteni fakasiteiki ʻe toko hiva (kau taki fakasiasi fakalotofonua) ʻo Tahití ke fai e ngāué: naʻe fakaafeʻi ʻa e kāingalotú ke tānaki mai e meʻatokoni, vala, naunau fakahaisini mo e vai. Naʻe hoko leva ʻa e Siteiki Senitā Fariipiti, ʻoku tuʻu ʻi he kolomuʻa ʻo Papeete, ko e tānakiʻanga ʻo e meʻa kotoa.
Naʻe tali lelei ʻe he kāingalotu ʻo e Siasí ki he ui ʻa ʻEletā Liemea ki ha tokoní ʻi he founga ko ʻeni ʻo e ʻofá.
ʻI he tataki ʻa e kau pīsope ʻo e ngaahi uōtí, naʻe tokolahi ha kau ngāue tokoni ʻi hono tānaki, fili fakafaʻahinga, mo faʻo ʻo e ngaahi tokoní. Naʻe kau atu foki mo e kau faifekaú ʻi hono tānaki ʻo e ngaahi ʻofá, fakaʻilongaʻi kinautolu pea faʻo ki he ngaahi loli ke ʻave ki he taulangá.
Naʻe kau mai foki mo e kaungāmeʻa mei he ngaahi tui fakalotu kehe, tukui koló kakato mo e ngaahi kautaha fakalotofonua ki hono ʻave ʻenau ngaahi tokoní ki he ngaahi ʻapisiasi kehekehe ʻi he ʻotu motu ʻo Tahiti Moleá pea fakahangatonu ki he senitā fili fakafaʻahinga ʻi Fariipiti. Naʻe tokoni mai foki mo e ngaahi kautaha fakataautaha ʻaki ha ngaahi koloa pea tokoni mai ki hono ʻave taʻe totongi ʻo e ngaahi tokoní ki he tānakiʻanga ʻo e ngaahi koloa lahi kuo tānakí.
Naʻe fakatahaʻi ʻa e ngaahi tokoní mo e ngaahi naunau ne ʻomai ʻe he puleʻangá pea ʻave atu ia ki he taulanga ʻo Motu Uta ʻi Papeete.
ʻI he fakaʻosingá, ne fakaheka atu ki he vaká ha kiupiki mita ʻe 250 tupu ʻo e meʻangāue mo e naunau ne laka hake ʻi he toni ʻe 300 ki he vaká. Naʻe kau heni ʻa e ngaahi tangikē vai, tapoleni, papa, kapa ʻato, mīsini tutuʻu ʻakau, meʻakai mōmoa, hina vai, vala, naunau fakamaʻa mo e tauhi ʻapi, taufale, polosi mo e taipa. Naʻe kau foki ai mo ha vai toni ʻe 30.
ʻI hono fakaheka ʻo e konga fakaʻosí ki he vaká, ne fakamālō ai ʻa Palesiteni Filisi ki he kakaí kotoa ki heʻenau foaki lahí mo e tokoní.
“Kuo hokohoko atu ʻa e laumālie ʻo e uouangatahá ʻoku makehe ai hotau kakaí ʻi he Pasifikí ki he foaki lahi ʻi he ngaahi tūkunga faingataʻa tahá. Pea ʻi he ngaahi taimi pehení, neongo ʻoku tau vakai ki he kilomita ʻe lauiafe ʻetau nofo vāmamaʻó, ka ʻoku moʻoni mo mālohi ʻetau fetaiaki mo Tongá. Koeʻuhí ʻoku tau kau ki ha fāmili pē ʻe taha, ʻa ia ko e kakai maʻongoʻonga ʻo e Tahí.”
Naʻe toe pehē ʻe Palesiteni Filisi: “ʻOku ʻikai ko e naunau pē ʻoku faʻoaki ʻi he vaka ko ʻení; ʻoku ʻoatu ai foki ʻetau ʻofa mo e fie kau fakataha.”
Naʻe pehē ʻe ʻEletā Liemea, “ʻI he ngaahi meʻa kuo tānaki ʻe he Siasí, ʻoku tau vakai ai ki he nima foaki mo e ʻofa lahi ʻa e kakai Polinisiá. ʻOku mau houngaʻia ʻi he meʻa kotoa pē, ngaahi foakí, tatau ai pē hono lahí, ko e tali ia ki heʻetau feinga ke hangē ko Sīsū Kalaisí: ‘Ko e meʻa ʻi hoʻomou fai ia ki ha taha ʻoku kihiʻi siʻi hifo ʻi hoku kāingá ni, ko hoʻomou fai ia kiate aú’ (Mātiu 25:40)”.